ഏഷ്യാ കപ്പിലെ സൂപ്പർ ഫോർ പോരാട്ടത്തിൽ ഇന്ത്യ ഇന്ന് ബംഗ്ലാദേശിനെ നേരിടും. ഇന്ത്യ പാകിസ്ഥാനെ വീഴ്ത്തിയപ്പോള് ശ്രീലങ്കയെ തകര്ത്ത ആത്മവിശ്വാസത്തിലാണ് ബംഗ്ലാദേശിന്റെ വരവ്. ദുബായ് അന്താരാഷ്ട്ര ക്രിക്കറ്റ് സ്റ്റേഡിയത്തിൽ രാത്രി 8 മണിക്ക് മത്സരം ആരംഭിക്കും. ഇന്നത്തെ മത്സരം വിജയിച്ച് ഫൈനലിൽ സ്ഥാനം ഉറപ്പിക്കാനാണ് ഇന്ത്യ ശ്രമിക്കുന്നത്. അതേസമയം ഇന്ത്യയെ അട്ടിമറിച്ച് ഫൈനലിലേക്ക് മുന്നേറാനാണ് ബംഗ്ലാദേശിന്റെ ലക്ഷ്യം. മത്സരം സോണി ടെന് ചാനലുകളിലും സോണി ലിവ് ആപ്പിലും തത്സമയം കാണാം.
ഇന്ത്യ-ബംഗ്ലാദേശ് നേർക്കുനേർ റെക്കോർഡ്:
ഇരുടീമുകളും തമ്മിലുള്ള നേർക്കുനേർ റെക്കോർഡിൽ ബംഗ്ലാദേശിനേക്കാൾ ഇന്ത്യയ്ക്കാണ് വ്യക്തമായ മുൻതൂക്കമുള്ളത്. ഇരുടീമുകളും തമ്മിൽ ഇതുവരെ ആകെ 17 ടി20 മത്സരങ്ങളാണ് കളിച്ചത്. ഇന്ത്യ 16 മത്സരങ്ങളിൽ വിജയിച്ചപ്പോള് ബംഗ്ലാദേശ് ഒരു മത്സരത്തിൽ മാത്രമേ ജയിച്ചിട്ടുള്ളൂ. അതിനാൽ,തങ്ങളുടെ റെക്കോർഡ് കൂടുതൽ ശക്തിപ്പെടുത്താനാണ് ഇന്ത്യ ഇന്ന് ശ്രമിക്കുക.
ബായ് ക്രിക്കറ്റ് സ്റ്റേഡിയം പിച്ച് റിപ്പോർട്ട്
ഇന്ത്യ-ബംഗ്ലാദേശ് മത്സരം ഇന്ന് ദുബായ് സ്റ്റേഡിയത്തിലാണ് നടക്കുന്നത്. ഏഷ്യാ കപ്പിൽ ഇന്ത്യ തങ്ങളുടെ മിക്ക മത്സരങ്ങളും കളിച്ചിട്ടുള്ളത് ഈ ഗ്രൗണ്ടിലാണ്. സ്പിൻ ബൗളർമാർക്ക് ഈ പിച്ച് സഹായകരമാണ്. ദുബായ് പിച്ചിലെ ഏറ്റവും ഉയർന്ന ടി20 സ്കോർ ഇന്ത്യ നേടിയ 222 ആണ്. ഏറ്റവും കുറഞ്ഞ സ്കോർ വെസ്റ്റ് ഇൻഡീസ് നേടിയ 56 ആണ്. ഈ മൈതാനത്ത് ശരാശരി സ്കോർ 145-155 ആണ്. 170 നും 180 നും ഇടയിലുള്ള സ്കോർ വിജയ ടോട്ടലായി കണക്കാക്കപ്പെടുന്നു. സ്റ്റേഡിയത്തിൽ ആകെ 93 ടി20 അന്താരാഷ്ട്ര മത്സരങ്ങളാണ് നടന്നത്. ഇതിൽ 46 മത്സരങ്ങൾ ആദ്യം ബാറ്റ് ചെയ്യുന്ന ടീമും 47 മത്സരങ്ങൾ രണ്ടാമത് ബാറ്റ് ചെയ്യുന്ന ടീമുമാണ് വിജയിച്ചത്. ലക്ഷ്യങ്ങൾ പിന്തുടരുന്ന ടീമുകളാണ് ഈ മൈതാനത്ത് കൂടുതൽ മത്സരങ്ങൾ ജയിച്ചത്.
