റോഡുകളിലെ കുഴികൾ റിപ്പയർ ചെയ്യാതെ ദീർഘനാൾ കിടക്കുന്നത് അവയിൽ വാഹനങ്ങൾ വീണ് അപകടങ്ങളുണ്ടാകുന്നതും സാധാരണമാണ് നമ്മുടെ രാജ്യത്ത്. ഈ പ്രശ്നത്തിന് ശാസ്ത്രലോകം ഒരു പരിഹാരം കണ്ടെത്തിയിരിക്കുകയാണ്. റോഡുകളിൽ കുഴി രൂപപ്പെടുന്നതിന്റെ ആദ്യഘട്ടത്തിൽ തന്നെ അത് സ്വയം റിപ്പയർ ചെയ്യുന്ന ഒരു സാങ്കേതികതയാണ് ദേശീയപാതാ അതോരിറ്റി അവതരിപ്പിക്കാൻ തയ്യാറെടുക്കുന്നത്.
ഈ സാങ്കേതികത റോഡുകളിൽ പ്രയോഗിക്കപ്പെട്ടാൽ അത് വിപ്ലവമായിരിക്കും. ഒരു പുതിയ തരം കൂട്ട് ആയിരിക്കും റോഡു നിർമ്മാണത്തിന് ഉപയോഗിക്കുക. ഈ കൂട്ടിന് മുറികൂടുന്ന സ്വഭാവമുണ്ടായിരിക്കും. മിക്കപ്പോഴും അപകടം നടന്നാലും മറ്റുമുണ്ടാകുന്ന ചെറിയ പോറലുകളാണ് പോകെപ്പോകെ വലിയ കുഴികളായി പരിണമിക്കുക. ഇത്തരം പോറലുകൾ സംഭവിക്കുമ്പോൾ തന്നെ അവ റിപ്പയർ ചെയ്യപ്പെട്ടാൽ റോഡുകളുടെ ആയുസ്സ് വര്‍ധിക്കും.
റോഡിൽ പോറലോ കുഴിയോ രൂപപ്പെട്ടാലുടൻ ടാർ അതിലേക്ക് പരക്കും. ഈ ടാറിൽ സ്റ്റീൽ നാരുകളുമുണ്ടാകും. എത്രസമയത്തിനുള്ളിൽ ഈ പ്രക്രിയ നടക്കുമെന്നത് വ്യക്തമല്ല. കൂടുതൽ വിശദാംശങ്ങൾ പുറത്തു വരേണ്ടതായിട്ടുണ്ട്. റോഡുകളുടെ ഈടുനിൽപ്പ് വർദ്ധിപ്പിക്കാൻ പരമ്പരാഗതമല്ലാത്ത മാർഗ്ഗങ്ങൾ തേടിക്കൊണ്ടിരിക്കുകയാണ് ദേശീയപാതാ അതോരിറ്റിയെന്ന് ഇതുമായി ബന്ധപ്പെട്ട ഒരു ഉദ്യോഗസ്ഥൻ പറയുന്നു. പ്രോജക്ടിന്റെ ചെലവും നേട്ടങ്ങളും പഠിച്ചതിനു ശേഷമായിരിക്കും നടപ്പാക്കൽ.
റോഡുകളില്‍ കുഴി രൂപപ്പെടുന്നതിന്റെ ആദ്യഘട്ടത്തിൽ തന്നെ പ്രശ്നം പരിഹരിക്കപ്പെടുന്നത് ദേശീയപാതാ അതോരിറ്റിക്ക് ഉപകാരപ്രദമാകും. ചെലവ് നന്നേ കുറഞ്ഞുകിട്ടും എന്നുറപ്പാണ്.
