യു.എ.ഇ ആതിഥ്യമരുളുന്ന പ്രഥമ ഇന്‍റർനാഷനൽ ലീഗ് ട്വന്‍റി 20 ചാമ്പ്യൻഷിപ്പ് യു.എ.ഇ ക്രിക്കറ്റിന് കരുത്ത് പകരുമെന്ന് വെസ്റ്റിൻഡീസ് താരങ്ങളായ കീറൺ പൊള്ളാഡും ഡ്വൈൻ ബ്രാവോയും. ജെ.ബി.എസ് ഗ്രൂപ്പ്‌ ഓഫ് കമ്പനിയുടെ ആസ്ഥാനമായ ജെ.ബി.എസ് ഗവൺമെന്‍റ് ട്രാൻസക്ഷൻ സെന്‍ററിൽ ഗോൾഡൻ വിസ ഏറ്റുവാങ്ങാൻ എത്തിയതായിരുന്നു ഇരുവരും.
നിരവധി യുവതാരങ്ങളുള്ള നാടാണ് യു.എ.ഇ. ഇവർക്ക് ക്രിക്കറ്റിൽ കൂടുതൽ അവസരങ്ങൾ ലഭിക്കാൻ ഈ ചാമ്പ്യൻഷിപ്പ് ഉപകാരപ്പെടും. മികച്ച പരിശീലകരുടെ കീഴിൽ പരിശീലനം നടത്താൻ അവർക്ക് അവസരം ലഭിക്കുമെന്നും ഇരുവരും പറഞ്ഞു. വരും ലോകകപ്പിൽ കൂടുതൽ മികച്ച പ്രകടനം നടത്താൻ വെസ്റ്റിൻഡീസ് ടീമിന് കഴിയുമെന്നാണ് പ്രതീക്ഷയെന്ന് കിറോൺ പൊള്ളാഡ് വ്യക്തമാക്കി. ചെന്നൈയുടെ ബൗളിങ് പരിശീലകൻ എന്നത് കൂടുതൽ ഉത്തരവാദിത്വം നൽകുന്നുവെന്നും യുവ ബൗളർമാരെ പ്രചോദിപ്പിക്കാൻ ഈ അവസരം ഉപയോഗപ്പെടുത്തമെന്നും ബ്രാവോ പറഞ്ഞു. ജെ.ബി.എസ് ഗ്രൂപ്പ്‌ ഓഫ് കമ്പനിയുടെ ആസ്ഥാനമായ ജെ.ബി.എസ് ഗവണ്മെന്‍റ് ട്രാൻസക്ഷൻ സെന്‍ററിൽ ഗോൾഡൻ വിസ സ്വീകരിക്കുന്നതിന് എത്തിയ താരങ്ങൾക്ക് ഊഷ്മള സ്വീകരണമാണ് ഒരുക്കിയത്.
