മലയാള സിനിമയിൽ യുവനിരയിൽ ശ്രദ്ധേയനാണ് നടൻ ടൊവിനോ തോമസ്. 2012ൽ മലയാള സിനിമയിൽ അരങ്ങേറ്റം കുറിച്ച്, സഹനായക വേഷം, വില്ലൻ വേഷം തുടങ്ങിയവയൊക്കെ ചെയ്ത ടൊവിനോ ഇന്ന് താരമൂല്യത്തിൽ മുന്നിൽ നിൽക്കുന്ന നായക നടനാണ്. 34-ാം വയസ്സിൽ തന്റെ കരിയറിന്റെ കൊടുമുടിയിൽ നിൽക്കുമ്പോഴും തനിക്ക് ഇനിയും ഒരുപാട് ദൂരം സഞ്ചരിക്കാനുണ്ടെന്ന് അദ്ദേഹം വിശ്വസിക്കുന്നു. വൈക്കം മുഹമ്മദ് ബഷീറിന്റെ തിരക്കഥയെ അടിസ്ഥാനമാക്കി ആഷിഖ് അബു സംവിധാനം ചെയ്യുന്ന ‘നീലവെളിച്ചം’ ആണ് ടൊവിനോയുടെതായി ഒടുവിൽ പുറത്തിറങ്ങിയ ചിത്രം. ഇന്ത്യാ ടുഡേയുമായി നടത്തിയ പ്രത്യേക അഭിമുഖത്തിൽ തന്റെ വരാനിരിക്കുന്ന സിനിമകളെക്കുറിച്ചും പാൻ-ഇന്ത്യൻ സിനിമയുടെ പുതിയ ട്രെൻഡിനെക്കുറിച്ചും അദ്ദേഹം മനസ് തുറന്നു.
പാൻ-ഇന്ത്യൻ സിനിമകളിൽ അഭിനയിക്കുന്നതിനെക്കുറിച്ച് ടൊവിനോയുടെ പ്രതികരണം ഇങ്ങനെയായിരുന്നു…. ”എന്റെ സിനിമകൾ പ്രേക്ഷകർ കാണണമെന്ന് ഞാൻ ആഗ്രഹിക്കുന്നു. ലോകമെമ്പാടുമുള്ള ആളുകൾ എന്റെ മലയാളം സിനിമകൾ കാണുകയും ഇഷ്ടപ്പെടുകയും ചെയ്യുന്നുവെങ്കിൽ ഞാൻ ഭാഗ്യവാനാണ്. ഞാൻ മനഃപൂർവം ഒരു ‘പാൻ-ഇന്ത്യൻ സിനിമ’യുടെ പിറകേ പോകാറില്ല. മലയാള സിനിമയിൽ പ്രവർത്തിക്കുക എന്നതാണ് എന്റെ ഉദ്ദേശം, ഞാൻ എന്റെ ജോലി ചെയ്തുകൊണ്ടേയിരിക്കും. നല്ല മലയാളം സിനിമകളുടെ ഭാഗമാകാൻ ഞാൻ ആഗ്രഹിക്കുന്നു. മലയാള സിനിമയുടെ വളർച്ചയ്ക്ക് ഞാനും ഒരു കാരണക്കാരനാകുന്നുവെങ്കിൽ അതിൽ ഞാൻ സന്തോഷവാനാണ്.”
തന്റെ സമപ്രായക്കാരെപ്പോലെ ഇന്ത്യയിലെ മറ്റ് സിനിമാ വ്യവസായങ്ങളിൽ പ്രവർത്തിക്കാൻ ആഗ്രഹിക്കുന്നില്ലേ? എന്ന ചോദ്യത്തിന് മറ്റ് വ്യവസായങ്ങളിലെ വലിയ സിനിമകൾ താൻ നിരസിച്ചിട്ടുണ്ടെന്ന് ടൊവിനോ മറുപടി നൽകി.
”മലയാളം, ഹിന്ദി, തെലുങ്ക്, തമിഴ് എന്നിങ്ങനെ എല്ലാ സിനിമാ വ്യവസായങ്ങളിലും അതിഗംഭീരരായ അഭിനേതാക്കളുണ്ട്. ഞാനല്ലാതെ മറ്റൊരു നടനും അഭിനയിക്കാൻ കഴിയാത്ത ഒരു കഥാപാത്രമുണ്ടെങ്കിൽ, അതെ, ഞാൻ ആ വേഷം ചെയ്യും. എന്തിനാണ് എന്നെ മറ്റൊരു ഇൻഡസ്ട്രിയിൽ അഭിനയിക്കാൻ സമീപിക്കുന്നത് എന്നതിന് ശക്തമായ കാരണമുണ്ടാകണം.. എനിക്ക് അത് കൃത്യമായി ബോധ്യപ്പെടണം”- ടൊവിനോ പറഞ്ഞു.
“അജയന്റെ രണ്ടാം മോചനത്തിന്റെ പകുതി പൂർത്തിയായി. അവധി കഴിഞ്ഞ് തിരിച്ചെത്തിയാലുടൻ രണ്ടാം പകുതി ഷൂട്ട് ചെയ്യും. പീരിയഡ് ചിത്രമായതിനാൽ പോസ്റ്റ് പ്രൊഡക്ഷൻ ജോലികൾ ഏറെയുള്ളതിനാൽ ഡിസംബറിൽ റിലീസ് ചെയ്തേക്കും. അല്ലെങ്കിൽ അതിനു ശേഷം” – ടൊവിനോ പറഞ്ഞു. ജൂഡ് ആന്റണി ജോസഫിന്റെ ‘2018’, ജിതിൻ ലാലിന്റെ ‘അജയന്റെ രണ്ടാം മോഷണം’ എന്നീ ചിത്രങ്ങളാണ് ടൊവിനോയുടെതായി അണിയറയിൽ ഒരുങ്ങുന്നത്.
മിന്നൽ മുരളി 2 എപ്പോൾ എത്തും എന്ന ചോദ്യത്തിന് “അത് തീർച്ചയായും സംഭവിക്കും, എപ്പോഴാണ് എന്നതുമാത്രമാണ് ചിന്തിക്കേണ്ടത്. ബേസിൽ ജോസഫ് ഇപ്പോൾ ഒരു അച്ഛനായതിന്റെ സന്തോഷത്തിലും മറ്റു ജോലികളുടെ തിരക്കിലുമാണ്. മിന്നൽ മുരളി ഓർഗാനിക് ആയി സംഭവിച്ചു, സമയമാകുമ്പോൾ ഇതും സംഭവിക്കും.” എന്നാണ് ചിരിച്ചുകൊണ്ട് ടൊവിനോയുടെ മറുപടി.
നിലവിൽ, സ്കാൻഡിനേവിയയിൽ അവധിക്കാലം ആഘോഷിക്കുകയാണ് ടൊവിനോയും കുടുംബവും.
തന്റെ മാതാപിതാക്കളുടെ 40-ാം വാർഷികം ആഘോഷിക്കുന്ന ചിത്രങ്ങൾ ടൊവിനോ സോഷ്യൽമീഡിയയിൽ പങ്കുവച്ചിരുന്നു. ഒരുപാട് പ്രതിബദ്ധതകൾ ഉണ്ടായിരുന്നതിനാൽ നേരത്തെ യാത്ര ചെയ്യാൻ സമയമില്ലായിരുന്നു, പക്ഷെ ഇനി ഇടവേളകൾ തീർച്ചയായും ഒരു ശീലമാക്കാൻ താൻ ആഗ്രഹിക്കുന്നതായും ടൊവിനോ കൂട്ടിച്ചേർത്തു. കുടുംബത്തോടൊപ്പം യൂറോപ്പിലേക്ക് പോകുന്നതിന് മുമ്പ്, വന്യജീവികളും സഫാരികളും ആസ്വദിക്കാൻ ടൊവിനോയും കുടുംബവും ആഫ്രിക്കയിലെ ചില രാജ്യങ്ങൾ സന്ദർശിച്ചിരുന്നു. നമീബിയ, ബോട്സ്വാന, സിംബാബ്‌വെ എന്നിവിടങ്ങളിൽ ഭാര്യയ്ക്കും കുട്ടികൾക്കുമൊപ്പം ഒരു അത്ഭുതകരമായ യാത്ര നടത്തിയാതായി ടൊവിനോ പറഞ്ഞു.
