ഭക്ഷ്യവസ്തുക്കള്‍, പഴം, പച്ചക്കറികള്‍ എന്നിവയുടെ വ്യാപാരത്തിനായി ലോകത്തെ ഏറ്റവും വലിയ ലോജിസ്റ്റിക്സ് ഹബ്ബ് വികസിപ്പിക്കാന്‍ ദുബായ് ഒരുങ്ങുന്നു. ഇതുമായി ബന്ധപ്പെട്ട കരാറില്‍ ദുബായ് മുനിസിപ്പാലിറ്റിയും ഡിപി വേള്‍ഡും ഒപ്പുവച്ചു. ദുബായ് മാര്‍ക്കറ്റിനെ ആഗോള വിപണികളുമായി ബന്ധിപ്പിക്കാനാണ് ഇതിലൂടെ ലക്ഷ്യമിടുന്നത്.
വിപുലീകരണ പദ്ധതിയുടെ ഭാഗമായി നിലവിലെ ദുബായ് പഴം, പച്ചക്കറി വിപണിയുടെ നിലവിലെ വലുപ്പം ഇരട്ടിയാക്കി വര്‍ധിപ്പിക്കാനും ധാരണയായി.ദുബായ് ഫസ്റ്റ് ഡെപ്യൂട്ടി ഭരണാധികാരിയും ഉപപ്രധാനമന്ത്രിയും യുഎഇ ധനമന്ത്രിയുമായ ശെയ്ഖ് മക്തൂം ബിന്‍ മുഹമ്മദ് ബിന്‍ റാഷിദ് അല്‍ മക്തൂമാണ് ഈ മെഗാ പദ്ധതി പ്രഖ്യാപിച്ചത്.
ഭക്ഷ്യവസ്തുക്കള്‍, പഴങ്ങള്‍, പച്ചക്കറികള്‍ എന്നിവയുടെ വ്യാപാരത്തിനായി ലോകത്തിലെ ഏറ്റവും വലിയ ലോജിസ്റ്റിക്സ് ഹബ് വികസിപ്പിക്കുന്നതിന് ദുബായ് മുനിസിപ്പാലിറ്റിയും ഡിപി വേള്‍ഡും തമ്മില്‍ ഒരു കരാര്‍ ഒപ്പിടുന്നതിന് താന്‍ സാക്ഷിയായതായി ശെയ്ഖ് മക്തൂം ബിന്‍ മുഹമ്മദ് ബിന്‍ റാഷിദ് തന്റെ ഔദ്യോഗിക എക്‌സ് അക്കൗണ്ടില്‍ പോസ്റ്റ് ചെയ്ത ഒരു പ്രസ്താവനയില്‍ വ്യക്തമാക്കി.
സമൂഹത്തിന്റെ വര്‍ദ്ധിച്ചുവരുന്ന ആവശ്യങ്ങള്‍ മികച്ച രീതിയില്‍ പരിഹരിക്കാന്‍ ലോജിസ്റ്റിക് ഹബ് സംവിധാനത്തിന് കഴിയുമെന്നും അദ്ദേഹം അഭിപ്രായപ്പെട്ടു.ദുബായ് മാര്‍ക്കറ്റിനെ ആഗോള വിപണികളുമായി ബന്ധിപ്പിക്കുന്നതിന് വേണ്ടിയാണ് ഇത്തരത്തിലൊരു വലിയ മാർക്കറ്റ് രൂപീകരിക്കാൻ തീരുമാനിച്ചിരിക്കുന്നത്.
നിലവിലെ ദുബായ് പഴം, പച്ചക്കറി മാർക്കറ്റിന്റെ രണ്ടിരട്ടിയാണ് പുതിയ മാർക്കറ്റിന്റെ വലുപ്പം.ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന്റെ ദര്‍ശനത്തിനും ശെയ്ഖ് ഹംദാന്‍ ബിന്‍ മുഹമ്മദ് അല്‍ മക്തൂമിന്റെ മേല്‍നോട്ടത്തിനും കീഴില്‍, ഏറ്റവും പുതിയ സവിശേഷതകളും മികച്ച നിലവാരവും നൂതന അടിസ്ഥാന സൗകര്യങ്ങളും നിക്ഷേപകര്‍ക്ക് കൂടുതല്‍ വാണിജ്യ, നിക്ഷേപ അവസരങ്ങളും സൃഷ്ടിക്കുന്നതില്‍ തങ്ങള്‍ പ്രതിജ്ഞാബദ്ധമാണ്.
രാജ്യത്തിന്റെ ഭക്ഷ്യസുരക്ഷ ഉറപ്പുവരുത്തുന്നതോടൊപ്പം ലോകത്തിന്റെ വിവിധ ഭാഗങ്ങളില്‍ നിന്ന് പഴം, പച്ചക്കറികള്‍ എത്തിച്ച് അത് മറ്റുഭാഗങ്ങളിലേക്ക് കയറ്റി അയക്കുന്ന ലോജിസ്റ്റിക് ഹബ്ബാക്കി ദുബായിയെ മാറ്റുകയാണ് ഇതിലൂടെ ലക്ഷ്യമിടുന്നതെന്നും അദ്ദേഹം പറഞ്ഞു.
ഡിപി വേള്‍ഡ് നിയന്ത്രിക്കുന്ന പഴം പച്ചക്കറി വിപണിയുടെ വിപുലീകരണം കൂടുതല്‍ നിക്ഷേപ അവസരങ്ങള്‍ സൃഷ്ടിക്കുമെന്ന് പ്രതീക്ഷിക്കുന്നു. രണ്ട് സ്ഥാപനങ്ങളും തമ്മില്‍ ഒപ്പുവെച്ച കരാറിന് കീഴില്‍, പഴം, പച്ചക്കറി മാര്‍ക്കറ്റിലെ എല്ലാ വ്യാപാര നടപടിക്രമങ്ങള്‍ക്കും ഒരു ഏകീകൃത വ്യാപാര വിന്‍ഡോയും ഉള്‍പ്പെടും.
