മാനസികാവസ്ഥയെയും സന്തോഷത്തെയും സ്വാധീനിക്കുന്നതിൽ താമസിക്കുന്ന വീടിന് വലിയ പങ്കുണ്ടെന്ന് നിങ്ങൾക്കറിയാമോ? വെളിച്ചം, മുറികളിലെ സ്ഥലസൗകര്യം, നിറങ്ങൾ എന്നിവ കേവലം വീടിന്റെ അലങ്കാരങ്ങൾ മാത്രമല്ല, മനസ്സിനെ ശാന്തമാക്കാനും പോസിറ്റീവ് ഊർജ്ജം നൽകാനും സഹായിക്കുന്ന പ്രധാന ഘടകങ്ങളാണ്.
വീട് ഒരുക്കുമ്പോൾ ശ്രദ്ധിക്കേണ്ട കാര്യങ്ങളെക്കുറിച്ചും അത് പങ്കാളികൾ തമ്മിലുള്ള ബന്ധം മെച്ചപ്പെടുത്തുന്നു എന്നതിനെ കുറിച്ച് എപ്പോഴെങ്കിലും ചിന്തിച്ചിട്ടുണ്ടോ?
വിദഗ്ധരുടെ അഭിപ്രായത്തിൽ, ഒരു വീട് ഊഷ്മളവും സ്വാഗതാർഹവുമാക്കുന്നതിലും താമസക്കാരുടെ മാനസികാവസ്ഥയെ സ്വാധീനിക്കുന്നതിലും വെളിച്ചം, സ്ഥലം, കളർ പാലറ്റ് എന്നിവ വലിയ പങ്ക് വഹിക്കുന്നുണ്ട്. ബാംഗ്ലൂരിലെ ആസ്റ്റർ ആർവി ഹോസ്പിറ്റലിലെ സൈക്യാട്രി ആൻഡ് കൗൺസിലിംഗ് സർവീസസ് കൺസൾട്ടന്റ് ഡോ. മുരളി കൃഷ്ണ പറയുന്നതനുസരിച്ച്, ഇവ കേവലം വീടിന്റെ ഭംഗി കൂട്ടുന്ന ഘടകങ്ങൾ മാത്രമല്ല, മറിച്ച് വീടിന്റെ വൈകാരിക അന്തരീക്ഷത്തെ രൂപപ്പെടുത്തുന്ന അടിസ്ഥാന ഘടകങ്ങൾ കൂടിയാണ്.
“മാനസികാവസ്ഥ ക്രമീകരിക്കുന്നതിൽ പ്രകാശത്തിന് നിർണ്ണായക പങ്കുണ്ട്. ആംബിയന്റ്, ടാസ്ക്, ആക്സന്റ് ലൈറ്റുകൾ സമന്വയിപ്പിച്ചുകൊണ്ടുള്ള ഊഷ്മളമായ ലൈറ്റിംഗ് ഒരു മുറിയെ കൂടുതൽ ആകർഷകവും സുഖപ്രദവുമാക്കുന്നു. അതേസമയം, കടുപ്പമേറിയതോ അമിതമായി വെളിച്ചമുള്ളതോ ആയ ലൈറ്റിംഗ് ഒരുതരം വന്ധ്യതയോ വിരസതയോ അനുഭവപ്പെടുത്താം. സ്വാഭാവിക വെളിച്ചം വീട്ടിൽ പോസിറ്റീവ് ഊർജ്ജം നൽകുകയും ആരോഗ്യത്തിന് അനുകൂലമാവുകയും ചെയ്യുന്നു,” എന്ന് ഡോ. കൃഷ്ണ പറഞ്ഞു.
വീടിനുള്ളിലെ സ്ഥലം കൃത്യമായി പ്ലാൻ ചെയ്യുന്നത് വീട് കൂടുതൽ വൃത്തിയുള്ളതാക്കാൻ സഹായിക്കുമെങ്കിലും, അനുയോജ്യമായ നിറങ്ങൾ തിരഞ്ഞെടുക്കുന്നതും അത്രതന്നെ പ്രധാനമാണ്. “ഒരു മുറി നാം എങ്ങനെ അനുഭവിക്കുന്നു എന്നതിനെ അവിടുത്തെ നിറങ്ങൾ സ്വാധീനിക്കുന്നു. ഓരോ മുറിയുടെയും ഉപയോഗത്തിനനുസരിച്ചുള്ള നിറങ്ങളായിരിക്കണം അവിടെ നൽകേണ്ടത്,” എന്ന് ഡോ.കൃഷ്ണ വ്യക്തമാക്കി. കൂടാതെ, “ശരിയായ രീതിയിലുള്ള ലേഔട്ട് വീട്ടിലെ ചലനങ്ങൾ എളുപ്പമാക്കുകയും ആശയവിനിമയം പ്രോത്സാഹിപ്പിക്കുകയും ചെയ്യുന്നു. ഫർണിച്ചറുകളുടെ സ്ഥാനം, സഞ്ചാരപഥം, അനുപാതം എന്നിവ കൃത്യമാണെങ്കിൽ വീട് കൂടുതൽ സ്വാഭാവികവും സമാധാനപൂർണ്ണവുമായി തോന്നും,” ഡോ. കൃഷ്ണ കൂട്ടിച്ചേർത്തു.
പങ്കാളികൾ ചേർന്ന് വീട് ഡിസൈൻ ചെയ്യുന്നതും ഒരുക്കുന്നതും അവരുടെ ബന്ധത്തിലെ ആശയവിനിമയവും പൊരുത്തവും മെച്ചപ്പെടുത്താൻ എങ്ങനെ സഹായിക്കുമെന്നും ഡോ. മുരളി കൃഷ്ണ വ്യക്തമാക്കുന്നുണ്ട്. “ഈ പ്രക്രിയ പങ്കാളികളെ അവരുടെ താൽപ്പര്യങ്ങൾ പ്രകടിപ്പിക്കാനും വ്യത്യാസങ്ങൾ ചർച്ച ചെയ്യാനും ഒത്തുതീർപ്പിലെത്താനും പ്രേരിപ്പിക്കുന്നു. അത് വീടിന്റെ ലേഔട്ടിനെക്കുറിച്ചോ സൗകര്യങ്ങളെക്കുറിച്ചോ സൗന്ദര്യത്തെക്കുറിച്ചോ ആകട്ടെ, ഇത്തരം സംഭാഷണങ്ങൾ പരസ്പരം വ്യക്തിത്വങ്ങളെയും ശീലങ്ങളെയും മുൻഗണനകളെയും കുറിച്ച് ആഴത്തിലുള്ള ഉൾക്കാഴ്ച നൽകുന്നു,” ഡോക്ടർ പറഞ്ഞു.
“ഏറ്റവും പ്രധാനമായി, ഒരുമിച്ച് ഒരു താമസസ്ഥലം ഒരുക്കുന്നത് ആ വീടിനോട് വൈകാരികമായ അടുപ്പവും ഉത്തരവാദിത്തബോധവും വളർത്താൻ സഹായിക്കുന്നു,” എന്ന് ഡോ. മുരളി കൂട്ടിച്ചേർത്തു.
