പശ്ചിമേഷ്യയിലെ യുദ്ധസാഹചര്യത്തിലും രാജ്യത്തെ പാചകവാതക വിതരണത്തിലും മോദി സർക്കാരിനെതിരെ രാഹുൽ ഗാന്ധി സ്വീകരിക്കുന്ന നിലപാടുകളെ തള്ളി കോൺഗ്രസിലെ മുതിർന്ന നേതാക്കൾ രംഗത്ത്. ഓപ്പറേഷൻ സിന്ദൂറിന് പിന്നാലെ ഇറാൻ യുദ്ധത്തിലും ഇന്ധന വിതരണത്തിലും പാർട്ടിക്ക് ഉള്ളിൽ ഭിന്നത രൂക്ഷമാണെന്നാണ് സൂചന.
കമൽനാഥ്, ആനന്ദ് ശർമ്മ, ശശി തരൂർ, മനീഷ് തിവാരി തുടങ്ങിയ പ്രമുഖ നേതാക്കളാണ് രാഹുൽ ഗാന്ധിയുടെ അഭിപ്രായങ്ങളിൽ നിന്ന് വ്യത്യസ്തമായി സർക്കാരിന്റെ നീക്കങ്ങളെ പിന്തുണച്ച് രംഗത്തെത്തിയത്.ലോക്സഭയിലെ പ്രതിപക്ഷ നേതാവായ രാഹുൽ ഗാന്ധി യുഎസ്-ഇസ്രായേൽ-ഇറാൻ യുദ്ധത്തിൽ കേന്ദ്രത്തിന്റെ നയതന്ത്ര നിലപാടുകളെ രൂക്ഷമായി വിമർശിച്ചിരുന്നു. എന്നാൽ തരൂർ ഉൾപ്പെടെയുള്ള നേതാക്കൾ സർക്കാരിന്റെ സമീപനത്തെ പ്രശംസിക്കുകയാണ് ചെയ്തത്. മോദി സർക്കാരിന്റെ വിദേശനയം ‘അപകടകരമായ വിട്ടുവീഴ്ച’യാണെന്ന് രാഹുൽ വിശേഷിപ്പിച്ചപ്പോൾ, ശശി തരൂർ അതിനെ ‘ഉത്തരവാദിത്തമുള്ള ഭരണതന്ത്രജ്ഞത’ (Responsible statecraft) എന്നാണ് വിളിച്ചത്.
ഇറാൻ വിഷയത്തിലെ ഭിന്നത
ഇറാൻ പരമോന്നത നേതാവ് ആയത്തുള്ള അലി ഖമേനിയുടെ വധത്തെ ഇന്ത്യ അപലപിക്കണമെന്ന് രാഹുൽ ഗാന്ധി ആവശ്യപ്പെട്ടിരുന്നു. എന്നാൽ വിദേശകാര്യ സെക്രട്ടറി വിക്രം മിസ്രി ഇറാൻ എംബസിയിലെത്തി അനുശോചനം രേഖപ്പെടുത്തിയതിനെ മനീഷ് തിവാരി പിന്തുണച്ചു.
സർക്കാർ ശരിയായ കാര്യമാണ് ചെയ്യുന്നതെന്നായിരുന്നു തിവാരിയുടെ പ്രതികരണം. മുൻ കേന്ദ്രമന്ത്രി ആനന്ദ് ശർമ്മയും മുൻ മധ്യപ്രദേശ് മുഖ്യമന്ത്രി കമൽനാഥും സർക്കാരിന്റെ നയതന്ത്ര നീക്കങ്ങളെ പ്രശംസിച്ചു. പശ്ചിമേഷ്യൻ പ്രതിസന്ധിയിലെ ഇന്ത്യയുടെ ഇടപെടൽ പക്വവും നൈപുണ്യമുള്ളതുമാണെന്ന് ആനന്ദ് ശർമ്മ എക്സ് (ട്വിറ്റർ) പ്ലാറ്റ്ഫോമിൽ കുറിച്ചു.
എൽപിജി പ്രതിസന്ധിയിൽ കമൽനാഥ്
രാജ്യത്ത് പാചകവാതക ക്ഷാമമുണ്ടെന്ന് കോൺഗ്രസ് ഹൈക്കമാൻഡ് ആവർത്തിക്കുമ്പോഴാണ് അത് തള്ളി കമൽനാഥ് രംഗത്തെത്തിയത്. “രാജ്യത്ത് നിലവിൽ പാചകവാതക ക്ഷാമമില്ല. അത്തരമൊരു അന്തരീക്ഷം മനപ്പൂർവ്വം സൃഷ്ടിക്കപ്പെടുകയാണ്,” എന്നായിരുന്നു കമൽനാഥിന്റെ പ്രസ്താവന.
ഇത് കോൺഗ്രസിനെ ആക്രമിക്കാൻ ബിജെപി ആയുധമാക്കി. സ്വന്തം നേതാക്കൾ തന്നെ പാർട്ടിയുടെ നുണകൾ തുറന്നുകാട്ടുകയാണെന്ന് കേന്ദ്രമന്ത്രി ജ്യോതിരാദിത്യ സിന്ധ്യ പരിഹസിച്ചു. ജനങ്ങൾക്കിടയിൽ ഭീതി പടർത്തുന്നത് കോൺഗ്രസ് നിർത്തണമെന്നും അദ്ദേഹം ആവശ്യപ്പെട്ടു.
ആവർത്തിക്കുന്ന ഭിന്നത: ഓപ്പറേഷൻ സിന്ദൂർ മുതൽ
കോൺഗ്രസിനുള്ളിലെ ഈ ഭിന്നത പുതിയതല്ല. 2025 മെയ് മാസത്തിൽ പാകിസ്താൻ കേന്ദ്രീകൃതമായ ഭീകരവാദ താവളങ്ങൾ തകർക്കാൻ ഇന്ത്യ ‘ഓപ്പറേഷൻ സിന്ദൂർ’ നടത്തിയപ്പോഴും രാഹുൽ ഗാന്ധിയെ തള്ളി തരൂരും തിവാരിയും രംഗത്തെത്തിയിരുന്നു.
രാഹുൽ ഗാന്ധി സൈനിക നീക്കത്തിന്റെ രാഷ്ട്രീയ ഇച്ഛാശക്തിയെ ചോദ്യം ചെയ്തപ്പോൾ, തരൂർ രാജ്യതാത്പര്യത്തിന് മുൻഗണന നൽകി സർക്കാരിനെ പിന്തുണച്ചു. ഇതിന്റെ ഫലമായി ഓപ്പറേഷൻ സിന്ദൂറിനെക്കുറിച്ചുള്ള പാർലമെന്ററി ചർച്ചയിൽ സംസാരിക്കാൻ തരൂരിനും തിവാരിക്കും കോൺഗ്രസ് അവസരം നൽകിയിരുന്നില്ല.
മുതിർന്ന നേതാക്കളുടെ നിലപാട്
ഇന്ത്യയുടെ വിദേശനയം ദേശീയ സമവായത്തിലായിരിക്കണം അധിഷ്ഠിതമെന്ന് ആനന്ദ് ശർമ്മ ചൂണ്ടിക്കാട്ടി. പേർഷ്യയുമായുള്ള ചരിത്രപരമായ ബന്ധവും ഊർജ്ജ പ്രതിസന്ധിയും കണക്കിലെടുത്ത് പക്വമായ പ്രതികരണമാണ് വേണ്ടതെന്ന് അദ്ദേഹം പറഞ്ഞു. രാഷ്ട്രീയ നേട്ടങ്ങൾക്കായി പാചകവാതക വിഷയത്തിൽ പരിഭ്രാന്തി പരത്തുന്നത് ശരിയല്ലെന്ന് കമൽനാഥും വ്യക്തമാക്കി. മുതിർന്ന നേതാക്കൾ പരസ്യമായി രാഹുൽ ഗാന്ധിയുടെ നിലപാടുകളെ തള്ളുന്നത് കോൺഗ്രസ് നേതൃത്വത്തിന് വലിയ തലവേദനയായിരിക്കുകയാണ്.
