ബിഹാറിലെ ജാതി അടിസ്ഥാനമാക്കിയുള്ള സെൻസസ് സ്‌റ്റേ ചെയ്ത് പട്‌ന ഹൈക്കോടതി. സംസ്ഥാനത്ത് ജാതി സെൻസസ് നടത്താനുള്ള ബിഹാർ സർക്കാരിന്റെ നിർദേശം കണക്കിലെടുത്താണ് തീരുമാനം. സംസ്ഥാനത്തെ പ്രതിപക്ഷമായ ബിജെപി സെൻസസിനെതിരെ നിലയുറപ്പിച്ചിരുന്നു. ജാതി സെൻസസ് നടത്താൻ ബിഹാർ സർക്കാരിന് നിയമപരമായ അധികാരമില്ലെന്നും അത്തരം സെൻസസ് കേന്ദ്രത്തിന് മാത്രമേ നടത്താനാവൂ എന്നും ഹർജിക്കാരുടെ അഭിഭാഷകൻ നേരത്തെ ചൂണ്ടിക്കാട്ടിയിരുന്നു.
ജനുവരി 7നാണ് ബീഹാറിൽ നിതീഷ് കുമാർ സർക്കാർ ജാതി അടിസ്ഥാനമാക്കിയുള്ള സെൻസസ് ആരംഭിച്ചത്. പദ്ധതിക്ക് 500 കോടി രൂപയാണ് ചെലവ്. രണ്ട് ഘട്ടങ്ങളിലായാണ് ജാതി അടിസ്ഥാനമാക്കിയുള്ള സെൻസസ് നടത്താൻ തീരുമാനിച്ചിരുന്നത്.
പഞ്ചായത്ത് മുതൽ ജില്ലാതലം വരെയുള്ള എട്ടുതല സർവേയുടെ ഭാഗമായി മൊബൈൽ ആപ്ലിക്കേഷൻ വഴിയാണ് ഡിജിറ്റലായി വിവരങ്ങൾ ശേഖരിച്ചത്. സ്ഥലം, ജാതി, ഒരു കുടുംബത്തിലെ ആളുകളുടെ എണ്ണം, അവരുടെ തൊഴിൽ, വാർഷിക വരുമാനം എന്നിവയെ കുറിച്ചുള്ള ചോദ്യങ്ങളാണ് ആപ്പിൽ ഉണ്ടായിരുന്നത്. സെൻസസ് പ്രവർത്തകരിൽ ടീച്ചർമാർ, അംഗൻവാടികൾ, എംജിഎൻആർഇജിഎ അല്ലെങ്കിൽ ജീവിക തൊഴിലാളികൾ എന്നിവരും ഉൾപ്പെടുന്നു.
ബിഹാറിൽ നിന്നുള്ള ബിജെപി എംപിയായ കേന്ദ്ര ആഭ്യന്തര സഹമന്ത്രി നിത്യാനന്ദ് റായ് 2021ൽ പാർലമെന്റിൽ പട്ടികജാതി (എസ്‌സി), പട്ടികവർഗ (എസ്‌ടി) ഒഴികെയുള്ള ജാതി അടിസ്ഥാനമാക്കിയുള്ള സെൻസസ് നടത്തില്ലെന്ന് പ്രഖ്യാപിച്ചിട്ടും ജാതി സെൻസസ് നടക്കുന്നുണ്ട്. സ്വാതന്ത്ര്യത്തിന് ശേഷം, കേന്ദ്രം ഇതുവരെ ഏഴ് സെൻസസ് നടത്തുകയും പട്ടികജാതി-പട്ടികവർഗ വിഭാഗങ്ങളുമായി ബന്ധപ്പെട്ട ഡാറ്റ പ്രസിദ്ധീകരിക്കുകയും ചെയ്‌തിട്ടുണ്ട്.
