ന്യൂഡൽഹി: ദേശീയ മെഡിക്കൽ പ്രവേശന പരീക്ഷയായ നീറ്റ് യു.ജി പുനഃ പരീക്ഷയുടെ പശ്ചാത്തലത്തിൽ ഇന്ത്യയിൽ പ്രമുഖ മെസ്സേജിങ് ആപ്പായ ടെലിഗ്രാമിന് താൽക്കാലിക നിയന്ത്രണം ഏർപ്പെടുത്തി. ദേശീയ പരീക്ഷാ ഏജൻസിയുടെ പ്രത്യേക ശുപാർശയെത്തുടർന്നാണ് കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം ഈ അടിയന്തര ഉത്തരവ് പുറപ്പെടുവിച്ചത്. നീറ്റ് റീ-പരീക്ഷ നടക്കുന്ന ദിവസവും അതിൻ്റെ തൊട്ടടുത്ത ദിവസങ്ങളും ഉൾപ്പെടെ 2026 ജൂൺ 22 വരെയുള്ള നിശ്ചിത കാലയളവിലേക്കാണ് ഇന്ത്യയിൽ ടെലിഗ്രാം പ്ലാറ്റ്ഫോമിലേക്കുള്ള പ്രവേശനം നിയന്ത്രിച്ചിരിക്കുന്നത്.
ഐടി ആക്ട്, 2000-ലെ സെക്ഷൻ 69 A പ്രകാരമുള്ള നിർദ്ദേശമാണ് കേന്ദ്ര മന്ത്രാലയം ഇതിനായി നൽകിയിരിക്കുന്നത്. പരീക്ഷകൾക്ക് ശേഷം വ്യാജമായ തെളിവുകൾ ഉണ്ടാക്കുന്നത് തടയാൻ കടുത്ത നിയന്ത്രണങ്ങളാണ് ഏർപ്പെടുത്തിയിരിക്കുന്നത്. ടെലിഗ്രാമിൽ ഇതിനകം പോസ്റ്റ് ചെയ്ത സന്ദേശങ്ങൾ എഡിറ്റ് ചെയ്യാനുള്ള ഫീച്ചർ 2026 ജൂൺ 30 വരെ ഇന്ത്യയിൽ പ്രവർത്തനരഹിതമാക്കാൻ നിർദ്ദേശിച്ചിട്ടുണ്ട്. പരീക്ഷ കഴിഞ്ഞതിന് ശേഷം പഴയ തീയതികളിലെ സന്ദേശങ്ങൾ എഡിറ്റ് ചെയ്ത് “ചോദ്യപേപ്പർ നേരത്തെ ചോർന്നു” എന്ന രീതിയിൽ വ്യാജ തെളിവുകൾ നിർമ്മിക്കാൻ ടെലിഗ്രാമിൻ്റെ ഈ ഫീച്ചർ ദുരുപയോഗം ചെയ്യുന്നത് തടയാനാണ് ഈ നടപടി. ദേശീയ തലത്തിൽ നടക്കുന്ന പരീക്ഷകളുടെ സുതാര്യതയും സുരക്ഷിതത്വവും ഉറപ്പാക്കാൻ വേണ്ടിയാണ് ഇത്തരമൊരു താൽക്കാലിക നിയന്ത്രണമെന്ന് ദേശീയ പരീക്ഷാ ഏജൻസി വ്യക്തമാക്കുന്നു.
“നീറ്റ് യു.ജി റീ-പരീക്ഷ നടക്കുന്ന ദിവസവും അതിൻ്റെ തൊട്ടടുത്ത ദിവസങ്ങളും ഉൾപ്പെടെ, 2026 ജൂൺ 22-ന് അവസാനിക്കുന്ന ഒരു നിശ്ചിതവും പരിമിതവുമായ കാലയളവിലേക്ക് ഇന്ത്യയിൽ ടെലഗ്രാം ഉപയോഗം നിയന്ത്രിച്ചുകൊണ്ട് ഇൻഫർമേഷൻ ടെക്നോളജി ആക്ട്, 2000-ലെ സെക്ഷൻ 69 എ പ്രകാരം ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം ഒരു നിർദ്ദേശം പുറപ്പെടുവിച്ചിട്ടുണ്ട്. ദേശീയ തലത്തിൽ നടക്കുന്ന പരീക്ഷകളുടെ ചോദ്യപേപ്പർ ചോർന്നു എന്ന് കാണിക്കാൻ, പരീക്ഷയ്ക്ക് ശേഷം വ്യാജ തെളിവുകൾ നിർമ്മിക്കാൻ ടെലഗ്രാമിൻ്റെ പ്രത്യേക ഫീച്ചറുകൾ ഉപയോഗിക്കുന്നുണ്ട്. ഈ പ്രശ്നം പരിഹരിക്കുന്നതിനായി, ടെലഗ്രാമിൽ ഇതിനകം പോസ്റ്റ് ചെയ്ത സന്ദേശങ്ങൾ എഡിറ്റ് ചെയ്യാനുള്ള ഫീച്ചർ 2026 ജൂൺ 30 വരെയുള്ള ഒരു നിശ്ചിത കാലയളവിലേക്ക് ഇന്ത്യയിൽ പ്രവർത്തനരഹിതമാക്കാനും പ്ലാറ്റ്ഫോമിനോട് നിർദ്ദേശിച്ചിട്ടുണ്ട്.” മന്ത്രാലയം അറിയിച്ചു.
