തിരുവനന്തപുരം : സംസ്ഥാനത്ത് തിരുവോണത്തിന് അടക്കം മൂന്ന് ദിവസത്തേക്ക് മദ്യവിൽപന ഉണ്ടാകില്ല. ബാർ, ബിവറേജ് ഔട്ട്‌ലെറ്റ്, വൈൻ പാർലർ എന്നിങ്ങനെ എല്ലാ മദ്യവിൽപന ശാല സ്ഥാപനങ്ങളും അടഞ്ഞുകിടക്കും. കൊവിഡ് പശ്ചാത്തലത്തിൽ തിരക്ക് ഒഴിവാക്കാനാണ് ഈ നീക്കം.
നേരത്തെ തന്നെ ബെവ്‌കോ, കൺസ്യൂമർഫെഡ് ഔട്ട്‌ലെറ്റുകൾക്ക് തിരുവോണ ദിവസമായ 31ന് അവധിയാണ്. അതിനാൽ ആ ദിവസം ബാറുകൾക്ക് അനുമതി നൽകിയാൽ വലിയ തിരക്കിന് സാധ്യതയുള്ളതിനാലാണ് തീരുമാനം.
അതേസമയം ബിവറേജസ് കോർപറേഷൻ ആപ്ലിക്കേഷനായ ബെവ്ക്യൂ ആപ്പിൽ പുതിയ മാറ്റങ്ങൾ വരുത്തിയിട്ടുണ്ട്. ഇനി ബുക്ക് ചെയ്താൽ ഉടൻ മദ്യം ലഭിക്കും. ആപ്പ് മുഖേന ബുക്ക് ചെയ്യുന്നവർക്ക് മൂന്ന് ദിവസം കഴിഞ്ഞേ വീണ്ടും ബുക്ക് ചെയ്യാനാവൂ എന്ന വ്യവസ്ഥ സർക്കാർ നീക്കികൊണ്ടാണ് പുതിയ മാറ്റം.
