ശനിയാഴ്ച ഉണ്ടായ കനത്ത മഴയിൽ ഡൽഹിയുടെ പല ഭാഗങ്ങളിലും വീണ്ടും വെള്ളപ്പൊക്കത്തിനും ഗതാഗതക്കുരുക്കിനും കാരണമായി. കഴിഞ്ഞ കുറച്ച് ദിവസങ്ങളായി മഴ കുറഞ്ഞു നിന്നതോടെ ഡൽഹി വെള്ളപ്പൊക്കത്തിൽ നിന്ന് കരകയറിയിരുന്നു.
രണ്ട് ഔദ്യോഗിക വിദേശ സന്ദർശനങ്ങൾ കഴിഞ്ഞ് മടങ്ങിയെത്തിയ പ്രധാനമന്ത്രി നരേന്ദ്ര മോദി തന്നെ വിളിച്ച് രാജ്യതലസ്ഥാനത്തെ പ്രതിസന്ധി വിലയിരുത്തിയതായി ലഫ്റ്റനന്റ് ഗവർണർ വികെ സക്‌സേന ട്വിറ്ററിൽ കുറിച്ചു.
“ഡൽഹിയിൽ എത്തിയ ഉടൻ പ്രധാനമന്ത്രി മോദി ഡൽഹി ലെഫ്റ്റനന്റ് ഗവർണർ വി കെ സക്‌സേനയുമായി വെള്ളപ്പൊക്കത്തിന് സമാനമായ സാഹചര്യം ലഘൂകരിക്കുന്നതിൽ കൈവരിച്ച പുരോഗതിയെക്കുറിച്ച് സംസാരിച്ചു,” ഉദ്യോഗസ്ഥർ പിടിഐയോട് പറഞ്ഞു .
അയൽ സംസ്ഥാനങ്ങളിലെ കനത്ത മഴയും ഹരിയാനയിലെ ഹത്‌നികുണ്ഡ് ബാരേജിൽ നിന്ന് അധിക ജലം തുറന്നുവിട്ടതും കാരണം ഡൽഹിയിൽ കഴിഞ്ഞ കുറച്ച് ദിവസങ്ങളായി വെള്ളപ്പൊക്കത്തിലാണ്. ഡൽഹിയിലെ പ്രധാന, താഴ്ന്ന പ്രദേശങ്ങളിലെ വെള്ളക്കെട്ടിന്റെ ദൃശ്യങ്ങൾ സോഷ്യൽ മീഡിയയിൽ നിറഞ്ഞുനിൽക്കുന്നു. മഴ നാശം വിതച്ച പ്രദേശങ്ങളിലുള്ളവരോട് വീടിനുള്ളിൽ തന്നെ കഴിയാൻ അധികൃതർ ആവശ്യപ്പെട്ടിട്ടുണ്ട്.
യമുന ബാരേജിന്റെ അഞ്ച് ഗേറ്റുകളിൽ ചിലത് തുറന്ന് വെള്ളം ഒഴുക്കിവിടാൻ സഹായിക്കുന്നതിന് ശ്രമം നടത്തിവരികയാണെന്ന് മുഖ്യമന്ത്രി അരവിന്ദ് കെജ്‌രിവാൾ ഉറപ്പ് നൽകി.
“യമുനയിലെ ജലനിരപ്പ് കുറഞ്ഞുവരികയാണ്. മഴ പെയ്തില്ലെങ്കിൽ സ്ഥിതിഗതികൾ ഉടൻ സാധാരണ നിലയിലാകും. മഴ പെയ്താൽ കുറച്ചുകൂടി സമയമെടുക്കും,” അദ്ദേഹം പറഞ്ഞു.
