കൊച്ചി: ഇലവുങ്കലില്‍ ശബരിമല തീര്ത്ഥാടകര് സഞ്ചരിച്ച ബസ് മറിഞ്ഞുണ്ടായ അപകടത്തില്‍ ഇടപെട്ട് കേരള ഹൈക്കോടതി.
അപകടം എങ്ങനെയുണ്ടായി എന്നത് സംബന്ധിച്ച്‌ മറുപടി നല്‍കാന്‍ ഹൈക്കോടതി ദേവസ്വം ബെഞ്ച്, മോട്ടോര്‍ വാഹന വകുപ്പ് എന്‍ഫോഴ്സ്മെന്‍റ് ഓഫീസറോട് ആവശ്യപ്പെട്ടു. ഇന്ന് വിഷയം ഹൈക്കോടതി പരിഗണിക്കും.
ഇലവുങ്കല്‍ നിന്നും കണമല പൊകുന്ന വഴി നാറാണന്‍ തോടിന് സമീപമാണ് അപകടമുണ്ടായത്. ഇന്നലെ ഉച്ചയ്ക്ക് 1.20 ഓടെയാണ് സംഭവം നടന്നത്. അപകടത്തില്‍ അന്‍പതോളം പേര്‍ക്ക് പരിക്കുപറ്റിയിട്ടുണ്ട്. മൈലാടുംതുറ സ്വദേശികളായ തീര്ത്ഥാടകര് ശബരിമല ദര്‍ശനത്തിന് ശേഷം മടങ്ങുമ്ബോഴാണ് ഇലവുങ്കല്‍-എരുമേലി റോഡിലെ മൂന്നാം വളവില്‍ അപകടം ഉണ്ടായത്. അപകട സമയത്ത് ബസില്‍ 64 മുതിര്‍ന്നവരും എട്ട് കുട്ടികളുമടക്കം 72 പേരാണ് ഉണ്ടായിരുന്നത്. ചികിത്സയിലുള്ള മൂന്ന് പേരുടെ നില ഗുരുതരമാണ്.
അമിത വേഗതയാണ് അപകടത്തിന് ഇടയാക്കിയതെന്നാണ് സംശയം. വേഗത്തില്‍ വന്ന ബസ് വളവില്‍ വെച്ച്‌ നിയന്ത്രണം നഷ്ടപ്പെട്ട് മറിഞ്ഞതാകാം എന്നാണ് വിലയിരുത്തല്‍. ബസിന് സാങ്കേതിക പ്രശ്നങ്ങളൊന്നും കണ്ടെത്താന്‍ പ്രാഥമിക പരിശോധനയില്‍ കഴിഞ്ഞില്ല. അതേസമയം പരിക്കേറ്റവരെ കോട്ടയത്തും പത്തനംതിട്ടയിലുമായി ആശുപത്രികളില്‍ പ്രവേശിപ്പിച്ചു.
