വടക്കുകിഴക്കൻ മൺസൂൺ ശക്തമായതോടെ തമിഴ്‌നാട്ടിലെ പലയിടത്തും കനത്ത മഴ. വ്യാപകമായ വെള്ളപ്പൊക്കത്തിനൊപ്പം പലയിടത്തും മണ്ണിടിച്ചിലും റിപ്പോർട്ട് ചെയ്തിട്ടുണ്ട്. വെള്ളിയാഴ്ച സംസ്ഥാനത്തെ 12 ജില്ലകളിൽ ഇടിമിന്നലോട് കൂടിയ കനത്ത മഴയ്ക്ക് സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) അറിയിച്ചു. നിലവിലെ സാഹചര്യം കണക്കിലെടുത്ത് രണ്ട് ജില്ലകളിലെ സ്‌കൂളുകൾക്ക് അവധി പ്രഖ്യാപിച്ചു. തിരുവാരൂർ ജില്ലയിലെയും പുതുച്ചേരിയിലെ കാരയ്ക്കലിലെയും സ്‌കൂളുകൾക്കാണ് അവധി പ്രഖ്യാപിച്ചിരിക്കുന്നത്. തഞ്ചാവൂർ, തിരുവാരൂർ, നാഗപട്ടണം, മയിലാടുതുറൈ, പുതുക്കോട്ടൈ, ശിവഗംഗൈ, രാമനാഥപുരം, വിരുദുനഗർ, തൂത്തുക്കുടി, തെങ്കാശി, തിരുനെൽവേലി, കന്യാകുമാരി തുടങ്ങിയ പ്രദേശങ്ങളിൽ കനത്ത മഴയ്ക്ക് സാധ്യതയുണ്ടെന്ന് ചെന്നൈയിലെ ഐഎംഡി പ്രവചിച്ചതായി പ്രാദേശിക കാലാവസ്ഥാ നിരീക്ഷണ കേന്ദ്രം അറിയിച്ചു. നീലഗിരി മൗണ്ടൻ റെയിൽവേയുടെ കല്ലാറിനും കൂനൂരിനും ഇടയിൽ ട്രാക്കിൽ മണ്ണിടിഞ്ഞ് മരങ്ങൾ കടപുഴകി വീണതിനെ തുടർന്ന് നവംബർ 16 വരെ രണ്ട് ട്രെയിൻ സർവീസുകൾ റദ്ദാക്കിയതായി റെയിൽവേ അറിയിച്ചു.
മേട്ടുപ്പാളയത്തുനിന്ന് ഉദഗമണ്ഡലം വരെയും തിരിച്ചും ഓടുന്ന 06136, 06137 എന്നീ പാസഞ്ചർ സ്‌പെഷ്യൽ ട്രെയിനുകൾ നവംബർ 10 മുതൽ നവംബർ 16 വരെ റദ്ദാക്കിയതായും അധികൃതർ അറിയിച്ചു. മധുര, കോയമ്പത്തൂർ, തൂത്തുക്കുടി തുടങ്ങി നിരവധി നഗരങ്ങളിൽ വ്യാഴാഴ്ച രൂക്ഷമായ വെള്ളക്കെട്ടുകളാണ് ഉണ്ടായത്. കോയമ്പത്തൂരിലെ കുഞ്ഞപ്പ-പനായിക്ക് സമീപം റോഡിലും കോത്തഗിരി മേട്ടുപ്പാളയം മേഖലയിൽ മേട്ടുപ്പാളയം ഹൈവേയിലും മണ്ണിടിഞ്ഞു. കോയമ്പത്തൂർ, തിരുപ്പൂർ, മധുര, തേനി, ദിണ്ടിഗൽ ജില്ലകളിലാണ് വ്യാഴാഴ്ച സ്‌കൂളുകൾക്ക് അവധി നൽകിയിരുന്നു. കാലാവസ്ഥാ പ്രവചനമനുസരിച്ച്, കൊമോറിൻ മേഖലയിൽ രൂപപ്പെട്ട ചുഴലിക്കാറ്റും ശക്തമായ കിഴക്കൻ/വടക്കുകിഴക്കൻ കാറ്റും കിഴക്ക്-മധ്യ അറബിക്കടലിലെ ന്യൂനമർദ്ദവുമാണ് സംസ്ഥാനത്തെ തീവ്രമായ മഴയ്ക്ക് പ്രധാന കാരണം.
