തൊണ്ണൂറാം പിറന്നാളിന് ദിവസങ്ങൾ ശേഷിക്കെ, നടൻ ധർമേന്ദ്ര (Dharmendra) അന്തരിച്ചു. ആറ് പതിറ്റാണ്ടിലേറെ നീണ്ട ചലച്ചിത്ര പാരമ്പര്യം ബാക്കിയാക്കിയാണ് അദ്ദേഹത്തിന്റെ വിയോഗം. ധർമേന്ദ്ര സിംഗ് ഡിയോൾ എന്ന പേരിൽ ജനിച്ച അദ്ദേഹം തന്റെ വസതിയിൽ വച്ചാണ് അന്ത്യശ്വാസം വലിച്ചത്. ശ്വാസകോശ സംബന്ധമായ അസുഖങ്ങളെ തുടർന്ന് ഈ മാസം ആദ്യം അദ്ദേഹത്തെ ബ്രീച്ച് കാൻഡി ആശുപത്രിയിൽ പ്രവേശിപ്പിച്ചിരുന്നു.
അന്ന് അദ്ദേഹത്തിന്റെ വ്യാജ മരണവാർത്ത പ്രചരിച്ച വേളയിൽ കുടുംബം ശക്തമായ പ്രതിഷേധം രേഖപ്പെടുത്തി രംഗത്തെത്തിയിരുന്നു. വാർത്താ ഏജൻസിയായ IANS മരണവാർത്ത റിപ്പോർട്ട് ചെയ്തു. സംവിധായകൻ കരൺ ജോഹർ അനുശോചന പോസ്റ്റ് രേഖപ്പെടുത്തി.
ധർമേന്ദ്രയുടെ വിയോഗം രാജ്യമെമ്പാടും ദുഃഖത്തിന്റെ അലയൊലികൾ സൃഷ്ടിച്ചു. ആരാധകർ, സഹപ്രവർത്തകർ, സിനിമാ മേഖലയിലെ താരങ്ങൾ എന്നിവർ അഗാധമായ ഞെട്ടലിലാണ്.
1960-ൽ അരങ്ങേറ്റം കുറിച്ച ധർമേന്ദ്ര വളരെ പെട്ടെന്ന് ഒരു സൂപ്പർസ്റ്റാറായി മാറി. റൊമാന്റിക് നായകൻ മുതൽ കഠിനമായ ആക്ഷൻ രംഗങ്ങൾ വരെയുള്ള വേഷങ്ങളിൽ വൈദഗ്ദ്ധ്യം നേടിയ അദ്ദേഹം ബഹുമുഖ പ്രതിഭയ്ക്ക് പേരുകേട്ടവനായിരുന്നു. അദ്ദേഹത്തിന്റെ കരിയറിൽ 300-ലധികം സിനിമകളുണ്ട്, അവയിൽ പലതും ഇന്ന് ക്ലാസിക്കുകളായി കണക്കാക്കപ്പെടുന്നു.
കൾട്ട് ക്ലാസിക് ഷോലെയിലെ വീരു, ഫൂൽ ഔർ പത്തർ, സീത ഔർ ഗീത, ചുപ്കെ ചുപ്കെ, ധരം വീർ, പ്രതിഗ്യ എന്നിവയിലെ അവിസ്മരണീയ പ്രകടനങ്ങൾ എന്നിവയാണ് അദ്ദേഹത്തിന്റെ ശ്രദ്ധേയ കഥാപാത്രങ്ങൾ. അദ്ദേഹത്തിന്റെ വ്യക്തിപ്രഭാവവും ശക്തമായ സ്ക്രീൻ സാന്നിധ്യവും ലോകമെമ്പാടും ദശലക്ഷക്കണക്കിന് ആരാധകരെ അദ്ദേഹത്തിന് നേടിക്കൊടുത്തു.
