മൊബൈല്‍ പ്രേമികളുടെ ഇടയില്‍ ഏറ്റവുമധികം ആരാധകരുള്ള സ്മാര്‍ട്ട് ഫോണാണ് വണ്‍പ്ലസ് നോര്‍ഡ്. ടീസറൊക്കെ പുറത്തിറങ്ങിയതില്‍ പിന്നെ ഫോണിനായി കാത്തിരിക്കുകയാണ് മൊബൈല്‍ പ്രേമികള്‍. വിപണിയിലെ ചര്‍ച്ച പോലും വണ്‍പ്ലസ് നോര്‍ഡിനെ കുറിച്ചായി മാറിക്കഴിഞ്ഞു. ജൂലൈ 21 നാണ് വണ്‍പ്ലസ് നോര്‍ഡ് ഔദ്യോഗികമായി പുറത്തിറങ്ങുന്നത്.
ഇപ്പോഴിതാ ആരാധകര്‍ക്ക് വണ്‍ പ്ലസ് നോര്‍ഡ് സമ്മാനമായി നല്‍കുന്നുവെന്ന പ്രഖ്യാപനവുമായി എത്തിയിരിക്കുകയാണ് കമ്പനി. ആദ്യത്തെ പത്ത് മൊബൈല്‍ ഫോണുകളാണ് സമ്മാനമായി നല്‍കുന്നത്. കമ്പനിയുടെ ട്വിറ്റര്‍ അക്കൌണ്ടിലൂടെയാണ് ഇക്കാര്യം അറിയിച്ചിരിക്കുന്നത്. ആ ഫോണുകള്‍ തങ്ങള്‍ നിര്‍മ്മിച്ച വണ്‍പ്ലസ് നോര്‍ഡിന്‍റെ ആദ്യത്തെ പത്ത് എണ്ണം തന്നെയാണെന്നും അത് തിരിച്ചറിയാനായി തങ്ങളിതിന് 1 മുതല്‍ 10 വരെയുള്ള നമ്പര്‍ പിറക് വശത്തായി നല്‍കിയിട്ടുണ്ടെന്നും ട്വീറ്റീലൂടെ കമ്പനി അറിയിച്ചിരിക്കുന്നു.
