ഫാഷന്‍ ഡിസൈനറും മോഡലുമായ യുവതിയെ കിടപ്പുമുറിയില്‍ തൂങ്ങിമരിച്ച നിലയില്‍ കണ്ടെത്തി. 25കാരിയായ മുസ്‌കന്‍ നാരംഗാണ് മരിച്ചത്. ഒരു ദിവസം മുമ്പ് ഇന്‍സ്റ്റാഗ്രാമില്‍ വീഡിയോ പോസ്റ്റ് ചെയ്ത ശേഷമായിരുന്നു ആത്മഹത്യ. മുസ്‌കാന്റെ കുടുംബാംഗങ്ങളെ പൊലീസ് ചോദ്യം ചെയ്തു. ഉത്തര്‍പ്രദേശിലെ മൊറാദാബാദിലെ സിവില്‍ ലൈന്‍ ഏരിയയിലാണ് സംഭവം.
താനാ സിവില്‍ ലൈന്‍സ് ഏരിയയിലെ രാം ഗംഗാ വിഹാര്‍ കോളനിയിലാണ് യുവതിയുടെ വീട്. ഡെറാഡൂണില്‍ നിന്ന് ഫാഷന്‍ ഡിസൈനിംഗ് കോഴ്സ് ചെയ്ത ശേഷം മുംബൈയില്‍ ജോലി ചെയ്ത് വരികയായിരുന്നു. ഇക്കഴിഞ്ഞ ഹോളിക്ക് വീട്ടിലെത്തിയ യുവതി പിന്നീട് തിരിച്ചുപോയില്ല. വ്യാഴാഴ്ച വീട്ടുകാര്‍ക്കൊപ്പം അത്താഴം കഴിച്ച ശേഷം മുസ്‌കാന്‍ കിടപ്പുമുറിയില്‍ ഉറങ്ങാന്‍ പോയതായി കുടുംബാംഗങ്ങള്‍ പറഞ്ഞു. വെള്ളിയാഴ്ച രാവിലെ വാതില്‍ തുറക്കാത്തതിനെ തുടര്‍ന്ന് വീട്ടുകാര്‍ മുറിയില്‍ കയറി പരിശോധിച്ചപ്പോഴാണ് മൃതദേഹം കണ്ടെത്തിയത്. ഇവര്‍ ഉടന്‍ തന്നെ ഇക്കാര്യം പോലീസിനെ അറിയിച്ചു. പോലീസ് സ്ഥലത്തെത്തി മുസ്‌കാന്റെ മൃതദേഹം പുറത്തെടുത്ത് പോസ്റ്റുമോര്‍ട്ടത്തിന് അയച്ചു. പൊലീസ് അന്വേഷണം ആരംഭിച്ചു.
ഒരു ദിവസം മുമ്പ് ഇന്‍സ്റ്റാഗ്രാമില്‍ വീഡിയോ
മരിക്കുന്നതിന് ഒരു ദിവസം മുമ്പ് മുസ്‌കാന്‍ തന്റെ ഇന്‍സ്റ്റാഗ്രാമില്‍ ഒരു വീഡിയോ പോസ്റ്റ് ചെയ്തു. തന്റെ അവസാന വീഡിയോ എന്ന മട്ടിലായിരുന്നു സംസാരം ആരംഭിച്ചത്. ‘ഇത് എന്റെ അവസാന വീഡിയോ ആയിരിക്കും. അതിനുശേഷം നിങ്ങള്‍ക്ക് എന്നെ കാണാന്‍ കഴിഞ്ഞേക്കില്ല. ആളുകള്‍ പറയുന്നു, നിങ്ങളുടെ ജീവിതത്തിലെ പ്രശ്‌നങ്ങള്‍ പങ്കിടണമെന്ന്, പങ്കിടുന്നതിലൂടെ എല്ലാം ശരിയാകുമെന്ന്, പക്ഷേ അതുപോലെ ഒന്നും സംഭവിച്ചില്ല.’
‘ഞാന്‍ ഒരുപാട് ശ്രമിച്ചു.എല്ലാവരോടും വിശദീകരിക്കാന്‍ ശ്രമിച്ചു. സഹോദരിമാര്‍, മാതാപിതാക്കള്‍, സുഹൃത്തുക്കള്‍, എന്നാല്‍ എല്ലാവരും വിപരീതമായാണ് കാര്യങ്ങള്‍ മനസിലാക്കിയത്. ഇന്ന് ഞാന്‍ ഈ ചെയ്യാന്‍ പോകുന്നത് എന്റെ സ്വന്തം ഇഷ്ടപ്രകാരമാണ്. ഇതില്‍ ആര്‍ക്കും പങ്കില്ല. അതുകൊണ്ട് ഞാന്‍ പോയതിന് ശേഷം മറ്റാരെയും കുറ്റപ്പെടുത്തരുത്. നിങ്ങള്‍ക്ക് ആത്മവിശ്വാസമില്ലെന്ന് ആളുകള്‍ പറയുന്നു.’- ഇത്രയും പറഞ്ഞ് മുസ്‌കാന്‍ തമാശ മൂഡില്‍ വീഡിയോ അവസാനിപ്പിച്ചു.
വീട്ടിലെ ഏറ്റവും മൂത്തകുട്ടി
മുസ്‌കാന്‍ നാരംഗിന് മൂന്ന് സഹോദരിമാരും ഒരു സഹോദരനുമുണ്ട്.അവരില്‍ ഏറ്റവും വലുത് മുസ്‌കാനായിരുന്നു. മുസ്‌കാന്റെ പിതാവ് ഡിസ്‌പോസിബിള്‍ ക്രോക്കറി വ്യവസായിയാണ്. യുവതിയുടെ മരണത്തെ തുടര്‍ന്ന് കുടുംബം ഞെട്ടലിലാണ്. ഒന്നും സംസാരിക്കാന്‍ പറ്റുന്ന അവസ്ഥയിലല്ല.
സിവില്‍ ലൈന്‍ മേഖലയില്‍ ഒരു പെണ്‍കുട്ടി ആത്മഹത്യ ചെയ്തതായി എസ്പി സ്ഥിരീകരിച്ചു. പോലീസ് സ്ഥലത്തെത്തി അന്വേഷണം നടത്തി. ബന്ധുക്കളെ ചോദ്യം ചെയ്തു. മുംബൈയില്‍ നിന്ന് തിരിച്ചെത്തിയ യുവതിചില കാരണങ്ങളാല്‍ അസ്വസ്ഥയായിരുന്നു. നിലവില്‍ വിഷയം അന്വേഷിച്ചുവരികയാണെന്ന് എസ്പി പറഞ്ഞു.അന്വേഷണത്തില്‍ എന്ത് വസ്തുതകള്‍ പുറത്തു വന്നാലും അതനുസരിച്ച് നടപടിയെടുക്കും. മനോവിഷമം മൂലമാണ് യുവതി ആത്മഹത്യ ചെയ്തതെന്നാണ് ബന്ധുക്കള്‍ പറയുന്നത്.
