നമ്മുടെ നിത്യജീവിതത്തിലെ ഭക്ഷണശീലങ്ങളിൽ നിന്ന് പഞ്ചസാര പൂർണമായും ഒഴിവാക്കുന്നത് അത്ര എളുപ്പമുള്ള കാര്യമല്ല. ശരീരത്തിന് പെട്ടെന്ന് ഊർജം നൽകുന്ന ഒരുതരം കാർബോഹൈഡ്രേറ്റാണ് പഞ്ചസാര. എന്നാൽ ഇതിന്റെ ഉപയോഗം പല ആരോഗ്യപ്രശ്നങ്ങൾക്കും കാരണമാകാറുണ്ട്. അമിതമായ പഞ്ചസാരയുടെ ഉപയോഗം അമിതവണ്ണം, പ്രമേഹം, ഹൃദയരോഗങ്ങൾ എന്നിവയിലേക്ക് നയിക്കാം.
സംസ്കരിച്ച ഭക്ഷണങ്ങളും മധുരപാനീയങ്ങളും ഒഴിവാക്കണമെന്ന് വിദഗ്ധർ നിർദേശിക്കാറുണ്ട്. ‘ദ ന്യൂട്രീഷ്യൻ സോഴ്സ്’ പുറത്തുവിട്ട റിപ്പോർട്ട് പ്രകാരം, മുതിർന്നവർ ഒരു ദിവസം ഉപയോഗിക്കുന്ന പഞ്ചസാരയുടെ അളവ് 6 മുതൽ 9 ടീസ്പൂൺ വരെ (24–36 ഗ്രാം) കവിയാൻ പാടില്ല. സർട്ടിഫൈഡ് ന്യൂട്രീഷ്യനിസ്റ്റും ഹോർമോൺ ആരോഗ്യ വിദഗ്ധയുമായ ഡോ.അനാമിക രഘുവൻഷി, “പഞ്ചസാര ഒരു ലഹരിപോലെ നിങ്ങളുടെ തലച്ചോറിനെ എങ്ങനെ ബാധിക്കുന്നു” എന്നതിനെക്കുറിച്ച് അടുത്തിടെ വിശദീകരിക്കുകയുണ്ടായി.
“ഭൂരിഭാഗം ആളുകളുടെയും പ്രശ്നം ഇച്ഛാശക്തിയുടെ കുറവല്ല, മറിച്ച് രക്തത്തിലെ പഞ്ചസാരയുടെ അളവിലുണ്ടാകുന്ന വ്യതിയാനമാണ്.” തന്റെ ഇൻസ്റ്റാഗ്രാം പോസ്റ്റിലൂടെ 10 ദിവസത്തെ ഒരു ‘ഡിറ്റോക്സ് ചലഞ്ച്’ അവർ നിർദേശിച്ചു. ഈ ചുരുങ്ങിയ കാലയളവിലേക്ക് പഞ്ചസാര ഉപേക്ഷിച്ചാൽ പോലും, നിങ്ങളുടെ ശരീരം അതിന്റെ പ്രവർത്തനങ്ങളെ പുനക്രമീകരിക്കാൻ തുടങ്ങുമെന്ന് അവർ വെളിപ്പെടുത്തി.
പഞ്ചസാരയുടെ ഉപയോഗം കുറയ്ക്കുമ്പോൾ നിങ്ങളുടെ ഊർജനില സുസ്ഥിരമാകുന്നു, അമിതമായ ഭക്ഷണത്തോടുള്ള ആർത്തി കുറയുന്നു, ചർമ്മം തെളിയുന്നു, വയറിലെ വീർപ്പുമുട്ടൽ മാറുന്നു, കൂടാതെ മനസിന് കൂടുതൽ ഉന്മേഷം തോന്നുകയും ചെയ്യുന്നു. ഇതിന് പിന്നിൽ മാന്ത്രികവിദ്യയൊന്നുമില്ല; മറിച്ച്, ഇൻസുലിൻ പെട്ടെന്ന് കൂടുന്നത് ഒഴിവാകുന്നതിലൂടെ ശരീരത്തിലെ വീക്കം കുറയുന്നതാണ് കാരണമെന്ന് അവർ അഭിപ്രായപ്പെട്ടു.
പഞ്ചസാരയോടുള്ള ആസക്തി തടയാൻ 10 ദിവസത്തെ ഡിറ്റോക്സ് ചലഞ്ച്
പഞ്ചസാര ഉപേക്ഷിച്ചതിന് ശേഷം 10 ദിവസം സ്വയം നിരീക്ഷിക്കാൻ ഡോ.അനാമിക നിർദേശിച്ചു. ആ തിരിച്ചറിവ് മാത്രം മതി നിങ്ങളുടെ ആരോഗ്യത്തിൽ മാറ്റങ്ങൾ വരുത്താനെന്ന് അവർ പറഞ്ഞു.
- 1–3 ദിവസങ്ങൾ: നിങ്ങൾക്ക് ഭക്ഷണത്തോടുള്ള കൊതി കൂടാനും പെട്ടെന്ന് ദേഷ്യം വരാനും സാധ്യതയുണ്ട്.
- 4–6 ദിവസങ്ങൾ: നിങ്ങളുടെ ഊർജ നില കൂടുതൽ സ്ഥിരതയുള്ളതായി മാറിയേക്കാം.
- 7–10 ദിവസങ്ങൾ: നിങ്ങളുടെ ചർമ്മം കൂടുതൽ തെളിച്ചമുള്ളതാകാനും ഭക്ഷണത്തോടുള്ള അമിതമായ കൊതി കുറയാനും സാധ്യതയുണ്ട്.
