ഹാര്ട്ട് അറ്റാക്കിന് ഒരു മാസം മുന്നേ തന്നെ നമ്മുടെ ശരീരം ചില സൂചനകള് കാണിച്ചു തരും. ഇത്തരത്തിലെ ചില ലക്ഷണങ്ങളെക്കുറിച്ചറിയാം.
ഹാര്ട്ട് അറ്റാക്ക് അഥവാ ഹൃദയാഘാതം പെട്ടെന്ന് ആളുകളുടെ ജീവനെടുക്കുന്നതില് പ്രധാന വില്ലനാണ്. പലര്ക്കും ഹൃദയാഘാതം വരുന്നതിന് മുന്നോടിയായുള്ള പല ലക്ഷണങ്ങളും തിരിച്ചറിയാന് സാധിയ്ക്കാതെ വരും. ഇതാണ് ചികിത്സ തേടുന്നതിന് വില്ലനായി മാറുന്നതും. വാസ്തവത്തില് ഹൃദയാഘാതം അനുഭവപ്പെടുന്നതിന് മുന്നേയായി ശരീരം ചില പ്രത്യേക ലക്ഷണങ്ങള് കാണിയ്ക്കുന്നു. ഇത്തരം ചില ലക്ഷണങ്ങള് അനുഭവപ്പെട്ടാല് നാം അത് നിസാരമായി കളയരുത്. ഇതെക്കുറിച്ചറിയാം.
നെഞ്ചിലെ അസ്വസ്ഥത
ഹൃദയാഘാതത്തിൻ്റെ മുന്നറിയിപ്പ് ലക്ഷണങ്ങളിൽ പ്രധാനമാണ് നെഞ്ചിലെ അസ്വസ്ഥത. ഇത് നെഞ്ചിൽ ഭാരം കയറ്റിവെച്ചപോലെയോ, എരിച്ചിലോ, നെഞ്ചിലൊരു കനം പോലെയോആകാം. ഈ അസ്വസ്ഥത കുറച്ചു നേരത്തേക്ക് വരികയോ, ആഴ്ചകളോളം പല ദിവസങ്ങളിൽ ആവർത്തിക്കുകയോ ചെയ്യാം. നെഞ്ചിലെ ഈ ബുദ്ധിമുട്ട് നെഞ്ചെരിച്ചിലിൻ്റെ ലക്ഷണങ്ങളോട് സാമ്യമുള്ളതാണ്. എന്നാൽ നെഞ്ചെരിച്ചിൽ പോലെ ഇത് തോളുകളിലേക്കോ, കഴുത്തിലേക്കോ, താടിയിലേക്കോ, കൈകളിലേക്കോ വ്യാപിക്കാം. കൊളസ്ട്രോൾ അടിഞ്ഞുകൂടി ധമനികൾ ഇടുങ്ങിയതാകുമ്പോൾ ഹൃദയത്തിന് ആവശ്യത്തിന് ഓക്സിജന് അടങ്ങിയ രക്തം ലഭിക്കാതെ വരുന്നു. വ്യായാമം ചെയ്യുമ്പോളോ, മാനസിക സമ്മർദ്ദമുണ്ടാകുമ്പോളോ, അനങ്ങാതെ ഇരിക്കുമ്പോളോ ഈ നെഞ്ചുവേദന ഉണ്ടാകാം.
ക്ഷീണം
ശരീരത്തിന് മതിയായ വിശ്രമം കിട്ടിയാലും, ക്ഷീണം മാറാതെ തുടരുന്നത് ശ്രദ്ധിക്കണം. ഇത് സാധാരണ ക്ഷീണമല്ല. ഡോക്ടറെ കാണേണ്ട ഒരു സൂചനയാണിത്. ഹൃദയം രക്തം പമ്പ് ചെയ്യുന്നതിൽ കുറവ് വരുമ്പോൾ, ശരീരത്തിലെ അവയവങ്ങൾക്ക് ഓക്സിജൻ കിട്ടാതെ വരുന്നു. അതുകൊണ്ടാണ് ക്ഷീണം തോന്നുന്നത്. ഇത് ഹൃദയാഘാതത്തിനോട് അനുബന്ധിച്ച് ഉണ്ടാകുന്ന ഒരു ലക്ഷണമാണ്. ഇതിന് വൈദ്യ സഹായം തേടേണ്ടത് അത്യാവശ്യമാണ്. പലപ്പോഴും ആളുകൾ ഇത് വെറും ടെൻഷനോ പ്രായമാകുന്നതിന്റെ ബുദ്ധിമുട്ടോ ആണെന്ന് കരുതി അവഗണിക്കുന്നു. എന്നാൽ ഇത് പിന്നീട് വലിയ ആരോഗ്യ പ്രശ്നങ്ങളിലേക്ക് നയിക്കാം. പേശികൾക്കും മറ്റ് അവയവങ്ങൾക്കും വേണ്ടത്ര ഓക്സിജൻ ലഭിക്കാതെ വരുമ്പോൾ, ദൈനംദിന കാര്യങ്ങൾ ചെയ്യാൻ പോലും ബുദ്ധിമുട്ടുണ്ടാകുന്നു. അതുകൊണ്ട് കാരണമില്ലാത്ത ക്ഷീണം അനുഭവപ്പെട്ടാൽ ഉടൻ തന്നെ ഡോക്ടറെ സമീപിക്കുക.
ശ്വാസം മുട്ടൽ
നടക്കുമ്പോഴോ പടികൾ കയറുമ്പോഴോ ശ്വാസം മുട്ടൽ അനുഭവപ്പെടുന്നുവെങ്കില് ശ്രദ്ധ വേണം. ഇതും ഹൃദയാഘാത്തിന് സൂചനയായി വരാം. ലഘുവായ ജോലികൾ ചെയ്യുമ്പോൾ ശ്വാസം കിട്ടാത്തത് പോലെ തോന്നുകയോ കൂടുതൽ കിതപ്പ് അനുഭവപ്പെടുകയോ ചെയ്താൽ ഒരു ഡോക്ടറെ കാണുന്നത് നല്ലതാണ്. ഹൃദയം ദുർബലമാകുമ്പോൾ ശ്വാസകോശത്തിൽ നീര് വന്ന് ശ്വാസമെടുക്കാൻ ബുദ്ധിമുട്ടുണ്ടാക്കുന്നു. നെഞ്ചുവേദനയും ശ്വാസംമുട്ടലും ഒരുമിച്ചുണ്ടെങ്കിൽ ദിവസങ്ങൾക്കുള്ളിൽ രോഗം മൂർച്ഛിക്കാം. ഈ ലക്ഷണം അവഗണിക്കരുത്. കാരണം ഇത് ശരീരത്തിന്റെ ചലനത്തെ തടസ്സപ്പെടുത്തുകയും വിശ്രമിക്കുമ്പോൾ പോലും അനുഭവപ്പെടുകയും ചെയ്യും. ശ്വാസം കിട്ടാത്തത് പോലെ തോന്നുക അല്ലെങ്കിൽ കൂടുതൽ കിതപ്പ് അനുഭവപ്പെടുക എന്നത് ഒരു പ്രധാന ലക്ഷണമാണ്. അതിനാൽ, ഇത്തരം ലക്ഷണങ്ങൾ കണ്ടാൽ ഉടൻ തന്നെ വൈദ്യ സഹായം തേടുക.
തലകറക്കം
തല കറക്കത്തിന് പല കാരണങ്ങളുമുണ്ട്. ചില ഹൃദയ പ്രശ്നങ്ങൾ തലകറക്കത്തിന് കാരണമാകാറുണ്ട്. ഹൃദയം ശരിയായി പ്രവർത്തിക്കാത്തതാണ് ഇതിന് പ്രധാന കാരണം. രക്തവും ഓക്സിജനും ശരീരത്തിൽ എത്താതെ വരുമ്പോൾ തലകറക്കം അനുഭവപ്പെടുന്നു.ശരീരത്തിലേക്ക് രക്തം കുറയുമ്പോൾ തലകറക്കം ഉണ്ടാകാം. ഇത് പെട്ടന്നോ, തുടർച്ചയായോ വരാം. ഹൃദയത്തിന് രക്തം പമ്പ് ചെയ്യാൻ കഴിയാതെ വരുമ്പോൾ ക്രമമില്ലാത്ത ഹൃദയമിടിപ്പും കുറഞ്ഞ രക്തസമ്മർദ്ദവും ഉണ്ടാകുന്നു. വേഗത്തിൽ എഴുന്നേൽക്കുമ്പോൾ തലകറങ്ങാനും ബോധം പോകാനും സാധ്യതയുണ്ട്. നെഞ്ചുവേദനയോ ശ്വാസതടസ്സമോ ഉണ്ടെങ്കിൽ ഉടൻ ഡോക്ടറെ കാണണം. കാരണം ഇത് ബാലൻസ് തെറ്റാനും അപകടങ്ങൾ ഉണ്ടാകാനും സാധ്യതയുണ്ട്.
ഹൃദയമിടിപ്പ് ക്രമം തെറ്റുന്നത്
ഹൃദയമിടിപ്പ് ക്രമം തെറ്റുന്നത് അത്ര നിസ്സാരമായി കാണരുത്. ഹൃദയത്തിന് കൂടുതൽ ആയാസം വരുമ്പോളാണ് ഇങ്ങനെ സംഭവിക്കുന്നത്. ഇത് ഹൃദയത്തിന്റെ താളം തെറ്റിക്കുകയും രോഗങ്ങൾ വരാനുള്ള സാധ്യത കൂട്ടുകയും ചെയ്യുന്നു. പെട്ടന്നുള്ള ഹൃദയമിടിപ്പ്, ക്രമം തെറ്റിയുള്ള മിടിപ്പ്, നെഞ്ചിടിപ്പ് കൂടുന്നത് എന്നിവ ശ്രദ്ധയിൽ പെട്ടാൽ ഉടൻ ഡോക്ടറെ കാണുക. ഇത് ഹൃദയാഘാതത്തിനുള്ള സാധ്യത വർദ്ധിപ്പിക്കും.
തുടക്കത്തിൽ തന്നെ ചികിത്സിച്ചാൽ ഹൃദയ സംബന്ധമായ രോഗങ്ങൾ കണ്ടെത്താനും മാറ്റാനും സാധിക്കും. അതിനാൽ, ക്രമം തെറ്റിയ ഹൃദയമിടിപ്പ് അനുഭവപ്പെട്ടാൽ ഉടൻ വൈദ്യ സഹായം തേടുക.
