കണ്ണൂരിലെ ഒരു സർക്കാർ എയ്ഡഡ് ഹയർ സെക്കൻഡറി സ്കൂളിൽ നടന്ന റാഗിംഗ് സംഭവവുമായി ബന്ധപ്പെട്ട് മൂന്ന് വിദ്യാർത്ഥികളെ അറസ്റ്റ് ചെയ്തു. ഫെബ്രുവരി 12 നാണ് സംഭവം നടന്നത്. കൊളവല്ലൂർ പിആർ മെമ്മോറിയൽ സ്കൂളിലെ പ്ലസ് വൺ വിദ്യാർത്ഥിയായ മുഹമ്മദ് നിഹാലിനാണ് സീനിയർ വിദ്യാർത്ഥികളുടെ മർദ്ദനത്തെ തുടർന്ന് കൈ ഒടിഞ്ഞത്.
ഭാരത് ന്യായ് സംഹിതയിലെ വിവിധ വകുപ്പുകൾ പ്രകാരം അഞ്ച് വിദ്യാർത്ഥികൾക്കെതിരെ പോലീസ് എഫ്‌ഐആർ രജിസ്റ്റർ ചെയ്തിരുന്നു. മാരകായുധം ഉപയോഗിച്ച് ആക്രമണം നടത്തുക, മറ്റൊരാളെ അനാവശ്യമായി തടഞ്ഞുവയ്ക്കുക, പരിക്കേൽപ്പിക്കുക, നിയമവിരുദ്ധമായി സംഘം ചേരുക എന്നീ വകുപ്പുകൾ ഉൾപ്പെടെയാണ് കേസെടുത്തിട്ടുള്ളത്.
സീനിയർ വിദ്യാർത്ഥികളോട് വേണ്ടത്ര ബഹുമാനം കാണിക്കുന്നില്ലെന്ന് ആരോപിച്ച് അഞ്ച് വിദ്യാർത്ഥികൾ നിഹാലിനെ ആക്രമിക്കുകയായിരുന്നുവെന്ന് പോലീസ് പറഞ്ഞു. സീനിയർ വിദ്യാർത്ഥികൾ ഒരു കൂട്ടമായി നിഹാലിനെ ആക്രമിച്ച് മർദ്ദിച്ചതായും പരാതിയിൽ പറയുന്നു.ആക്രമണത്തിൽ പരിക്കേറ്റ വിദ്യാർത്ഥി നിലവിൽ ചികിത്സയിലാണെന്നും പോലീസ് പറഞ്ഞു.
സംഭവത്തിൽ ഉൾപ്പെട്ട അഞ്ച് വിദ്യാർത്ഥികൾക്കെതിരെയും കൊളവല്ലൂർ പോലീസ് കേസെടുത്തിരുന്നു. സ്കൂൾ അധികൃതരുടെ പരാതിയെത്തുടർന്ന്, കേരള റാഗിംഗ് നിരോധന നിയമപ്രകാരവും കേസെടുത്തിട്ടുണ്ട്. സംഭവവുമായി ബന്ധപ്പെട്ട് അഞ്ച് വിദ്യാർത്ഥികളിൽ മൂന്ന് പേരെ അറസ്റ്റ് ചെയ്തിട്ടുണ്ട്. പരാതി ലഭിച്ചതിനെത്തുടർന്ന് സ്കൂൾ ആഭ്യന്തര അന്വേഷണം ആരംഭിച്ചിരുന്നു.
