കർണാടക മിൽക്ക് ഫെഡറേഷന്റെ നന്ദിനി പാലുൽപ്പന്നങ്ങൾ കേരളത്തിൽ വിൽക്കുന്നതിനെ എതിർക്കുമെന്ന് മിൽമ (കേരള കോ-ഓപ്പറേറ്റീവ് മിൽക്ക് മാർക്കറ്റിംഗ് ഫെഡറേഷൻ). നാഷണൽ കോ-ഓപ്പറേറ്റീവ് ഡയറി ഫെഡറേഷൻ ഓഫ് ഇന്ത്യയുടെ അടുത്ത ഡയറക്‌ടർ ബോർഡ് യോഗത്തിൽ വിഷയം ഉന്നയിക്കുമെന്ന് മിൽമ മലബാർ മേഖല സഹകരണ മിൽക്ക് പ്രൊഡ്യൂസേഴ്‌സ് യൂണിയൻ ചെയർമാൻ കെഎസ് മണി പറഞ്ഞു.
രാജ്യത്തെ മിൽക്ക് ഫെഡറേഷനുകൾ ഇത്രയും കാലമായി പിന്തുടരുന്ന ചില ചിട്ടകളും കീഴ്വഴക്കങ്ങളും തെറ്റിക്കുന്നത് ധാർമ്മികമായി ശരിയല്ലെന്ന് കെഎസ് മണി ഇന്ത്യാ ടുഡേയോട് പറഞ്ഞു. കർണാടക ആസ്ഥാനമായുള്ള പാൽ ഉത്പാദകരുടെ കേരളത്തിൽ ഔട്ട്‌ലെറ്റുകൾ തുറക്കാനുള്ള തീരുമാനത്തിനെതിരെ താൻ കത്ത് നൽകിയെങ്കിലും അവർ അത് അവഗണിച്ചതായി അദ്ദേഹം പറഞ്ഞു.
കർണാടക നിയമസഭാ തിരഞ്ഞെടുപ്പിൽ ഏറെ ചർച്ച ചെയ്യപ്പെട്ട അമുൽ-നന്ദിനി പ്രശ്‌നത്തിന് മുമ്പ് തന്നെ കേരളത്തിൽ കച്ചവടം നടത്താൻ കർണാടക കോർപ്പറേറ്റ് പാൽ ഉൽപാദകർ തീരുമാനിച്ചിരുന്നു. കർണാടകയിൽ വ്യവസായം തുടങ്ങാനുള്ള അമുലിന്റെ തീരുമാനം തെറ്റായിരുന്നുവെന്നും എന്നാൽ അതിനെ എതിർക്കാൻ നന്ദിനിക്ക് ധാർമിക അവകാശമില്ലെന്നും മിൽമ മലബാർ മേഖല യൂണിയൻ ചെയർമാൻ പറഞ്ഞു.
മിൽക്ക് ഫെഡറേഷനുകൾ വാണിജ്യ താൽപ്പര്യങ്ങൾക്കായി മാത്രമല്ല, അവരുടെ സംസ്ഥാനത്തെ ക്ഷീരകർഷകരുടെ ക്ഷേമത്തിനും വേണ്ടി പ്രവർത്തിക്കണമെന്നും കെഎസ് മണി കൂട്ടിച്ചേർത്തു. ഒരു സംസ്ഥാനത്തിന്റെ സഹകരണ സ്ഥാപനം മറ്റൊരു സംസ്ഥാനത്തിന്റെ സഹകരണ സ്ഥാപനത്തിന്റെ വിപണിയിൽ നേരിട്ട് ഇടപെടുന്നത് സഹകരണ തത്വങ്ങൾക്കും അടിസ്ഥാന മൂല്യങ്ങൾക്കും എതിരാണെന്നും അദ്ദേഹം ചൂണ്ടിക്കാട്ടി.
“ഉത്സവ കാലങ്ങളിലും കേരളത്തിൽ പാൽ ഉൽപ്പാദനം കുറവായ സമയത്തും മിൽമ പ്രധാനമായും ആശ്രയിക്കുന്നത് കർണാടകയിലെ നന്ദിനി, തമിഴ്‌നാട്ടിലെ ആവിൻ എന്നിവയെയാണ്. അതുകൊണ്ട് നന്ദിനിയുടെ നല്ല ഉപഭോക്താവായ മിൽമയെ ഏതാനും ലിറ്റർ പാൽ വിൽപ്പനയുടെ പേരിൽ ബുദ്ധിമുട്ടിക്കുന്നത് ശരിയല്ല” മിൽമ ചെയർമാൻ പറഞ്ഞു. നന്ദിനിയുടെ ഉൽപ്പന്നങ്ങൾ കേരളത്തിൽ ഇറക്കുന്നത് മിൽമയെ ബാധിക്കില്ലെന്നും അദ്ദേഹം വ്യക്തമാക്കി.
“കഴിഞ്ഞ ആറ് മാസത്തെ കണക്കനുസരിച്ച്, ഞങ്ങളുടെ ഉൽപ്പന്ന വിൽപ്പനയിൽ കാര്യമായ വളർച്ചയുണ്ടായിട്ടുണ്ട്,” നന്ദിനിയുടെ വരവ് കേരളത്തിലെ വിപണിയിലെ മറ്റ് കമ്പനികളെ ബാധിച്ചേക്കാമെന്ന് കെഎസ് മണി പറഞ്ഞു.
“രാജ്യത്തെ ക്ഷീര ഫെഡറേഷനുകളുടെ രക്ഷിതാവായ അമുൽ ഇതര സംസ്ഥാനങ്ങളിലെ ഫെഡറേഷനുകളെയും ക്ഷീര കർഷകരെയും ബാധിക്കുന്ന തരത്തിൽ ബിസിനസ്സ് നടത്തുന്നത് ശരിയല്ല. പ്രശ്‌നങ്ങൾ ചർച്ചയിലൂടെ പരിഹരിക്കാനാണ് മിൽമ ശ്രമിക്കുന്നത്, നിയമപരമായ നടപടികളൊന്നും ആലോചിക്കുന്നില്ല” കെഎസ് മണി കൂട്ടിച്ചേർത്തു.
മലപ്പുറം ജില്ലയിലെ മഞ്ചേരിയിലും തിരൂരിലും എറണാകുളം ജില്ലയിലെ കൊച്ചിയിലും പത്തനംതിട്ട ജില്ലയിലെ പന്തളത്തുമാണ് നന്ദിനി തങ്ങളുടെ ഔട്ട്‌ലെറ്റുകൾ തുറന്നത്. കേരളത്തിലെ പ്രധാന നഗരങ്ങളിലെ സൂപ്പർമാർക്കറ്റുകളിലും നന്ദിനി ഉൽപ്പന്നങ്ങൾ ലഭ്യമാണ്.
