ഭാരതത്തില്‍ പലയിടത്തും വള്ളംകളി മത്സരം നിലവിലുണ്ട്. എങ്കിലും ഏറ്റവും പ്രസിദ്ധം കേരളത്തിലെ വള്ളംകളിയാണ്. വഞ്ചിപ്പാട്ട് എന്ന സാഹിത്യ ശാഖ മലയാളത്തിനു മാത്രം സ്വന്തം. കേരളത്തിന്റെ തനത് ജലോത്സവമായ വള്ളംകളി സമൃദ്ധിയുടെ ഉത്സവമായ ഓണക്കാലത്താണ് സാധാരണയായി നടത്തിവരുന്നത്. ആറന്മുള ഉതൃട്ടാതി വള്ളംകളി, പായിപ്പാട് ജലോത്സവം, നീരേറ്റുപുറം പമ്പാ ജലോത്സവം, ചങ്ങനാശ്ശേരി ജലോത്സവം എന്നിങ്ങനെയുള്ള ജലമേളകള്‍ ഓണനാളുകളിലാണ് സംഘടിപ്പിച്ചു പോരുന്നത്. വള്ളംകളി മത്സരം അഥവാ ജലോത്സവം എങ്ങനെ ഉത്ഭവിച്ചു എന്നു നമുക്ക് നോക്കാം.
കേരളം വര്‍ഷങ്ങള്‍ക്കുമുന്‍പ് ചെറു ചെറു നാട്ടുരാജ്യങ്ങളായി വിഭജിക്കപ്പെട്ടിരുന്നു. ഇവിടുത്തെ നാട്ടു രാജാക്കന്‍മാര്‍ തമ്മിലുള്ള പോര് നിത്യ സംഭവം എന്നതിലുപരി വിശ്വപ്രസിദ്ധവുമായിരുന്നു. ഇക്കാരണത്താലാണല്ലോ വൈദേശിക ശക്തികള്‍ക്ക് നമുക്ക് മേല്‍ വിയര്‍പ്പൊഴുക്കാതെ മേധാവിത്വം സ്ഥാപിക്കാന്‍ കഴിഞ്ഞത്.
ഇത്തരം പോരിന് കര സൈന്യം എന്നതുപോലെ പ്രധാനമായിരുന്നു നാവിക സൈന്യവും. നാവിക സൈന്യത്തെ വള്ളപ്പട എന്ന പേരിലാണ് അറിയപ്പെട്ടത്. വള്ളപ്പടയിലുള്ളവര്‍ക്ക് ഉശിരും ഉത്സാഹവും വര്‍ദ്ധിപ്പിച്ചെടുക്കേണ്ടത് യുദ്ധ തന്ത്രത്തിന്റെ ആവശ്യമായിരുന്നു. ശത്രുവിനെ എളുപ്പത്തില്‍ കീഴടക്കാനുള്ള മാര്‍ഗം കായല്‍ വഴിയുള്ള ആക്രമണമാണെന്ന് യുദ്ധ തന്ത്രജ്ഞരായ പടത്തലവന്‍മാര്‍ കണ്ടു പിടിച്ചു. പടകളുടെ ആവേശം വര്‍ദ്ധിപ്പിക്കുന്നതിനായി ഓരോ നാട്ടുരാജാവും തോണി തുഴയല്‍ മത്സരം നടത്തിപ്പോന്നിരുന്നു.
പലപ്പോഴും ഏതെങ്കിലും ക്ഷേത്രങ്ങളുടെ പ്രതിഷ്ഠാവാര്‍ഷികവുമായി ബന്ധപ്പെട്ടായിരുന്നു ഇത്തരം മത്സരങ്ങള്‍ സംഘടിപ്പിച്ചിരുന്നത്. എങ്കിലും, ഇന്ന് നിലവിലിരിക്കുന്ന ഓരോ വള്ളംകളിയുമായി ബന്ധപ്പെട്ടും വ്യത്യസ്തമായ ഐതിഹ്യങ്ങള്‍ നില നില്‍ക്കുന്നുണ്ട്.നാട്ടു രാജ്യങ്ങളും നാവികപ്പടയും എല്ലാം പോയി മറഞ്ഞെങ്കിലും ജലോത്സവങ്ങള്‍ ഓരോ കൊല്ലവും പൂര്‍വ്വാധികം ആവേശത്തോടെ വര്‍ണ്ണാഭമായി തിളങ്ങി നില്‍ക്കുന്നു എന്ന കാര്യത്തില്‍ നമുക്ക് തീർച്ചയായും അഭിമാനിക്കാം.
