ജി 7 ഉച്ചകോടിയുടെ ഭാഗമായി ജപ്പാനിലെത്തിയ പ്രധാനമന്ത്രി നരേന്ദ്ര മോദി യുക്രെയ്ന്‍ പ്രസിഡന്റ് വോളോഡിമര്‍ സെലെന്‍സ്‌കിയുമായി ഉഭയകക്ഷി ചര്‍ച്ച നടത്താന്‍ ഒരുങ്ങുന്നതായി വൃത്തങ്ങള്‍ വാര്‍ത്താ ഏജന്‍സിയായ പിടിഐയോട് പറഞ്ഞു.
ഇന്ന് രാവിലെ പ്രധാനമന്ത്രി മോദി, ജാപ്പനീസ് പ്രധാനമന്ത്രി ഫ്യൂമിയോ കിഷിദ , ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍, വിയറ്റ്‌നാം പ്രധാനമന്ത്രി ഫാം മിന്‍ ചിന്‍ എന്നിവരുമായി ഉഭയകക്ഷി ചര്‍ച്ചകള്‍ നടത്തിയിരുന്നു. ഇന്ത്യയിലെയും യുക്രെയ്‌നിലെയും മുതിര്‍ന്ന നയതന്ത്രജ്ഞര്‍ തമ്മില്‍ നടത്തിയ ചര്‍ച്ചയെ തുടര്‍ന്നാണ് മോദിയും സെലന്‍സ്‌കിയും തമ്മില്‍ കൂടിക്കാഴ്ച്ച നടത്താന്‍ തീരുമാനിച്ചിരിക്കുന്നത്.
കഴിഞ്ഞ വര്‍ഷം ഫെബ്രുവരിയില്‍ യുക്രെയ്‌നിലുണ്ടായ റഷ്യന്‍ അധിനിവേശത്തിനുശേഷം പ്രധാനമന്ത്രി മോദിയും സെലന്‍സ്‌കിയും തമ്മില്‍ നടത്തുന്ന ആദ്യ കൂടിക്കാഴ്ച്ചയാണിത്. ജി 7 ഉച്ചകോടിയില്‍ പങ്കെടുക്കാന്‍ വെള്ളിയാഴ്ച്ചയാണ് പ്രധാനമന്ത്രി മോദി ഹിരോഷിമയിലെത്തിയത്. ജപ്പാന്റെ ക്ഷണത്തെ തുടര്‍ന്നാണ് യുക്രേനിയന്‍ പ്രസിഡന്റും ജി 7 ഉച്ചകോടിയില്‍ പങ്കെടുക്കുന്നത്. സെലന്‍സ്‌കി ഉച്ചകോടിയില്‍ പങ്കെടുക്കുമെന്ന് യുക്രെയ്നിന്റെ ദേശീയ സുരക്ഷാ-പ്രതിരോധ കൗണ്‍സില്‍ സെക്രട്ടറി ഒലെക്സി ഡാനിലോവ് പറഞ്ഞു. യുക്രെയ്ന്‍ സംഘര്‍ഷം ആരംഭിച്ചതുമുതല്‍ റഷ്യന്‍ പ്രസിഡന്റ് വ്ളാഡിമിര്‍ പുടിനോടും സെലന്‍സ്‌കിയുമായും മോദി നിരവധി തവണ സംസാരിച്ചിരുന്നു.
