റഷ്യയിൽ നിന്ന് ക്രൂഡ് ഓയിലും പ്രകൃതിവാതകവും വാങ്ങുന്ന ഇന്ത്യയും ചൈനയും ഉൾപ്പെടെയുള്ള രാജ്യങ്ങൾക്കുമേൽ ഏർപ്പെടുത്താൻ നിർദ്ദേശിച്ചിരുന്ന ഉയർന്ന ഇറക്കുമതി താരിഫ് ഭീഷണിയിൽ ഇളവ് വരുത്തി യുഎസ് സെനറ്റ്. റഷ്യക്കെതിരായ പുതിയ ഉപരോധ ബില്ലിന്റെ പരിഷ്കരിച്ച പതിപ്പിലാണ് അമേരിക്ക ഈ ഭേദഗതി വരുത്തിയിരിക്കുന്നത്.
റിപ്പബ്ലിക്കൻ, ഡെമോക്രാറ്റിക് പാർട്ടി അംഗങ്ങളുടെ സംയുക്ത പിന്തുണയോടെയാണ് പുതിയ നിയമനിർമ്മാണം മുന്നോട്ട് പോകുന്നത്. റഷ്യൻ ഉദ്യോഗസ്ഥരെയും ധനകാര്യ സ്ഥാപനങ്ങളെയും ഊർജ്ജ പദ്ധതികളെയും ലക്ഷ്യമിട്ട് മോസ്കോയ്ക്ക് മേലുള്ള സമ്മർദ്ദം ശക്തമാക്കുകയാണ് ബില്ലിന്റെ പ്രധാന ലക്ഷ്യം. ഒപ്പം, ഉയർന്ന നികുതി ചുമത്തി റഷ്യൻ ഊർജ്ജത്തെ ആശ്രയിക്കുന്നത് കുറയ്ക്കാൻ പ്രമുഖ ഇന്ധന ഉപഭോക്തൃ രാജ്യങ്ങളെ നിർബന്ധിതരാക്കുകയും ചെയ്യും.
റോയിട്ടേഴ്സിന്റെ റിപ്പോർട്ട് പ്രകാരം, റഷ്യൻ എണ്ണയും പ്രകൃതിവാതകവും വൻതോതിൽ വാങ്ങുന്ന മൂന്നാം കക്ഷി രാജ്യങ്ങൾക്കുമേൽ ചുമത്താവുന്ന പരമാവധി നികുതി 100 ശതമാനമായി പരിഷ്കരിച്ച ബില്ലിൽ കുറച്ചിട്ടുണ്ട്. നേരത്തെയുള്ള നിർദ്ദേശത്തിൽ ഇത് 500 ശതമാനം വരെയുള്ള വൻ നികുതി ഭീഷണിയായിരുന്നു. അന്തരിച്ച യുഎസ് സെനറ്റർ ലിൻഡ്സെ ഗ്രഹാം ആയിരുന്നു ഈ ബില്ലിന്റെ പ്രധാന വക്താവ്. ഉക്രെയ്ൻ സന്ദർശന വേളയിൽ യു.എസ് പ്രസിഡന്റ് ഡൊണാൾഡ് ട്രംപുമായി ചേർന്ന് ഈ നിയമവുമായി മുന്നോട്ട് പോകാൻ ധാരണയിലെത്തിയതായി അദ്ദേഹം പ്രഖ്യാപിച്ചിരുന്നു. കഴിഞ്ഞ ശനിയാഴ്ചയാണ് ലിൻഡ്സെ ഗ്രഹാം അന്തരിച്ചത്.
റഷ്യൻ അസംസ്കൃത എണ്ണ ഏറ്റവും കൂടുതൽ വാങ്ങുന്ന അഞ്ച് പ്രമുഖ രാജ്യങ്ങളെയാണ് ബില്ലിൽ പ്രധാനമായും ലക്ഷ്യമിടുന്നത്. ചൈന, ഇന്ത്യ, സ്ലൊവാക്യ, ഹംഗറി, അസർബൈജാൻ എന്നിവയാണ് ഈ രാജ്യങ്ങളെന്ന് സെനറ്റ് വൃത്തങ്ങൾ വ്യക്തമാക്കുന്നു. റഷ്യൻ പ്രകൃതിവാതകം ഏറ്റവും കൂടുതൽ ഇറക്കുമതി ചെയ്യുന്ന രാജ്യങ്ങളിൽ ചൈന, ഫ്രാൻസ്, ജപ്പാൻ, ഹംഗറി, ബെൽജിയം എന്നിവയും ഉൾപ്പെടുന്നു.
എന്നാൽ, റഷ്യയുടെ പ്രകൃതിവാതക കയറ്റുമതിയുടെ 15 ശതമാനത്തിൽ താഴെ മാത്രം ഇറക്കുമതി ചെയ്യുകയും വിതരണം കുറയ്ക്കാൻ നടപടികൾ സ്വീകരിക്കുകയും ചെയ്യുന്ന രാജ്യങ്ങൾക്ക് നിയമത്തിൽ ഇളവുകൾ അനുവദിച്ചിട്ടുണ്ട്. ഈ വ്യവസ്ഥ ജപ്പാൻ, ഫ്രാൻസ്, ഹംഗറി, ബെൽജിയം തുടങ്ങിയ രാജ്യങ്ങൾക്ക് ഗുണകരമായേക്കും.
നികുതികൾക്ക് പുറമെ, പാശ്ചാത്യ രാജ്യങ്ങളുടെ നിയന്ത്രണങ്ങൾക്ക് പുറത്ത് സർവീസ് നടത്തുന്ന റഷ്യയുടെ ‘ഷാഡോ ഫ്ലീറ്റ്’ ടാങ്കറുകൾക്കെതിരെയും റഷ്യൻ സെൻട്രൽ ബാങ്ക് ഉൾപ്പെടെയുള്ള ധനകാര്യ സ്ഥാപനങ്ങൾക്കെതിരെയും ഉപരോധം ഏർപ്പെടുത്താൻ ബില്ലിൽ ശുപാർശയുണ്ട്. യാമൽ എൽഎൻജി, ആർട്ടിക് എൽ.എൻ.ജി തുടങ്ങിയ പ്രമുഖ റഷ്യൻ ഊർജ്ജ പദ്ധതികളെയും ബില്ലിൽ ലക്ഷ്യമിടുന്നു. അതേസമയം, യു.എസിന്റെ ദേശീയ താൽപ്പര്യങ്ങൾക്ക് അനുസൃതമാണെന്ന് ബോധ്യപ്പെട്ടാൽ ഉപരോധം ഒഴിവാക്കാൻ പ്രസിഡന്റ് ട്രംപിന് അനുമതി നൽകുന്ന പ്രത്യേക വ്യവസ്ഥയും പരിഷ്കരിച്ച ബില്ലിലുണ്ട്.
