കോട്ടയം: ഇടതു മുന്നണി പ്രവേശനത്തിന് എതിരെ കേരള കോണ്‍ഗ്രസ് ജോസ് കെ. മാണി വിഭാഗത്തില്‍ എതിര്‍പ്പ് ശക്തമാകുന്നു. ജോസ് കെ. മാണിയുടെ പുതിയ നീക്കത്തില്‍ പ്രതിഷേധിച്ച്‌ മുതിര്‍ന്ന നേതാവ് ജോസഫ് എം. പുതുശേരി പാര്‍ട്ടി വിടുന്നു. പി.ജെ ജോസഫ് വിഭാഗത്തിലേക്ക് പോകാനാണ് പുതുശേരിയുടെ തീരുമാനമെന്നാണ് മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഇതിന് മുന്നോടിയായി പി.ജെ. ജോസഫുമായി പുതുശേരി ചര്‍ച്ച നടത്തി. വൈകാതെ വാര്‍ത്താസമ്മേളനം നടത്തി രാജി പ്രഖ്യാപിക്കുമെന്നാണ് വിവരം.
ജോസ് കെ. മാണിയുടെ ഇടത് മുന്നണി പ്രവേശത്തിലുള്ള എതിര്‍പ്പിനെ തുടര്‍ന്നാണ് പാര്‍ട്ടി വിടുന്നതെന്നാണ് ജോസഫ് എം. പുതുശേരി വ്യക്തമാക്കുന്നത്.എല്‍.ഡി.എഫിലേക്ക് പോകാനുള്ള ജോസ് കെ. മാണിയുടെ നീക്കങ്ങളില്‍ പുതുശേരി അതൃപ്തനായിരുന്നു. പാര്‍ട്ടിയുടെ ഉന്നതാധികാര സമിതി അടക്കമുള്ള ഫോറങ്ങളില്‍ ഇടത് പ്രവേശനത്തിനുള്ള എതിര്‍പ്പ് അദ്ദേഹം വ്യക്തമാക്കിയിരുന്നു.
യു.ഡി.എഫ് ബന്ധം വിച്ഛേദിച്ച ശേഷം കേരള കോണ്‍ഗ്രസില്‍ നിന്ന് പുറത്തു വരുന്ന ആദ്യ നേതാവാണ് പാര്‍ട്ടി ഉന്നതാധികാര സമിതിയംഗമായ ജോസഫ് എം. പുതുശേരി. മൂന്നുതവണ (1991, 2001, 2006) കല്ലൂപ്പാറ സീറ്റില്‍ നിന്ന് എം.എല്‍.എയായ പുതുശേരി, കഴിഞ്ഞ തെരഞ്ഞെടുപ്പില്‍ തിരുവല്ല സീറ്റില്‍ മാത്യു ടി. തോമസിനോട് പരാജയപ്പെട്ടിരുന്നു.
