ഉത്തർപ്രദേശിലെ റാംപുറിൽ തിരക്കേറിയ റോഡിന് നടുവിൽ നിസ്കാരം നിർവ്വഹിച്ച യുവാവിനെ പോലീസ് അറസ്റ്റ് ചെയ്തു. റാംപുറിലെ സിവിൽ ലൈൻസ് പോലീസ് സ്റ്റേഷൻ പരിധിയിലുള്ള ഷഹാബാദ് ഗേറ്റ് ജംഗ്ഷനിലാണ് സംഭവം.
ഇതിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിച്ചതോടെയാണ് പോലീസ് നടപടിയെടുത്തത്. റോഡിന് നടുവിൽ യുവാവ് നിസ്കരിക്കുന്നത് കാരണം ഗതാഗതം തടസ്സപ്പെടുകയും വലിയൊരു ജനക്കൂട്ടം സ്ഥലത്ത് തടിച്ചുകൂടുകയും ചെയ്തിരുന്നു.പൊതുസ്ഥലത്ത് തടസ്സമുണ്ടാക്കിയതിനാണ് പോലീസ് യുവാവിനെ കസ്റ്റഡിയിലെടുത്തത്. സംഭവത്തിൽ കേസെടുത്തിട്ടുണ്ടെന്ന് പോലീസ് അറിയിച്ചു. “സിവിൽ ലൈൻസ് ഏരിയയിൽ ഒരാൾ റോഡിന് നടുവിൽ നിസ്കരിക്കുന്ന വീഡിയോ ശ്രദ്ധയിൽപ്പെട്ടിരുന്നു. ഇതിന്റെ അടിസ്ഥാനത്തിൽ എഫ്ഐആർ രജിസ്റ്റർ ചെയ്തു. വ്യക്തിയെ കസ്റ്റഡിയിലെടുത്തിട്ടുണ്ട്, ഇയാളെ ജയിലിലേക്ക് അയക്കും,” അഡീഷണൽ സൂപ്രണ്ട് ഓഫ് പോലീസ് അനുരാഗ് സിംഗ് പറഞ്ഞു.
മാനസികാസ്വാസ്ഥ്യമെന്ന് കുടുംബം
അറസ്റ്റിലായ യുവാവിന് മാനസികാസ്വാസ്ഥ്യമുണ്ടെന്ന് കുടുംബം അവകാശപ്പെട്ടു. ഇക്കാര്യം അന്വേഷണത്തിന്റെ ഭാഗമായി പരിശോധിക്കുമെന്ന് പോലീസ് വ്യക്തമാക്കി. റോഡിന് നടുവിൽ യുവാവ് പ്രാർത്ഥന തുടരുന്നതും ഇത് കാണാൻ ആളുകൾ കൂടുന്നതും കാരണം ആ പ്രദേശത്തെ സാധാരണ ഗതാഗതത്തെ ഇത് ബാധിച്ചതായി ദൃശ്യങ്ങളിൽ നിന്ന് വ്യക്തമാണ്.
പൊതുസ്ഥലത്തെ പ്രാർത്ഥനകൾക്കെതിരെ കർശന നടപടി
ക്രമസമാധാന പ്രശ്നങ്ങൾ ചൂണ്ടിക്കാട്ടി പൊതുറോഡുകളിൽ മതപരമായ പ്രവർത്തനങ്ങൾ നടത്തുന്നതിനെതിരെ ഉത്തർപ്രദേശിൽ അധികൃതർ കർശന നിലപാടാണ് സ്വീകരിച്ചു വരുന്നത്. അനുമതിയില്ലാതെ പൊതുസ്ഥലങ്ങൾ പ്രാർത്ഥനയ്ക്കായി ഉപയോഗിക്കാൻ കഴിയില്ലെന്നും ഗതാഗതത്തെയോ പൊതുസമാധാനത്തെയോ ബാധിക്കുന്ന തരത്തിലുള്ള നീക്കങ്ങൾ അനുവദിക്കില്ലെന്നും അധികൃതർ ആവർത്തിച്ചു വ്യക്തമാക്കിയിട്ടുണ്ട്.
അതേസമയം, പൊതുസ്ഥലങ്ങളും സ്വകാര്യ സ്ഥലങ്ങളും തമ്മിലുള്ള വ്യത്യാസം കോടതികൾ ചൂണ്ടിക്കാട്ടിയിട്ടുണ്ട്. പൊതുറോഡിലെ പ്രാർത്ഥനകൾക്കെതിരെ പോലീസ് നടപടിയെടുക്കാമെങ്കിലും സ്വകാര്യ പരിസരത്ത് നിസ്കാരം നടത്തുന്നതിന് സർക്കാരിന്റെ അനുമതി ആവശ്യമില്ലെന്നും അത് മതസ്വാതന്ത്ര്യത്തിനുള്ള അവകാശത്തിന്റെ ഭാഗമാണെന്നും അലഹബാദ് ഹൈക്കോടതി അടുത്തിടെയുള്ള വിധിന്യായങ്ങളിൽ വ്യക്തമാക്കിയിരുന്നു.
മതപരമായ ചടങ്ങുകൾ പൊതുറോഡുകളിലേക്ക് വ്യാപിക്കുമ്പോൾ അധികൃതർക്ക് ഇടപെടാമെങ്കിലും സ്വകാര്യ സ്വത്തുകളിൽ സമാധാനപരമായി ആരാധന നടത്തുന്നത് തടയാൻ കഴിയില്ലെന്നും കോടതി നിരീക്ഷിച്ചു.
