ന്യൂഡല്‍ഹി: റോയല്‍ ചാലഞ്ചേഴ്സ് ബാംഗ്ലൂര്‍ ഐ.പി.എല്ലില്‍ നിന്നും പുറത്തായതിന് പിന്നാലെ വിരാട് കോഹ്ലിക്കെതിരെ രൂക്ഷ വിമര്‍ശനവുമായി മുന്‍ ഇന്ത്യന്‍ താരം ഗൗതം ഗംഭീര്‍. എം.എസ് ധോണിയും രോഹിത് ശര്‍മയും ദീര്‍ഘകാലമായി നായകന്‍മാരായി തുടരുന്നത് അവരുടെ പ്രകടനം കൊണ്ടാണെന്നും മറ്റേതെങ്കിലും ടീമായിരുന്നെങ്കില്‍ കോഹ്ലിയെ ഒഴിവാക്കിയേനെയെന്നും ഗംഭീര്‍ തുറന്നടിച്ചു.
ഗംഭീര്‍ ഇ.എസ്.പി.എന്‍ ക്രിക്ഇന്‍ഫോയോട് പറഞ്ഞതിങ്ങനെ: ”എട്ട് വര്‍ഷം എന്നുപറയുന്നത് വളരെ കൂടിയ കാലയളവാണ്. ആര്‍. അശ്വിന് എന്താണ് സംഭവിച്ചെതന്ന് നോക്കൂ. രണ്ട് വര്‍ഷം കിങ്സ് ഇലവന്‍ പഞ്ചാബിനെ നയിച്ചിട്ടും കപ്പില്ലാത്തതിനാല്‍ അദ്ദേഹത്തെ മാറ്റി.നമ്മള്‍ ധോണിയെക്കുറിച്ചും രോഹിതിനെക്കുറിച്ചും കോഹ്ലിയെക്കുറിച്ചും സംസാരിക്കുന്നു. ധോണി മൂന്ന് ഐ.പി.എല്‍ കിരീടം നേടി, രോഹിത് ശര്‍മ നാലെണ്ണം വിജയിച്ചു. അവരൊക്കെ ദീര്‍ഘകാലം ക്യാപ്റ്റന്‍മാരായി തുടര്‍ന്നത് അവരുടെ പ്രകടനം കൊണ്ടാണ്. എട്ടുകൊല്ലമായി ഫലം തന്നില്ലെങ്കില്‍ രോഹിതിനെ മുംബൈ മാറ്റുമായിരുന്നു”.
നിങ്ങളാണ് നായകനെങ്കില്‍ ക്രെഡിറ്റ് എടുക്കുന്നതോടൊപ്പം വിമര്‍ശനങ്ങളും ഏറ്റെടുക്കാന്‍ സന്നദ്ധനാകമെന്നും ഗംഭീര്‍ തുറന്നടിച്ചു. കൊല്‍കത്ത നൈറ്റ് റൈഡേഴ്സ് നായകനായിരുന്ന ഗൗതം ഗംഭീര്‍ രണ്ട് ഐ.പി.എല്‍ കിരീടങ്ങള്‍ നേടിയിട്ടുണ്ട്. 2013 സീസണില്‍ കോഹ്ലിയും ഗംഭീറും മൈതാനത്ത് പരസ്യമായി ഏറ്റുമുട്ടിയത് വലിയ വിവാദം സൃഷ്ടിച്ചിരുന്നു.
