സിജെപിക്കെതിരെ കോൺഗ്രസ്; രാഷ്ട്രീയ തർക്കം രൂക്ഷമാകുന്നു
പരീക്ഷാ ക്രമക്കേടുകൾക്കും മുഖ്യ തിരഞ്ഞെടുപ്പ് കമ്മീഷണർക്കുമെതിരായ സമരങ്ങളെച്ചൊല്ലിയാണ് കോൺഗ്രസും കോക്ക്റോച്ച് ജനത പാർട്ടിയും (സിജെപി) തമ്മിലുള്ള രാഷ്ട്രീയ തർക്കം രൂക്ഷമായത്.
ഇന്ത്യയെയും ഭരണഘടനയെയും സംരക്ഷിക്കാനുള്ള കുത്തക തങ്ങൾക്ക് മാത്രമാണെന്ന് ബിജെപിയെ കൂടാതെ ചില രാഷ്ട്രീയ പാർട്ടികളിൽപ്പെട്ടവരും വിശ്വസിക്കുന്നതായി സിജെപി നേതാവ് സൗരവ് ദാസ് എക്സിൽ കുറിച്ചു. കോൺഗ്രസിന്റെ പേര് നേരിട്ട് പരാമർശിക്കാതെയായിരുന്നു വിമർശനം.
ഇത്തരക്കാരെ “സ്വയം പ്രഖ്യാപിത ലിബറലുകളും കോമാളികളുമെന്നാണ്” സൗരവ് ദാസ് വിശേഷിപ്പിച്ചത്. ചില സാഹചര്യങ്ങളിൽ ഭരണകക്ഷിയായ ബിജെപിയേക്കാൾ മോശമായാണ് ഈ ഇക്കോസിസ്റ്റം പെരുമാറുന്നതെന്നും അദ്ദേഹം ആരോപിച്ചു. ജനങ്ങളെ വിഭജിച്ച് ഭരിക്കാൻ ശ്രമിക്കാതെ വായടച്ച് യുവതലമുറയെ പിന്തുണയ്ക്കണമെന്നും സിജെപി ആവശ്യപ്പെട്ടു.
സിജെപി സഹ-കൺവീനർ അശുതോഷ് റങ്കയും സമാനമായ രീതിയിൽ ഈ ലിബറൽ ഇക്കോസിസ്റ്റത്തിനെതിരെ രംഗത്തെത്തി.
ഇതിന് മറുപടിയുമായി അസം കോൺഗ്രസ് വക്താവ് റീതം സിങ് രംഗത്തെത്തി. മുഖ്യധാര രാഷ്ട്രീയ പാർട്ടികളുടെ ജനകീയ സമരങ്ങളെ ഹൈജാക്ക് ചെയ്യുന്ന ആം ആദ്മി പാർട്ടിയുടെ (AAP) പുതുരൂപമാണ് സിജെപിയെന്നാണ് അദ്ദേഹത്തിന്റെ ആരോപണം.
അസമിൽ സിജെപി പ്രവർത്തകർ തടങ്കലിലായപ്പോൾ കോൺഗ്രസ് സഹായം വാഗ്ദാനം ചെയ്തിരുന്നുവെന്നും, എന്നാൽ ആം ആദ്മി പാർട്ടി നേതാക്കളുടെയും അരവിന്ദ് കെജ്‌രിവാളിന്റെയും നിർദ്ദേശപ്രകാരമാണ് സിജെപി പ്രവർത്തകർ അത് നിരസിച്ചതെന്നും റീതം സിങ് അവകാശപ്പെട്ടു.
സിജെപി ഒരു ജനകീയ പ്രസ്ഥാനമാണെന്നും, അതിനെ അരവിന്ദ് കെജ്‌രിവാളിന്റെ രാഷ്ട്രീയ പുനഃപ്രവേശനത്തിനായി ദുരുപയോഗം ചെയ്യരുതെന്നും കോൺഗ്രസ് ആവശ്യപ്പെട്ടു.
ഇതിന് പിന്നാലെ സൗരവ് ദാസ് കോൺഗ്രസിനെ വീണ്ടും വിമർശിച്ചു. ലോകം ഒരു പാർട്ടിക്ക് ചുറ്റുമല്ല കറങ്ങുന്നതെന്നായിരുന്നു അദ്ദേഹത്തിന്റെ പ്രതികരണം.
അതേസമയം, ലിബറൽ സമൂഹം എല്ലാ ശബ്ദങ്ങൾക്കും ഇടം നൽകണമെന്നും പ്രസ്ഥാനങ്ങൾ ഒരു വ്യക്തിയെ മാത്രം കേന്ദ്രീകരിച്ചുള്ള ആരാധനയായി മാറരുതെന്നും എഎപി ഡൽഹി അധ്യക്ഷൻ സൗരഭ് ഭരദ്വാജും പ്രതികരിച്ചു.
സിജെപിയും കോൺഗ്രസും തമ്മിലുള്ള ഈ പരസ്യ രാഷ്ട്രീയ തർക്കം പുതിയ രാഷ്ട്രീയ കൂട്ടായ്മകളുടെയും നിലവിലെ പ്രതിപക്ഷ രാഷ്ട്രീയത്തിന്റെയും ബന്ധത്തെക്കുറിച്ചുള്ള ചർച്ചകൾക്കും വഴിയൊരുക്കുകയാണ്.
