2023 ലെ കാർട്ടൂണിസ്റ്റ് കെ എസ് പിള്ള അവാർഡ് കെ. ഉണ്ണികൃഷ്ണന്. തന്റെ ഗുരുനാഥനായ കെ എസ് പിള്ളയുടെ സ്മരണയ്ക്ക് ഫ്രീലാൻസ് കാർട്ടൂണിസ്റ്റുകൾക്കായി കാർട്ടൂണിസ്റ്റ് സുകുമാർ ഏർപ്പെടുത്തിയതാണ് അവാർഡ്. 10,000 രൂപയും പ്രശസ്തി പത്രവും അടങ്ങിയതാണ് അവാർഡ്.
ഇത്തവണത്തെ അവാർഡിന്റെ കാര്യങ്ങൾ തീരുമാനിച്ച് ഉറച്ചിപ്പിച്ചിരിക്കെയായിരുന്നു സുകുമാറിന്റെ വിയോഗമെന്ന് മകൾ സുമ പറഞ്ഞു. മാതൃഭൂമി കൊച്ചി യൂണിറ്റിൽ ചീഫ് റിപ്പോർട്ടറായ കെ. ഉണ്ണികൃഷ്ണൻ ദീർഘകാലമായി മാതൃഭൂമി പത്രത്തിലും ഓൺലൈനിലും കാർട്ടൂണുകൾ വരയ്ക്കുന്നുണ്ട്.
2021 ലെ സംസ്ഥാന മാധ്യമ അവാർഡ്, ലളിതകലാ അക്കാദമിയുടെ കഴിഞ്ഞ വർഷത്തെ സംസ്ഥാന കാർട്ടൂൺ അവാർഡ് എന്നിവ ഉൾപ്പെടെയുള്ള പുരസ്‌കാരങ്ങൾ ലഭിച്ചിട്ടുണ്ട്.
ഒക്ടോബർ 22ന് തൃക്കാക്കര പാലച്ചുവട് എൻഎസ്എസ് കരയോഗം ഹാളിൽ കേരള കാർട്ടൂൺ അക്കാദമിയുടെ ആഭിമുഖ്യത്തിൽ നടക്കുന്ന സുകുമാർ അനുസ്മരണത്തിൽ അവാർഡ് സമ്മാനിക്കും. മന്ത്രി പി. രാജീവ്, പ്രതിപക്ഷ നേതാവ് വി. ഡി. സതീശൻ , ബിജെപി സംസ്ഥാന വൈസ് പ്രസിഡൻറ് ഡോ.കെ. എസ് രാധാകൃഷ്ണൻ തുടങ്ങിയവർ ചടങ്ങിൽ പങ്കെടുക്കും.
