ഭഗവാന്‍ ശ്രീകൃഷ്ണനെ വിവാഹം കഴിച്ച് യുവതി. ആചാരപ്രകാരം നടന്ന വിവാഹ ചടങ്ങില്‍ പെണ്‍കുട്ടിയുടെ കുടുംബാംഗങ്ങളെല്ലാവരും പങ്കെടുത്തു. ഉത്തര്‍പ്രദേശിലെ ഔറൈയ്യയിലാണ് സംഭവം. മകളുടെ തീരുമാനത്തില്‍ മാതാപിതാക്കള്‍ സന്തുഷ്ടരായിരുന്നു എന്നതാണ് ഈ വിവാഹത്തിന്റെ പ്രത്യേകത. ഭഗവാന്‍ ശ്രീകൃഷ്ണന് ഇപ്പോള്‍ ഞങ്ങളുടെ ബന്ധുവായി മാറിയിരിക്കുന്നുവെന്നും ഇനി ഞങ്ങള്‍ അദ്ദേഹത്തെ മരുമകനായി ആരാധിക്കുമെന്നുമാണ് വധുവിന്റെ പിതാവ് പറയുന്നത്.
യുപിയിലെ ബിധുന സ്വദേശിയായ രക്ഷ (30) എന്ന യുവതിയാണ് ഇപ്രകാരം വിവാഹം ചെയ്തിരിക്കുന്നത്. എംഎ പഠനത്തിന് ശേഷം എല്‍എല്‍ബി ചെയ്യുകയാണ് രക്ഷ. ചെറുപ്പം മുതലെ രക്ഷ ശ്രീകൃഷ്ണഭക്ത ആയിരുന്നു. അവളുടെ മാതാപിതാക്കള്‍ വിവാഹത്തെക്കുറിച്ച് സംസാരിക്കുമ്പോളും രക്ഷയുടെ ഉള്ളില്‍ കൃഷ്ണനായിരുന്നു. അതിനിടയില്‍ ഒരു ദിവസം കൃഷ്ണന്‍ തന്റെ സ്വപ്നത്തില്‍ പ്രത്യക്ഷപ്പെട്ടതായി രക്ഷ പറഞ്ഞു. സ്വപ്നത്തില്‍, കൃഷ്ണനെ ഭര്‍ത്താവായി കണക്കാക്കി അവള്‍ ഹാരമണിയിച്ചു. അന്നുമുതല്‍ രക്ഷ തന്റെ വരനായി ശ്രീകൃഷ്ണനെ സങ്കല്‍പ്പിക്കുകയും എല്ലാ കാര്യങ്ങളും മാതാപിതാക്കളോട് പറയുകയും അവരെ വിവാഹത്തിന് സമ്മതിപ്പിക്കുകയും ചെയ്തു.
തുടര്‍ന്ന് മകളുടെ സന്തോഷത്തിനായി അവരും വിവാഹത്തിന് സമ്മതിക്കുകയായിരുന്നു. തുടര്‍ന്ന് മാര്‍ച്ച് 11 ന് ഹൈന്ദവ ആചാപ്രകാരം രക്ഷ വിവാഹിതയായി. ശ്രീകൃഷ്ണനെ തന്റെ ഭര്‍ത്താവായി കിട്ടിയതിനാല്‍ തന്നെ രക്ഷ ഏറെ സന്തോഷത്തിലാണ്.മകളുടെ സന്തോഷത്തിലാണ് തങ്ങളുടെ സന്തോഷമെന്ന് രക്ഷയുടെ മാതാപിതാക്കള്‍ ആജ് തക്കിനോട് പറഞ്ഞു. എല്ലാ ഹൈന്ദവ ആചാരങ്ങളും പാലിച്ചാണ് ഞങ്ങള്‍ മകളെ ശ്രീകൃഷ്ണന് വിവാഹം കഴിപ്പിച്ചത് .ഇനി ശ്രീകൃഷ്ണന് നമ്മുടെ മരുമകനായി വീട്ടില്‍ ഇരിക്കുമെന്നും അതിനാല്‍ ഏറെ സന്തോഷത്തിലാണെന്നും പെണ്‍കുട്ടിയുടെ മാതാപിതാക്കള്‍ പറഞ്ഞു.
