ബജറ്റ് അവതരണം എത്തുമ്പോൾ വില കൂടുന്നുവ എന്തെന്നും വില കുറയുന്നവ എന്തെന്നും എന്നതാണ് സാധാരണക്കാർ കൂടുതലും നോക്കുന്നത്. സാധാരണക്കാരന് എന്തൊക്കെ പ്രതീക്ഷിക്കാം എന്നറിയാം
ന്യൂഡൽഹി: വീണ്ടുമൊരു കേന്ദ്ര ബജറ്റ് അവതരണത്തിന് ധനമന്ത്രി നിർമല സീതാരാമൻ ഒരുങ്ങുമ്പോൾ സാധാരണക്കാരന് വേണ്ടി എന്തെല്ലാം പ്രഖ്യാപനങ്ങളുണ്ടാകുമെന്ന് ഉറ്റുനോക്കുകയാണ് രാജ്യം. പതിവിന് വിപരീതമായി ഇത്തവണ ഒരു ഞായറാഴ്ചയാണ് (ഫെബ്രുവരി 1) കേന്ദ്ര ധനമന്ത്രി നിർമല സീതാരാമൻ ബജറ്റ് അവതരിപ്പിക്കുന്നത്. മൂന്നാം മോദി സർക്കാരിൻ്റെ രണ്ടാമത്തെ പൂർണ്ണ ബജറ്റാണിത്. ഒപ്പം, തുടർച്ചയായി 9 ബജറ്റുകൾ അവതരിപ്പിക്കുന്ന ധനമന്ത്രി എന്ന റെക്കോഡിലേക്കും നിർമല സീതാരാമൻ എത്തുകയാണ്.
കേരളം ഉൾപ്പെടെയുള്ള വിവിധ സംസ്ഥാനങ്ങൾ ധനമന്ത്രിയ്ക്ക് മുന്നിൽ നിരവധി ആവശ്യങ്ങൾ ഇതിനോടകം ഉന്നയിച്ചിട്ടുണ്ട്. എന്നാൽ ബജറ്റ് ദിവസം അടുക്കുമ്പോൾ സാധാരണക്കാരൻ്റെ മനസ്സിലുള്ളത് ഒരേയൊരു ചോദ്യമാണ് ‘ഈ ബജറ്റ് കഴിയുമ്പോൾ എൻ്റെ കൈയിലെ കാശ് കൂടുമോ അതോ കുറയുമോ എന്ന്. ഇത്തവണത്തെ ബജറ്റിൽ നിന്ന് സാധാരണക്കാരന് പ്രതീക്ഷിക്കാവുന്ന 4 പ്രധാന കാര്യങ്ങൾ നോക്കാം.
ആദായ നികുതിയിൽ വലിയ ഇളവ് പ്രതീക്ഷിക്കാമോ?
കഴിഞ്ഞ വർഷത്തെ (2025) ബജറ്റിൽ നികുതി സ്ലാബുകളിൽ വലിയ മാറ്റങ്ങൾ വരുത്തിയിരുന്നത് കൊണ്ട്, ഇത്തവണ വൻ പ്രഖ്യാപനങ്ങൾ ഉണ്ടാകാൻ സാധ്യതയില്ല എന്നാണ് സാമ്പത്തിക വിദഗ്ധർ വിലയിരുത്തുന്നത്. എങ്കിലും, ശമ്പളക്കാർക്ക് ആശ്വാസകരമായ വാർത്തയുണ്ടായേക്കാം. നിലവിൽ 75,000 രൂപയായ സ്റ്റാൻഡേർഡ് ഡിഡക്ഷൻ 1 ലക്ഷം രൂപയായി ഉയർത്താൻ സാധ്യതയുണ്ടെന്ന് റിപ്പോർട്ടുകൾ സൂചിപ്പിക്കുന്നു. ഇത് നടപ്പായാൽ ശമ്പളക്കാരുടെ നികുതി ബാധ്യത കുറയും. പുതിയ നികുതി സമ്പ്രദായം കൂടുതൽ ആകർഷകമാക്കാൻ ഭവനവായ്പയുടെ പലിശയിന്മേലുള്ള ഇളവുകൾ ഇതിൽ ഉൾപ്പെടുത്തുമോ എന്നും ഉറ്റുനോക്കപ്പെടുന്നുണ്ട്.
കർഷകർക്ക് സന്തോഷവാർത്ത? (പിഎം കിസാൻ)
കർഷകരെ സംബന്ധിച്ചിടത്തോളം ഈ ബജറ്റ് നിർണ്ണായകമാണ്. നിലവിൽ പിഎം കിസാൻ സമ്മാൻ നിധി വഴി വർഷം 6,000 രൂപയാണ് കർഷകർക്ക് ലഭിക്കുന്നത്. ഇത് 8,000 രൂപയോ 10,000 രൂപയോ ആയി വർധിപ്പിച്ചേക്കും എന്ന അഭ്യൂഹം ശക്തമാണ്. കാർഷിക മേഖലയിലെ പ്രതിസന്ധികൾ കണക്കിലെടുത്ത് സർക്കാർ ഇതിന് പച്ചക്കൊടി കാണിക്കുമോ എന്ന് ഫെബ്രുവരി 1ന് അറിയാം.
റെയിൽവേ സുരക്ഷയ്ക്ക് മുൻഗണന
യാത്രക്കാരുടെ സുരക്ഷയാണ് ഇത്തവണ റെയിൽവേ ബജറ്റിലെ പ്രധാന അജണ്ട എന്നാണ് ഔദ്യോഗിക വൃത്തങ്ങൾ സൂചിപ്പിക്കുന്നു. പുതിയ ട്രെയിനുകൾ പ്രഖ്യാപിക്കുന്നതിനേക്കാൾ, നിലവിലുള്ള ട്രാക്കുകൾ നവീകരിക്കുന്നതിനും സുരക്ഷാ സംവിധാനങ്ങൾക്കും (കവച് പോലുള്ളവ) കൂടുതൽ പണം വകയിരുത്തിയേക്കും. കൂടുതൽ വന്ദേ ഭാരത് ട്രെയിനുകളും, സാധാരണക്കാർക്കായി അമൃത് ഭാരത് ട്രെയിനുകളും പ്രഖ്യാപിച്ചേക്കാം.
വിലക്കയറ്റം പിടിച്ചുനിർത്തുമോ?
കഴിഞ്ഞ കുറച്ചു മാസങ്ങളായി ചില്ലറ വിപണിയിലെ വിലക്കയറ്റംകുറഞ്ഞുവരുന്നത് സർക്കാരിന് ആശ്വാസമാണ്. എങ്കിലും, പെട്രോൾ-ഡീസൽ വിലയിലോ ജിഎസ്ടി നിരക്കുകളിലോ മാറ്റം വരുത്തി സാധാരണക്കാരന്റെ കുടുംബ ചെലവ് കുറയ്ക്കാൻ സർക്കാർ തയ്യാറാകുമോ എന്നത് കണ്ടറിയണം.
ബജറ്റ് അവതരണം എപ്പോൾ
ഫെബ്രുവരി ഒന്ന് ഞായറാഴ്ച രാവിലെ 11 മണിക്ക് ബജറ്റ് അവതരണം ആരംഭിക്കും. വലിയ പ്രഖ്യാപനങ്ങൾ ഉണ്ടാവില്ല എന്ന് ചില റിപ്പോർട്ടുകൾ പറയുന്നുണ്ടെങ്കിലും, തെരഞ്ഞെടുപ്പുകൾ വരാനിരിക്കുന്ന സാഹചര്യത്തിൽ ജനപ്രിയ പ്രഖ്യാപനങ്ങൾക്കുള്ള സാധ്യത തള്ളിക്കളയാനാവില്ല.
