ഛത്തീസ്ഗഡ് മുൻ ബിജെപി എംപിയും മുതിർന്ന ആദിവാസി നേതാവുമായ നന്ദകുമാർ സായ് (Nand Kumar Sai) കോൺഗ്രസിൽ ചേർന്നു. ഛത്തീസ്ഗഡ് മുഖ്യമന്ത്രി ഭൂപേഷ് ബാഗേലിന്റെ ( Bhupesh Baghel) സാന്നിധ്യത്തിൽ നന്ദകുമാറിന് കോൺഗ്രസിൽ അംഗത്വം നൽകി സ്വീകരിച്ചു. ഈ വർഷം നടക്കാനിരിക്കുന്ന അസംബ്ലി തിരഞ്ഞെടുപ്പിന് മുന്നോടിയായി നാല് പതിറ്റാണ്ടിലേറെ നീണ്ട ബിജെപി രാഷ്ട്രീയം അവസാനിപ്പിച്ചാണ് നന്ദകുമാർ സായ് കോൺഗ്രസിലേക്ക് എത്തുന്നത്.
രണ്ട് തവണ ലോക്‌സഭാ എംപിയും മൂന്ന് തവണ എംഎൽഎയുമായ സായ് മുമ്പ് ഛത്തീസ്ഗഡിലും അവിഭക്ത മധ്യപ്രദേശിലും പാർട്ടിയുടെ സംസ്ഥാന പ്രസിഡന്റായി സേവനമനുഷ്ഠിച്ചിട്ടുണ്ട്. ബിജെപിയിൽ തന്റെ പ്രതിച്ഛായ തകർക്കാൻ സഹപ്രവർത്തകർ ഗൂഢാലോചന നടത്തുകയാണെന്നും തെറ്റായ ആരോപണങ്ങൾ ഉന്നയിക്കുകയാണെന്നും ഇത് തന്നെ വല്ലാതെ വേദനിപ്പിച്ചെന്നും ആരോപിച്ചാണ് സായ് രാജിക്കത്ത് സമർപ്പിച്ചത്. “ബിജെപിയുടെ പ്രാഥമിക അംഗത്വത്തിൽ നിന്നും എല്ലാ സ്ഥാനങ്ങളിൽ നിന്നും ഞാൻ രാജിവെക്കുകയാണ്. പാർട്ടി എന്ത് ചുമതലകൾ ഏൽപ്പിച്ചാലും പൂർണ്ണ അർപ്പണബോധത്തോടെയാണ് ഞാൻ അവരെ നിർവ്വഹിച്ചത്. അതിന് പാർട്ടിയോട് നന്ദി അറിയിക്കുന്നു,” അദ്ദേഹം പറഞ്ഞു.
അതേസമയം സായിയെപ്പോലെ “അറിവുള്ള, മര്യാദയുള്ള, സഹിഷ്ണുതയുള്ള നേതാവ്” പാർട്ടി വിടുന്നത് ബിജെപി ആദിവാസി നേതാക്കളെ അപമാനിക്കുകയും അവഗണിക്കുകയും ചെയ്യുന്നു എന്നതിന്റെ സൂചനയാണെന്ന് ഛത്തീസ്ഗഢ് കോൺഗ്രസ് കമ്മ്യൂണിക്കേഷൻ വിഭാഗം മേധാവി സുശീൽ ആനന്ദ് ശുക്ല പറഞ്ഞു. വടക്കൻ ഛത്തീസ്ഗഢിൽ നിന്നുള്ള പാർട്ടിയുടെ പ്രമുഖ ഗോത്രമുഖമായ സായ്, 1977-ൽ മധ്യപ്രദേശിലെ തപ്കര സീറ്റിൽ (ഇപ്പോൾ ജഷ്പൂർ ജില്ലയിൽ) നിന്ന് ജനതാ പാർട്ടി എംഎൽഎയായി ആദ്യമായി തിരഞ്ഞെടുക്കപ്പെട്ടു. 1980-ൽ ബി.ജെ.പിയുടെ റായ്ഗഡ് ജില്ലാ യൂണിറ്റ് തലവനായി തിരഞ്ഞെടുക്കപ്പെട്ടു. 1985ലും 1998ലും തപ്കരയിൽ നിന്ന് രണ്ടാമതും മൂന്നാമതും ബിജെപി എംഎൽഎയായി തിരഞ്ഞെടുക്കപ്പെട്ടു.
