ന്യൂഡൽഹി: മുഖ്യമന്ത്രി വിഡി സതീശനും പ്രധാനമന്ത്രി നരേന്ദ്ര മോദിയും തമ്മിലുള്ള കൂടിക്കാഴ്ച ഈ മാസം 26ന് നടക്കും. മുഖ്യമന്ത്രിയായി ചുമതലയേറ്റ ശേഷം ആദ്യമായി ഡൽഹിയിലെത്തിയ വിഡി സതീശൻ കോൺഗ്രസ് ദേശീയ നേതൃത്വവുമായി വിശദമായ ആശയവിനിമയം നടത്തുകയാണ്.
മല്ലികാർജുന ഖാർഗെയെ വിഡി സതീശൻ നേരിട്ട് കണ്ടു. രാവിലെ പാർട്ടി ജനറൽ സെക്രട്ടറി കെ സി വേണുഗോപാലിനെ സന്ദർശിച്ച അദ്ദേഹം കോൺഗ്രസ് അധ്യക്ഷൻ , രാഹുൽ ഗാന്ധി, പ്രിയങ്ക ഗാന്ധി, സോണിയ ഗാന്ധി എന്നിവരെയും അവരുടെ വസതികളിലെത്തി സന്ദർശിക്കും. നിയമസഭ തെരഞ്ഞെടുപ്പിലെ വലിയ വിജയത്തിന് ശേഷം മുഖ്യമന്ത്രി സ്ഥാനത്തെ ചൊല്ലിയുണ്ടായ അനിശ്ചിതത്വങ്ങൾക്കും അന്തിമ തീരുമാനങ്ങൾക്കും ശേഷമാണ് സതീശൻ്റെ പ്രഥമ ഡൽഹി യാത്ര.
മാരത്തൺ ചർച്ചകൾക്കൊടുവിൽ
നിയമസഭ തെരഞ്ഞെടുപ്പിൽ മികച്ച ഭൂരിപക്ഷത്തോടെയാണ് കോൺഗ്രസും യുഡിഎഫും ഇത്തവണ അധികാരത്തിലെത്തിയത്. എന്നാൽ മുഖ്യമന്ത്രി ആരെന്ന കാര്യത്തിൽ കടുത്ത അനിശ്ചിതത്വമാണ് പാർട്ടിയിൽ നിലനിന്നിരുന്നത്. വിഡി സതീശൻ, രമേശ് ചെന്നിത്തല, കെ സി വേണുഗോപാൽ എന്നിവരുടെ പേരുകൾ പരിഗണിക്കപ്പെട്ടതോടെ വേണുഗോപാൽ മുഖ്യമന്ത്രിയാകുമെന്ന തരത്തിൽ അഭ്യൂഹങ്ങൾ ശക്തമായി. പല എംഎൽഎമാരുടെയും പിന്തുണ വേണുഗോപാലിനാണെന്ന് വാർത്തകളുണ്ടായി.
എന്നാൽ ഇതിനിടെ സംസ്ഥാനത്തുടനീളം സാധാരണ പ്രവർത്തകരും പ്രാദേശിക നേതാക്കളും സതീശന് വേണ്ടി രംഗത്തിറങ്ങി. ഒടുവിൽ ദേശീയ നേതൃത്വം നടത്തിയ മാരത്തൺ ചർച്ചകൾക്കും കൂടിയാലോചനകൾക്കും ശേഷമാണ് അണികളുടെ വികാരം ഉൾക്കൊണ്ട് വിഡി സതീശനെ മുഖ്യമന്ത്രിയായി ഹൈക്കമാൻഡ് പ്രഖ്യാപിച്ചത്. വലിയ തർക്കങ്ങൾക്ക് ഒടുവിലാണ് പുതിയ സർക്കാർ ചുമതലയേറ്റത്. ഭാവി പദ്ധതികൾക്ക് ഈ യാത്ര മുതൽക്കൂട്ടാകും. കേരളത്തിൻ്റെ രാഷ്ട്രീയ ചരിത്രത്തിൽ കോൺഗ്രസ് നേടിയ വലിയ വിജയങ്ങളിലൊന്നാണിത്. അതിനാൽ സർക്കാരിന് ലഭിച്ച പിന്തുണയ്ക്ക് കേന്ദ്ര നേതൃത്വത്തിന് അദ്ദേഹം നേരിട്ട് നന്ദി അറിയിക്കും.
നേതൃമാറ്റം ഉടനില്ല
നിയമസഭ തെരഞ്ഞെടുപ്പിൽ കെപിസിസി അധ്യക്ഷൻ സണ്ണി ജോസഫ് ഉൾപ്പെടെയുള്ള ഭാരവാഹികൾ വിജയിച്ച് മന്ത്രിമാരായതോടെ സംസ്ഥാന കോൺഗ്രസിൽ നേതൃമാറ്റത്തിനായുള്ള ചർച്ചകളും സജീവമാണ്. പുതിയ കെപിസിസി അധ്യക്ഷനെ അടിയന്തരമായി കണ്ടെത്തേണ്ടതുണ്ടെങ്കിലും മുഖ്യമന്ത്രിയുടെ പ്രഥമ ഡൽഹി സന്ദർശനമായതിനാൽ ഇക്കാര്യത്തിൽ വിശദമായ ചർച്ചകൾക്ക് സാധ്യതയില്ല.
പാർട്ടിക്കുള്ളിൽ ഔദ്യോഗികമായി തീരുമാനങ്ങൾ ആരംഭിച്ചിട്ടില്ല. എങ്കിലും അഞ്ച് പ്രമുഖ നേതാക്കൾ അധ്യക്ഷ സ്ഥാനത്തിനായി ഇതിനകം ശക്തമായ അവകാശവാദം ഉന്നയിച്ചിട്ടുണ്ട്. ബെന്നി ബെഹനാൻ, കൊടിക്കുന്നിൽ സുരേഷ്, ഷാഫി പറമ്പിൽ, ജോസഫ് വാഴയ്ക്കൻ, വിഎസ് ശിവകുമാർ എന്നിവരാണ് സ്ഥാനത്തിനായി നിലവിൽ രംഗത്തുള്ളത്. നിലവിലെ വർക്കിങ് പ്രസിഡൻ്റുമാരും വിവിധ മുതിർന്ന നേതാക്കളും തങ്ങളുടെ വ്യക്തിപരമായ താത്പര്യം നേതൃത്വത്തെ ഇതിനകം അറിയിച്ചിട്ടുണ്ട്. വരും ദിവസങ്ങളിൽ ഇക്കാര്യത്തിൽ കൃത്യമായ തീരുമാനമുണ്ടാകും.
പ്രധാനമന്ത്രിയുമായി കൂടിക്കാഴ്ച
ഡൽഹി സന്ദർശനത്തിലെ പ്രധാന അജൻഡ പ്രധാനമന്ത്രി നരേന്ദ്ര മോദിയുമായുള്ള കൂടിക്കാഴ്ചയാണ്. വരുന്ന 26ന് നടക്കുന്ന യോഗത്തിൽ സംസ്ഥാനത്തിൻ്റെ സാമ്പത്തിക പ്രതിസന്ധിയും കേന്ദ്ര സഹായങ്ങളും പ്രധാന ചർച്ചയാകും. കേരളത്തിൻ്റെ അടിസ്ഥാന സൗകര്യ വികസന പദ്ധതികൾ സമയബന്ധിതമായി പൂർത്തിയാക്കാൻ കേന്ദ്ര സർക്കാരിൻ്റെ ഇടപെടൽ മുഖ്യമന്ത്രി നേരിട്ട് ആവശ്യപ്പെടും. സംസ്ഥാനത്തിന് ലഭിക്കാനുള്ള കുടിശിക വേഗത്തിൽ നൽകണമെന്ന ആവശ്യവും അദ്ദേഹം ഉന്നയിക്കും. കേവലം രാഷ്ട്രീയ സന്ദർശനം എന്നതിലുപരി കേരളത്തിൻ്റെ ഭാവി വികസനത്തിന് അടിത്തറ പാകുക കൂടിയാണ് ലക്ഷ്യമെന്ന് അദ്ദേഹം നേരത്തെ വ്യക്തമാക്കിയിരുന്നു.
