സംസ്ഥാനത്ത് ട്രോളിംഗ് നിരോധനം ഇന്ന് അർദ്ധരാത്രിയോടെ അവസാനിക്കും. നാളെ മുതൽ 3500 യന്ത്രവൽകൃത ബോട്ടുകൾ മീൻ പിടിക്കാൻ കടലിലിറങ്ങും. ഇത്തവണ മഴ കുറഞ്ഞത് മത്സ്യ ലഭ്യതയെ ബാധിക്കുമോയെന്ന ആശങ്കയിലാണ് മത്സ്യത്തൊഴിലാളികൾ. എങ്കിലും പ്രതീക്ഷ കൈവിടാതെ കടൽ കനിയുമെന്ന വിശ്വാസത്തോടെയാണ് അവർ ദിവസങ്ങൾ തള്ളി നീക്കിയത്.
52 ദിവസം നീണ്ട ഇടവേളയ്ക്ക് ശേഷമാണ് യാനങ്ങൾ കടലിറങ്ങാൻ തയ്യാറെടുക്കുന്നത്. പുതിയ വലകൾ സജ്ജമാക്കിയും പഴയ വലകൾ നന്നാക്കിയും മത്സ്യത്തൊഴിലാളികൾ കാത്തിരിപ്പിലായിരുന്നു. മുഖം മിനുക്കിയും കേടുപാടുകൾ തീർത്തും ബോട്ടുകൾ ഒരുങ്ങി കഴിഞ്ഞു. ഇവയിൽ ഐസുകൾ നിറച്ചു തുടങ്ങിയിട്ടുണ്ട്. ഇന്ന് അർദ്ധരാത്രിയോടെ തന്നെ ബോട്ടുകളിൽ ആദ്യ സംഘംമീൻപിടിക്കാനിറങ്ങും.
ട്രോളിംഗ് കാലത്ത് സംസ്ഥാനത്തെ മത്സ്യത്തൊഴിലാളികൾക്ക് സൗജന്യ റേഷൻ കിട്ടിയെങ്കിലും 4500 രൂപയുടെ സാമ്പാദ്യ ആശ്വാസ പദ്ധതി ലഭിക്കാത്തതിൽ പരാതി ഉയർന്നിരുന്നു. അതേസമയം യന്ത്രവൽകൃത ബോട്ടുകളിൽ മീൻ പിടിത്തം തുടങ്ങുന്നതോടെ മീൻ വിലയിൽ ഗണ്യമായ കുറവുണ്ടാകുമെന്ന പ്രതീക്ഷയിലാണ് സാധാരണക്കാർ.
