2026 ഫെബ്രുവരി 12ന് നടത്താൻ തീരുമാനിച്ചിരിക്കുന്ന രാജ്യവ്യാപക പൊതു പണിമുടക്കിന് നാഷണൽ കോൺഫെഡറേഷൻ ഓഫ് ബാങ്ക് എംപ്ലോയീസ് (എൻസിബിഇ) ഐക്യദാർഢ്യം പ്രഖ്യാപിച്ചു. കേന്ദ്ര ട്രേഡ് യൂണിയനുകളുമായി ഏകോപിപ്പിച്ച് പ്രധാന ബാങ്ക് യൂണിയനുകൾ നൽകുന്ന ആഹ്വാനത്തിന് പിന്തുണ പ്രഖ്യാപിച്ചു.
ന്യൂഡൽഹി: സംയുക്ത ട്രേഡ് യൂണിയൻ നേതൃത്വത്തിൽ ഫെബ്രുവരി 12ന് നടത്തുന്ന ദേശീയ പണിമുടക്കിന് പിന്തുണ ശക്തമാകുന്നു. ഫെബ്രുവരി 12ലെ ദേശീയ പണിമുടക്കിന് നാഷണൽ കോൺഫെഡറേഷൻ ഓഫ് ബാങ്ക് എംപ്ലോയീസ് ( എൻസിബിഇ ) ഐക്യദാർഢ്യം പ്രഖ്യാപിച്ചു. കേന്ദ്ര ട്രേഡ് യൂണിയനുകളുമായി ഏകോപിപ്പിച്ച് പ്രധാന ബാങ്ക് യൂണിയനുകൾ നൽകുന്ന ആഹ്വാനത്തിന് പിന്തുണ പ്രഖ്യാപിക്കുകയും ചെയ്തു.
ബാങ്കിങ് മേഖലയെ ബാധിക്കുന്ന തൊഴിൽ നയങ്ങളും വികസനങ്ങളും സംബന്ധിച്ച ആശങ്കകൾ ഉയർത്തിക്കാട്ടിക്കൊണ്ട് ഇന്ത്യൻ ബാങ്ക്സ് അസോസിയേഷൻ (ഐബിഎ) ചെയർമാനെ അഭിസംബോധന ചെയ്ത ഔദ്യോഗിക കത്തിലൂടെയാണ് തീരുമാനം അറിയിച്ചത്.
ഫെബ്രുവരി 12ലെ ദേശീയ പണിമുടക്കിന് ബാങ്കിങ് മേഖലയിൽ നിന്ന് പിന്തുണ ശക്തമാകുകയാണ്. പ്രധാന ബാങ്ക് യൂണിയനുകളുടെ ആഹ്വാനത്തിന് എൻസിബിഇ പിന്തുണ നൽകി. ഓൾ ഇന്ത്യ ബാങ്ക് എംപ്ലോയീസ് അസോസിയേഷൻ (എഐബിഇഎ), ഓൾ ഇന്ത്യ ബാങ്ക് ഓഫീസേഴ്സ് അസോസിയേഷൻ (എഐബിഒഎ), ബാങ്ക് എംപ്ലോയീസ് ഫെഡറേഷൻ ഓഫ് ഇന്ത്യ എന്നിവയുൾപ്പെടെയുള്ള പ്രമുഖ ബാങ്കിങ് സംഘടനകൾ കേന്ദ്ര ട്രേഡ് യൂണിയനുകളുമായി ഏകോപിപ്പിച്ച് നൽകിയ ആഹ്വാനത്തെ തുടർന്നാണ് രാജ്യവ്യാപക പണിമുടക്ക് ആചരിക്കുന്നതെന്ന് എൻസിബിഇ വ്യക്തമാക്കി.
കേന്ദ്ര സർക്കാർ നടപ്പിലാക്കിയ നടപടികൾ തൊഴിലാളികൾക്കിടയിൽ വർധിച്ചുവരുന്ന ആശങ്കയാണ് പണിമുടക്കിന് പിന്തുണ നൽകാനുള്ള കാരണമെന്ന് എൻസിബിഇ പറഞ്ഞു. പൊതുമേഖല ബാങ്കുകളുടെ സ്വകാര്യവൽക്കരണം, ഓഹരി വിറ്റഴിക്കൽ സംരംഭങ്ങൾ, ബാങ്കുകളുടെ സ്ഥാപനപരമായ പങ്കിനെ ബാധിക്കുന്ന മാറ്റങ്ങൾ എന്നിവയുൾപ്പെടെ, തൊഴിലാളി താൽപ്പര്യങ്ങളെയും ബാങ്കിങ് മേഖലയെയും കേന്ദ്ര സർക്കാർ തീരുമാനം ബാധിക്കുന്നുണ്ടെന്ന് സംഘടന വ്യക്തമാക്കി.
കേന്ദ്ര സർക്കാർ കൊണ്ടുവന്ന നാല് പുതിയ തൊഴിൽ കോഡുകളുടെ വിജ്ഞാപനവും എൻസിബിഇ പരാമർശിച്ചു. തൊഴിൽ കോഡുകൾ ട്രേഡ് യൂണിയനുകൾക്കിടയിൽ ആശങ്കകൾ ഉയർത്തി. തൊഴിൽ അവകാശങ്ങൾ ദുർബലപ്പെടുത്തൽ, കൂട്ടായ വിലപേശൽ സംവിധാനങ്ങൾ, ട്രേഡ് യൂണിയനുകളുടെ ഫലപ്രദമായ പ്രവർത്തനം എന്നിവയുമായി ബന്ധപ്പെട്ടാണ് പ്രധാന ആശങ്കകൾ.
2026 ഫെബ്രുവരി 12ന് നടന്ന പണിമുടക്കിന് പിന്തുണ നൽകുന്നതിനൊപ്പം പിന്തുണയറിയിച്ചുള്ള നടപടികളും എൻസിബിഇ വിശദീകരിച്ചു. ഫെബ്രുവരി 8ന് സോഷ്യൽ മീഡിയ കാമ്പയ്ൻ, ഫെബ്രുവരി 9ന് ബാഡ്ജ് ധരിക്കൽ, 11, 12 തീയതികളിലെ പ്രകടനങ്ങൾ എന്നിവ ഉൾപ്പെടുന്നു.
അതേസമയം, നരേന്ദ്ര മോദി സർക്കാരിന്റെ തൊഴിലാളി വിരുദ്ധ, കർഷക വിരുദ്ധ നയങ്ങൾ എന്ന് വിശേഷിപ്പിച്ചതിനെതിരെ സെന്റർ ഓഫ് ഇന്ത്യൻ ട്രേഡ് യൂണിയൻസ് (സിഐടിയു), കാർഷിക തൊഴിലാളി യൂണിയൻ ഉൾപ്പെടെയുള്ള സംഘടനയുടെ നേതാക്കൾ ഫെബ്രുവരി 12ന് രാജ്യവ്യാപക പണിമുടക്കിന് ആഹ്വാനം ചെയ്തു.
