മെക്സിക്കോ: മെക്സിക്കോയിലെ മെലാക്കിൽ ബീച്ചിൽ നീന്തുന്നതിനിടെ യുവതിക്കുനേരെ സ്രാവിൻ്റെ ആക്രമണം. കാലിന് ഗുരുതര പരിക്കേറ്റ യുവതി രക്തസ്രാവത്തെ തുടർന്ന് മരിച്ചു. 26കാരി മരിയ ഫർണാണ്ടസ് മാർട്ടിനെസ് ജിംനിസിനാണ് ദാരുണാന്ത്യം.
മകൾക്കൊപ്പം കടലിൽ നീന്തുന്നതിനിടെയാണ് സ്രാവിൻ്റെ ആക്രമണമുണ്ടായത്. ശനിയാഴ്ചയാണ് സംഭവം. അഞ്ചു വയസ്സുകാരിയായ മകൾക്കൊപ്പം കടലിൽ നീന്തുകയായിരുന്നു യുവതി. ഇതിനിടെ സ്രാവിൻ്റെ ആക്രമണമുണ്ടായതോടെ അപകടം മനസ്സിലാക്കിയ യുവതി മകളെ രക്ഷപ്പെടുത്താൻ ശ്രമം നടത്തി. കുഞ്ഞിനെ വേഗം ഫ്ലോട്ടിങ് പ്രതലത്തിലേക്ക് മാറ്റി.
സ്രാവിൻ്റെ കടിയേറ്റ് യുവതിക്ക് കാൽ നഷ്ടപ്പെട്ടു. യുവതിയെ രക്ഷപ്പെടുത്തി കരയ്ക്ക് കയറ്റിയെങ്കിലും രക്തസ്രാവത്തെ തുടർന്ന് മരണം സംഭവിക്കുകയായിരുന്നു. മകൾ പരിക്കുകളോടെ രക്ഷപ്പെട്ടു.സിവിൽ പ്രൊട്ടക്ഷൻ വർക്കേഴ്സിൻ്റെയും ഫയർ ഫോഴ്സിൻ്റെയും നേതൃത്വത്തിലാണ് യുവതിയെ കരയ്ക്കെത്തിച്ചത്. നീന്തൽ പരിപാടിക്ക് സഹായം നൽകുമ്പോഴാണ് വിവരം അറിഞ്ഞതെന്ന് സിവിൽ പ്രൊട്ടക്ഷൻ വർക്കേഴ്സും ഫയർ ഫോഴ്സും പറഞ്ഞു.
സംഭവസ്ഥലത്തേക്ക് എത്തിയപ്പോഴേക്കും യുവതിക്ക് ജീവൻ നഷ്ടപ്പെട്ടിരുന്നുവെന്നും അവർ കൂട്ടിച്ചേർത്തു.സംഭവത്തെ തുടർന്ന് പ്രദേശവാസികളും വിനോദസഞ്ചാരികളും കടലിൽ ഇറങ്ങുന്നത് മുനിസിപ്പൽ അധികൃതർ വിലക്കി. ബീച്ചിൽ നടത്താൻ നിശ്ചയിച്ചിരുന്ന നീന്തൽ മത്സരവും റദ്ദാക്കി. ബീച്ച് ഇനിയൊരു അറിയിപ്പ് ഉണ്ടാകുന്നതുവരെ അടച്ചു. ജനങ്ങളുടെ സുരക്ഷ കണക്കിലെടുത്താണ് തീരുമാനമെന്ന് മുനിസിപ്പൽ അധികൃതർ അറിയിച്ചു.
