മാസപ്പിറവി കാണാത്തതിനാൽ ഒമാൻ ഒഴികെയുള്ള ഗൾഫ് രാജ്യങ്ങളിൽ ചെറിയ പെരുന്നാൾ ബുധനാഴ്ച. 30 നോമ്പും പൂ‍ർത്തിയാക്കിയാണ് വിശ്വാസികൾ പെരുന്നാളിലേക്ക് കടക്കുക. ചെറിയ പെരുന്നാൾ സംബന്ധിച്ച ഒമാൻ്റെ പ്രഖ്യാപനം നാളെ ഉണ്ടാകും.
മാസപ്പിറവി ഇന്ന് ദൃശ്യമാകുമെന്ന പ്രതീക്ഷയിൽ ഗൾഫ് രാജ്യങ്ങളിൽ മാസപ്പിറവി ദർശിക്കാനുള്ള വിപുലമായ സൗകര്യങ്ങൾ ഒരുക്കിയിരുന്നു. ഒമാൻ ഒഴികെയുള്ള ഗൾഫ് രാജ്യങ്ങളിൽ മാ‍ർച്ച് 10നാണ് റമദാൻ വ്രതം ആരംഭിച്ചത്. ഒമാനിൽ 11നായിരുന്നു വ്രതാരംഭം.അതേസമയം ഗൾഫ് രാജ്യങ്ങളിൽ ചെറിയ പെരുന്നാൾ അവധി പ്രഖ്യാപിച്ചു.
ഇക്കുറി ഏറ്റവും കൂടുതൽ അവധി ദിനങ്ങളുണ്ട്. ബഹ്റൈനിൽ പൊതുമേഖലാ ജീവനക്കാർക്ക് ഈദുൽ ഫിത്തർ ദിനത്തിലും തുടർന്നുള്ള രണ്ട് ദിവസങ്ങളിലും അവധി പ്രഖ്യാപിച്ചു. വിവിധ മന്ത്രാലയങ്ങൾ, സർക്കാർ ഓഫിസുകൾ എന്നിവയ്ക്ക് ഈ മൂന്നു ദിവസങ്ങളിൽ അവധി ഉണ്ടാകും.
യുഎഇയിൽ ഇന്നുമുതൽ അവധി പ്രഖ്യാപിച്ചു. തിങ്കളാഴ്ച വരെ പൊതു അവധി തുടരും. സൗദി അറേബ്യയിൽ നാളെ മുതൽ 13 വരെ അവധിയാണ്. ഖത്തറിൽ 15 വരെ അവധി ആണ്. ഒമാനിൽ നാളെ മുതൽ 13 വരെ അവധി പ്രഖ്യാപിച്ചു. കുവൈറ്റിൽ നാളെ മുതൽ 13 വരെ അവധിയാണ്.
