പത്തനംതിട്ട: സംസ്ഥാനത്ത് മഴ കനത്തതോടെ പമ്പകരകവിഞ്ഞു. തീരത്ത് താമസിക്കുന്നവർ ജാഗ്രത പാലിക്കാൻ ജില്ലാ ഭരണകൂടം നിർദേശം നൽകി. മൂഴിയാര്‍ സംഭരണി തുറന്നതും അഴുതയാറ്റിലൂടെ ഒഴുകിയെത്തിയ വെള്ളവും ജലനിരപ്പ് ഉയരാന്‍ കാരണമായിട്ടുണ്ട്.
പമ്പയുടെ താഴ്ന്ന പ്രദേശങ്ങളിലേക്കാണ് വെള്ളം കയറിത്തുടങ്ങിയിരിക്കുന്നത്. റാന്നി ഉപാസനക്കടവില്‍ നദി കരകവിഞ്ഞ് വെള്ളം റോഡിലേക്കും സമീപത്തെ വീടുകളിലേക്കും കയറിയിരുന്നു. അയിരൂര്‍, ആറന്മുള പ്രദേശങ്ങളിലും വള്ളം കയറി. പ്രധാന സംഭരണികളിലെ ജലനിരപ്പും ജില്ലാ ഭരണകൂടം സസൂക്ഷ്മം നിരീക്ഷിച്ചുവരികയാണ്. പത്തനംതിട്ട ജില്ലയില്‍ മണിമല, അച്ചന്‍കോവില്‍, കല്ലട നദികളിലും ജലനിരപ്പുയര്‍ന്നു.
