തമിഴ്നാട്ടിൽ ജനുവരി 14 മുതൽ 17 വരെയാണ് പൊങ്കൽ ആഘോഷിക്കുന്നത്. ഇതിനിടെ ജനുവരി 14ന് കൂടി അവധി പ്രഖ്യാപിക്കണമെന്ന് തമിഴ്നാട് സർക്കാരിനോട് ആവശ്യമുയർന്നിട്ടുണ്ട്. ജനുവരി പതിനാലിന് ബോഗി പൊങ്കൽ ദിവസമാണ്. പതിനാലിന് അവധി പ്രഖ്യാപിക്കുമോ എന്ന കാര്യത്തിൽ സർക്കാർ പ്രതികരണം നടത്തിയിട്ടില്ല.
ചെന്നൈ: പൊങ്കൽ ആഘോഷത്തിനൊരുങ്ങി തമിഴ്നാട്. തമിഴ് ജനതയുടെ പ്രധാന ആഘോഷമായ പൊങ്കലിനോട് അനുബന്ധിച്ച് സംസ്ഥാനത്ത് ഒരുക്കങ്ങൾ ആരംഭിച്ചിച്ചു. സംസ്ഥാനത്തെ റേഷൻ കാർഡ് ഉടമകൾക്ക് പൊങ്കൽ കിറ്റും 3000 രൂപ ധനസഹായ വിതരണവും ആരംഭിച്ചു. ഈ മാസം എട്ടാം തീയതി മുതൽ കിറ്റ് വിതരണം ആരംഭിച്ചു. മുഖ്യമന്ത്രി എംകെ സ്റ്റാലിൻ ചെന്നൈയിലെ റേഷൻ കടയിൽ വെച്ചാണ് കിറ്റ് വിതരണം ഔദ്യോഗികമായി ഉദ്ഘാടനം ചെയ്തത്.
പൊങ്കൽ ആഘോഷം സംസ്ഥാനത്ത് ആരംഭിക്കാനിരിക്കെ ജനുവരി 14ന് കൂടി അവധി പ്രഖ്യാപിക്കണമെന്ന ആവശ്യം ശക്തമായി. തമിഴ്നാട്ടിൽ ജനുവരി 14 മുതൽ 17 വരെയാണ് പൊങ്കൽ ആഘോഷിക്കുന്നത്. ജനുവരി 15 പൊങ്കലിനും, ജനുവരി 16ന് മാട്ടു പൊങ്കൽ, തിരുവള്ളുവർ ദിനം എന്നിവയ്ക്കും, ജനുവരി 17ന് കാണം പൊങ്കൽ, ഉഴവർ ദിനം എന്നിവയ്ക്കും തമിഴ്നാട് സർക്കാർ അവധി പ്രഖ്യാപിച്ചിട്ടുണ്ട്. ബോഗി പൊങ്കൽ ആഘോഷിക്കുന്ന ജനുവരി 14ന് കൂടി അവധി പ്രഖ്യാപിക്കണമെന്ന ആവശ്യമാണ് ഇപ്പോൾ ഉയരുന്നത്.
ബോഗി പൊങ്കൽ ദിവസമായ ജനുവരി 14ന് കൂടി അവധി പ്രഖ്യാപിക്കുകയാണെങ്കിൽ ജനുവരി 18 ഞായറാഴ്ച ആയതിനാൽ സ്കൂൾ, കോളേജ് വിദ്യാർഥികൾക്ക് തുടർച്ചയായി അഞ്ച് ദിവസത്തെ അവധി ലഭിക്കും. എന്നാൽ ഇക്കാര്യത്തിൽ സർക്കാർ ഔദ്യോഗിക പ്രതികരണം നൽകിയിട്ടില്ല.
ബോഗി പൊങ്കലോടെയാണ് തമിഴ്നാട്ടിൽ പൊങ്കൽ ആഘോഷം ആരംഭിക്കുന്നത്. പരമ്പരാഗതമായി ബോഗി പൊങ്കലിൻ്റെ ആഘോഷങ്ങളുടെ തുടക്കമാണ്. ചെന്നൈ പോലുള്ള നഗരങ്ങളിൽ താമസിക്കുന്നവർ അവരുടെ നാടുകളിലേക്ക് യാത്ര തിരിക്കുന്ന സമയമാണിത്. പൊങ്കൽ ഉത്സവ സമയത്ത് ചെന്നൈ പോലുള്ള നഗരങ്ങളിൽ താമസിക്കുന്നവർ കുടുംബത്തോടൊപ്പം സ്വന്തം നാടുകളിലേക്ക് യാത്ര ചെയ്യാറുണ്ട്. സർക്കാർ ഓഫീസുകൾ, സ്വകാര്യ സ്ഥാപനങ്ങൾ, ഫാക്ടറികൾ, വ്യാപാരസ്ഥാപനങ്ങൾ എന്നിവ ഈ സമയത്ത് അടച്ചിടുന്നതിനാൽ കുടുംബങ്ങൾക്ക് ഒരുമിച്ച് സമയം ചെലവഴിക്കാൻ അവസരം ഒരുക്കുന്നതാണ് പൊങ്കൽ.
പൊങ്കൽ അവധി ദിവസങ്ങൾ ഇങ്ങനെ
ജനുവരി 15 വ്യാഴം: പൊങ്കൽ – പൊതു അവധി
ജനുവരി 16 വെള്ളി: മാറ്റു പൊങ്കൽ / തിരുവള്ളുവർ ദിനം – പൊതു അവധി
ജനുവരി 17 ശനി: കാണും പൊങ്കൽ / ഉഴവർ ദിനം – പൊതു അവധി
ജനുവരി 18 ഞായറാഴ്ച: വാരാന്ത്യ അവധി
ജനുവരി 14ലെ അവധി പ്രഖ്യാപനം സർക്കാർ ഇതുവരെ നടത്തിയിട്ടില്ല. തമിഴ്നാട്ടിലെ പ്രധാന വിളവെടുപ്പ് ഉത്സവമാണ് പൊങ്കൽ.
നാലു ദിവസങ്ങളിലായാണ് തമിഴ്നാട്ടിൽ പൊങ്കൽ ആഘോഷിക്കുന്നത്. ആദ്യ ദിവസം ബോഗി, രണ്ടാം ദിവസം പൊങ്കൽ, മൂന്നാം ദിവസം മാട്ടു പൊങ്കൽ, നാലാം ദിവസം കാണും പൊങ്കൽ എന്നിങ്ങനെയാണ് ആഘോഷിക്കുന്നത്. തമിഴ്നാടിന് പുറമെ ആന്ധ്രാ പ്രദേശ്, കർണാടക സംസ്ഥാനങ്ങളിലെ ഏതാനം ഭാഗങ്ങളിൽ പൊങ്കൽ ആഘോഷിക്കാറുണ്ട്. പൊങ്കൽ പ്രമാണിച്ച് കേരളത്തിലെ ഏതാനം ജില്ലകളിൽ അവധി നൽകാറുണ്ട്.
