അക്രമം രൂക്ഷമായ മണിപ്പൂരില്‍ സമാധാന സമിതി രൂപീകരിച്ച് കേന്ദ്രസര്‍ക്കാര്‍. ഗവര്‍ണര്‍ അനുസൂയ ഉയ്കെയുടെ(Anusuiya Uikey) അധ്യക്ഷതയിലുള്ള സമിതിയില്‍ മുഖ്യമന്ത്രി, സംസ്ഥാന മന്ത്രിമാര്‍, എംപിമാര്‍, എംഎല്‍എമാര്‍, വിവിധ രാഷ്ട്രീയ പാര്‍ട്ടി നേതാക്കള്‍ എന്നിവര്‍ അംഗങ്ങളാണ്. മുന്‍ സര്‍ക്കാര്‍ ഉദ്യോഗസ്ഥര്‍, വിദ്യാഭ്യാസ വിദഗ്ധര്‍, സാഹിത്യകാരന്മാര്‍, കലാകാരന്മാര്‍, സാമൂഹിക പ്രവര്‍ത്തകര്‍, വംശീയ വിഭാഗങ്ങളുടെ പ്രതിനിധികള്‍ എന്നിവരും സമിതിയില്‍ ഉള്‍പ്പെടുന്നു.
കേന്ദ്ര ആഭ്യന്തര മന്ത്രി അമിത് ഷാ(Amit Shah) മെയ് 29 നും ജൂണ്‍ 1 നും ഇടയില്‍ മണിപ്പൂര്‍ സന്ദര്‍ശിച്ച് സമാധാന സമിതിയുടെ രൂപീകരണം പ്രഖ്യാപിച്ചിരുന്നു. ഈ സമിതി സാമൂഹിക ഐക്യവും പരസ്പര ധാരണയും ശക്തിപ്പെടുത്തുകയും വിവിധ വംശീയ വിഭാഗങ്ങള്‍ക്കിടയില്‍ സൗഹാര്‍ദ്ദപരമായ ആശയവിനിമയം സുഗമമാക്കുകയും വേണം.
മണിപ്പൂര്‍ കലാപവുമായി ബന്ധപ്പെട്ട് സംസ്ഥാനം റഫര്‍ ചെയ്ത ആറ് കേസുകള്‍ അന്വേഷിക്കാന്‍ ഡിഐജി റാങ്കിലുള്ള ഉദ്യോഗസ്ഥന്റെ കീഴില്‍ സിബിഐ 10 അംഗ പ്രത്യേക അന്വേഷണ സംഘത്തെ (എസ്‌ഐടി) രൂപീകരിച്ച് ഒരു ദിവസത്തിന് ശേഷമാണ് പുതിയ നീക്കം. വടക്കുകിഴക്കന്‍ സന്ദര്‍ശന വേളയില്‍ ആഭ്യന്തര മന്ത്രി അമിത് ഷായാണ് ആറ് എഫ്ഐആറുകളില്‍ സിബിഐ അന്വേഷണം പ്രഖ്യാപിച്ചത്. അതില്‍ അഞ്ചെണ്ണം ക്രിമിനല്‍ ഗൂഢാലോചനയും ഒന്ന് മണിപ്പൂരിലെ അക്രമത്തിന് പിന്നിലെ പൊതുവായ ഗൂഢാലോചനയുമാണ്.
നേരത്തെ സംസ്ഥാന ഉദ്യോഗസ്ഥരുമായി ഏകോപിപ്പിക്കാന്‍ ജോയിന്റ് ഡയറക്ടര്‍ ഘനശ്യാം ഉപാധ്യായയെ സിബിഐ അയച്ചിരുന്നു. അദ്ദേഹം മടങ്ങിയെത്തിയപ്പോള്‍ എസ്‌ഐടി രൂപീകരിക്കുകയായിരുന്നു. ഇതോടെ സംസ്ഥാന സര്‍ക്കാര്‍ നിര്‍ദ്ദേശിച്ച ആറ് കേസുകള്‍ ഏജന്‍സി വീണ്ടും രജിസ്റ്റര്‍ ചെയ്തു. കൊല്‍ക്കത്തയിലെ സ്പെഷ്യല്‍ ക്രൈംബ്രാഞ്ച് കേസുകള്‍ അന്വേഷിക്കുമെന്നും അവര്‍ പറഞ്ഞു.
മേയ് 3 ന് മലയോര ജില്ലകളില്‍ പട്ടികവര്‍ഗ (എസ്ടി) പദവി ആവശ്യപ്പെട്ടതില്‍ പ്രതിഷേധിച്ച് ‘ആദിവാസി ഐക്യദാര്‍ഢ്യ മാര്‍ച്ച്’ സംഘടിപ്പിച്ചതിന് പിന്നാലെയാണ് മണിപ്പൂരില്‍ അക്രമം പൊട്ടിപ്പുറപ്പെട്ടത്. ഇതുവരെ, ഏകദേശം 100 പേര്‍ക്ക് ജീവന്‍ നഷ്ടപ്പെട്ടു. 300-ലധികം പേര്‍ക്ക് പരിക്കേറ്റു. റിസര്‍വ് ഫോറസ്റ്റ് ഭൂമിയില്‍ നിന്ന് കുക്കി ഗ്രാമക്കാരെ ഒഴിപ്പിക്കുന്നതിനെച്ചൊല്ലിയുള്ള സംഘര്‍ഷം ചെറിയ പ്രക്ഷോഭങ്ങളുടെ പരമ്പരയിലേക്ക് നയിക്കുകയായിരുന്നു.
മണിപ്പൂരിലെ ജനസംഖ്യയുടെ 53 ശതമാനത്തോളം വരുന്ന മെയ്തീസ് ഇംഫാല്‍ താഴ്വരയിലാണ് കൂടുതലും താമസിക്കുന്നത്. ഗോത്രവര്‍ഗ്ഗക്കാര്‍ — നാഗകളും കുക്കികളും — ജനസംഖ്യയുടെ 40 ശതമാനവും മലയോര ജില്ലകളിലും താമസിക്കുന്നു. പുതിയ സാഹചര്യത്തില്‍ സംസ്ഥാനത്ത് സമാധാനം നിലനിര്‍ത്തുന്നതിനായി പതിനായിരത്തോളം ആര്‍മി, അസം റൈഫിള്‍സ് ഉദ്യോഗസ്ഥരെ വിന്യസിച്ചിട്ടുണ്ട്
