പെഡസ്ട്രിയന്‍ ക്രോസിങ് പോയിന്റുകളില്‍ കാല്‍നട യാത്രക്കാര്‍ക്ക് മുന്‍ഗണന നല്‍കാത്ത ഡ്രൈവര്‍മാര്‍ക്കെതിരേ കര്‍ശന നടപടികളുമായി അബുദാബി പോലിസ്. ഫെഡറല്‍ ട്രാഫിക് നിയമപ്രകാരം നിയമം ലംഘിക്കുന്ന ഡ്രൈവര്‍മാര്‍ക്ക് 500 ദിര്‍ഹം പിഴയും ആറ് ട്രാഫിക് പോയിന്റുകളും ലഭിക്കുമെന്ന് അധികൃതര്‍ അറിയിച്ചു. റോഡ് സുരക്ഷ ശക്തമാക്കുന്നതിൻ്റെ ഫലമായിട്ടാണ് പോലീസിൻ്റെ നിർണായക തീരുമാനം.പോലീസ് കണ്‍ട്രോള്‍ ആന്‍ഡ് ഫോളോ അപ്പ് സെന്ററുമായി സഹകരിച്ച് അബുദാബി ട്രാഫിക് ആന്‍ഡ് സെക്യൂരിറ്റി പട്രോള്‍ ഡയറക്ടറേറ്റ് ഡ്രൈവര്‍മാര്‍ക്ക് നല്‍കിയ ബോധവല്‍ക്കരണ വീഡിയോയിലാണ് ഈ മുന്നറിയിപ്പ് നല്‍കിയത്.
അശ്രദ്ധമായ ഡ്രൈവിങ് കാരണം കാല്‍നട ക്രോസിംഗിലുണ്ടായ അപകടം കാണിക്കുന്ന വീഡിയോ പോലീസ് അതിന്റെ സോഷ്യല്‍ മീഡിയ പ്ലാറ്റ്ഫോമില്‍ പങ്കുവച്ചു. ശ്രദ്ധയില്ലാതെ വാഹനമോടിക്കുന്നതിന്റെ അപകടസാധ്യതകള്‍ വ്യക്തമാക്കുന്നതാണ് വീഡിയോ. ഡ്രൈവര്‍മാര്‍ റോഡില്‍ ശ്രദ്ധ കേന്ദ്രീകരിക്കേണ്ടതിന്റെ ആവശ്യകത വീഡിയോ ഊന്നിപ്പറഞ്ഞു.ക്രോസിങ്ങുകളിൽ വേഗപരിധി പാലിക്കാനും കാല്‍നട യാത്രക്കാര്‍ക്ക് മുന്‍ഗണന നല്‍കാനും പോലിസ് ഡ്രൈവര്‍മാരോട് അഭ്യർഥിച്ചു. കാല്‍നടയാത്രക്കാരും ഡ്രൈവര്‍മാരും ഒരേപോലെ ശ്രദ്ധിച്ചാല്‍ മാത്രമേ അവരുടെ സുരക്ഷ ഉറപ്പാക്കാനാവൂ എന്നും അധികൃതര്‍ അഭിപ്രായപ്പെട്ടു.
അതിനിടെ, കാല്‍നട ക്രോസിംഗില്‍ ആളുകള്‍ക്ക് റോഡ് മുറിച്ചു കടക്കുന്നതിനായി സീബ്ര ലൈനിന് തോട്ടു മുന്നിലായി നിര്‍ത്തിയിട്ട ടാക്സി കാര്‍ ശ്രദ്ധിക്കാതെ പിറകിലെത്തിയ വാന്‍ കാറില്‍ ഇടിച്ചുണ്ടായ അപകടത്തിന്റെ വീഡിയോ ഇന്നലെ അബുദാബി പോലീസ് പങ്കുവച്ചു. പോലിസ് സ്ഥാപിച്ച റോഡ് നിരീക്ഷണ കാമറകളിൽ പതിഞ്ഞ ട്രാഫിക് അപകടത്തിന്റെ ദൃശ്യമാണ് പോലിസ് പങ്കുവച്ചത്. 25 സെക്കന്‍ഡ് ദൈര്‍ഘ്യമുള്ള വീഡിയോ ക്ലിപ്പില്‍ കാല്‍നട യാത്രക്കാര്‍ക്ക് റോഡ് മുറിച്ചു കടക്കാനായി നിര്‍ത്തിയ ടാക്സിയെ ഒരു മിനി വാന്‍ പിറകില്‍ നിന്ന് വന്നിടിക്കുന്നതാണ് കാണിക്കുന്നത്.
നിര്‍ത്തിയിട്ട ടാക്സി കാര്‍ ഹസാര്‍ഡ് ലൈറ്റുകള്‍ ഓണാക്കിയിരുന്നുവെങ്കിലും അത് ശ്രദ്ധിക്കാതെ വേഗതിയിലെത്തിയ കാര്‍ ഇക്കാര്യം ശ്രദ്ധിച്ചില്ല. തൊട്ടടുത്തെത്തിയപ്പോള്‍ കാര്‍ നിര്‍ത്തിയിട്ടിരിക്കുന്ന പിറകിലെ വാഹനത്തിലെ ഡ്രൈവര്‍ കണ്ടത്. അവസാന നിമിഷം ഇടിയില്‍ നിന്നൊഴിവാക്കുന്നതിനായി വാന്‍ വെട്ടിക്കാന്‍ ശ്രമിച്ചെങ്കിലും സാധിക്കാതെ കാറില്‍ ഇടിക്കുകയായിരുന്നു. സീബ്ര ക്രോസിങ് വഴി റോഡ് മുറിച്ചു കടക്കുകയായിരുന്ന മൂന്ന് പേര്‍ അത്ഭുതകരമായി രക്ഷപ്പെടുന്നതും വീഡിയോയിലുണ്ട്. അത്തരം അശ്രദ്ധമായ ഡ്രൈവിംഗാണ് വലിയ അപകടങ്ങള്‍ ക്ഷണിച്ചുവരുത്തുന്നതെന്നും പോലിസ് അഭിപ്രായപ്പെട്ടു.
