കോൺഗ്രസ്സിന് ലോക്സഭാ തിരഞ്ഞെടുപ്പിൽ 40 സീറ്റിലെങ്കിലും ജയിക്കാൻ കഴിയുമോയെന്ന് പരിഹസിച്ച് തൃണമൂൽ കോൺഗ്രസ് നേതാവും ബംഗാൾ മുഖ്യമന്ത്രിയുമായ മമതാ ബാനർജി. കുറച്ചുദിവസങ്ങൾക്കു മുമ്പ് ദീദി ബംഗാളിൽ ഇന്ത്യാ സഖ്യമില്ലെന്നും 42 സീറ്റിലും ഒറ്റയ്ക്ക് മത്സരിക്കുമെന്നും പ്രഖ്യാപിച്ചിരുന്നു. ഇതിനു പിന്നാലെയാണ് ഇന്ത്യാ സഖ്യത്തിലെ പ്രധാന കക്ഷിയെ പരിഹസിച്ച് മമത രംഗത്തെത്തിയിരിക്കുന്നത്.
മുർഷിദാബാദിൽ ഒരു പൊതുപരിപാടിയിൽ വെച്ചായിരുന്നു.കോൺഗ്രസ്സിന് ശേഷിയുണ്ടെങ്കിൽ ബംഗാളിലല്ല മത്സരിക്കേണ്ടതെന്നും യുപിയിലും രാജസ്ഥാനിലുമാണ് മത്സരിക്കേണ്ടതെന്നും മമത പറഞ്ഞു. ബിജെപിയെയാണ് പരാജയപ്പെടുത്തേണ്ടത്. മുന്നൂറ് സീറ്റിൽ നാൽപ്പത് സീറ്റിലെങ്കിലും ജയിക്കാൻ കോൺഗ്രസ്സിന് സാധിക്കുമോയെന്ന് തനിക്കറിയില്ലെന്നും അവർ പറഞ്ഞു.
ബിജെപി പ്രധാന എതിരാളിയായി വരുന്ന രാജ്യത്തെ 300 സീറ്റുകളിൽ മത്സരിക്കാൻ താൻ കോൺഗ്രസ്സിനോട് ആവശ്യപ്പെട്ടെങ്കിലും അവരതിന് തയ്യാറായില്ലെന്ന് മമത പറഞ്ഞു. ഇപ്പോൾ മുസ്ലിം വോട്ടുകൾ ഭിന്നിപ്പിക്കാനായി ബംഗാളിൽ വന്നിരിക്കുകയാണ്.
സംസ്ഥാനത്തിന് അവകാശപ്പെട്ട വിഹിതം കേന്ദ്രം പിടിച്ചുവെക്കുന്നതിനെതിരായ ധർണയിൽ പങ്കെടുത്ത് സംസാരിക്കുകയായിരുന്നു മമതാ ബാനർജി.അതെസമയം ബംഗാളിൽ കോൺഗ്രസ്സും തൃണമൂലും സീറ്റ് പങ്കിടലിന്റെ കാര്യത്തിൽ പ്രശ്നം തുടരുകയാണ്.
ബംഗാളിലെ പ്രശ്നം പരിഹരിക്കാൻ കഴിയുമെന്ന് രാഹുൽ ഗാന്ധി ഇന്ന് പ്രസ്താവിച്ചിരുന്നു. ഇതിനു പിന്നാലെയാണ് മമതയുടെ പരിഹാസം. രാഹുലിന്റെ ഭാരത് ജോഡോ യാത്ര ബംഗാളിലൂടെ പോയത് സംസ്ഥാനത്തെ ന്യൂനപക്ഷ വോട്ടുകൾ വിഭജിക്കുന്നതിനു വേണ്ടിയാണെന്ന് മമത ആരോപിച്ചു.
