തിരുവനന്തപുരം: എസ് പി സസ്‌പെന്‍ഡ് ചെയ്ത പോലീസുകാരനെ അന്നു തന്നെ തിരിച്ചെടുത്ത് ഐ.ജി. ടെലികമ്യൂണിക്കേഷന്‍സ് എസ്.പി.നവനീത് ശര്‍മയുടെ നടപടിയാണ് ഐ.ജി അനൂപ് കുരുവിള ജോണ്‍ തിരുത്തിയത്. നവനീത് ശര്‍മ്മയുടെ ഗണ്‍മാന്‍ ആകാശിനെയാണ് നവനീത് ശര്‍മ്മ തന്നെ സസ്‌പെന്‍ഡ് ചെയ്തത്.
നവനീത് ശര്‍മ്മയുടെ വീട്ടില്‍ അതിക്രമിച്ച് കയറുകയും വീട്ടിലെ ഇലക്ട്രോണിക് ഉപകരണങ്ങള്‍ പ്രവര്‍ത്തിപ്പിക്കുകയും ചെയ്തു എന്നത് സംബന്ധിച്ച ഒരു റിപ്പോര്‍ട്ട് എസ് ഐയുടെ കയ്യില്‍ നിന്നും എഴുതി വാങ്ങിയതിന് ശേഷമായിരുന്നു എസ്പി ഗണ്‍മാനെ സസ്‌പെന്‍ഡ് ചെയ്തത്. എന്നാല്‍ ഉത്തരേന്ത്യക്കാരനായ ആകാശ് നവനീതിന്റെ വീട്ടു നായയെ കുളിപ്പിക്കാത്തതായിരുന്നു യഥാര്‍ത്ഥ കാരണമെന്ന് ആക്ഷേപം ഉയര്‍ന്നിരുന്നു.
സംഭവം പോലീസ് സേനക്കുള്ളില്‍ തന്നെ ഇത് വലിയ വിവാദമായിരുന്നു. ഡിജിപിക്ക് മുന്നിലേക്ക് പരാതിയായി വിഷയം എത്തുകയും ചെയ്തു. ഇതേ തുടര്‍ന്നാണ് മണിക്കൂറുകള്‍ക്കുള്ളില്‍ ഹെഡ് ക്വാര്‍ട്ടേഴ്‌സ് ഐജി അനൂപ് കുരുവിള സസ്‌പെന്‍ഷന്‍ ഉത്തരവ് റദ്ദാക്കിക്കൊണ്ട് ഉത്തരവിറക്കിയത്. ഇന്ന് രാവിലെയാണ് ഗണ്‍മാനെ സസ്‌പെന്‍ഡ് ചെയ്തത്. എന്നാല്‍ മണിക്കൂറുകള്‍ക്കുള്ളില്‍ തന്നെ ഐജി ഗണ്‍മാനെ തിരിച്ചെടുക്കുകയായിരുന്നു.
