കൊച്ചി: പ്രദേശവാസികളും വിനോദസഞ്ചാരികളും ഒരുപോലെ കാത്തിരുന്ന കടമക്കുടിയിലേക്കും ഫോർട്ട് കൊച്ചിയിലേക്കുമുള്ള വിനോദസഞ്ചാര സർവീസുകൾ ശനിയാഴ്ച മുതൽ ആരംഭിക്കുന്നു. സംസ്ഥാന ജലഗതാഗത വകുപ്പ് (എസ്ഡബ്ല്യുടിഡി) ‘സൗര്യ 2’ എന്ന സോളാർ ക്രൂയിസ് ബോട്ട് ഉപയോഗിച്ചാണ് സർവീസ് നടത്തുന്നത്.
വിനോദസഞ്ചാരികൾ ഏറെ എത്തുന്ന കടമക്കുടി ദ്വീപുകളിലേക്കുള്ള ജലഗതാഗത വകുപ്പിൻ്റെ ആദ്യത്തെ വിനോദസഞ്ചാര ബോട്ട് സർവീസാണിത്. ബോട്ട് യാത്രയ്ക്കായുള്ള ബുക്കിങ് ഇന്ന് ആരംഭിച്ചു. കടമക്കുടിയുടെ കായൽ ഭംഗിയും ഗ്രാമീണ കാഴ്ചകളും അടുത്തറിയാൻ അവസരമൊരുക്കുന്ന ‘ സീ കടമക്കുടി , സീ കൊച്ചി’ ക്രൂയിസ് സർവീസുകൾ വിനോദസഞ്ചാരികൾക്ക് പുതിയ അനുഭവം ആയിരിക്കും.
ദിവസത്തെ ആദ്യ സർവീസ് രാവിലെ 11ന് എറണാകുളം ബോട്ട് ജെട്ടിയിൽ നിന്ന് പുറപ്പെടും. രണ്ട് മണിക്കൂർ നീളുന്ന ഈ യാത്രയിൽ വിനോദസഞ്ചാരികൾ കൂടുതലായി എത്തുന്ന ബോൾഗാട്ടി, വല്ലാർപാടം, വൈപ്പിൻ, ഫോർട്ട് കൊച്ചി എന്നിവിടങ്ങളിലെത്തും. തുടർന്ന് ഉച്ചയ്ക്ക് ഒരു മണിക്ക് എറണാകുളത്ത് ബോട്ട് തിരിച്ചെത്തും. ഒരാൾക്ക് 200 രൂപയാണ് ഈ യാത്രയുടെ നിരക്ക്.
കടമക്കുടിയിൽ എത്തിയ ശേഷം അധികമായി 100 രൂപ നൽകി കയാക്കിങ്, വാട്ടർ സ്പോർട്സ് തുടങ്ങിയ വിനോദങ്ങൾ ഒരുക്കുന്ന പ്രാദേശിക റിസോർട്ട് സന്ദർശിക്കാൻ വിനോദസഞ്ചാരികൾക്ക് അവസരമുണ്ട്. യാത്രയുടെ ഭാഗമായി ലഘുഭക്ഷണവും നൽകുന്നുണ്ട്. 30 പേർക്ക് സഞ്ചരിക്കാവുന്ന ബോട്ടിൽ സംഗീത സംവിധാനമുണ്ടാകും.
ഉടൻ തന്നെ ഓൺലൈൻ ബുക്കിങ് സൗകര്യവും ഏർപ്പെടുത്തുമെന്ന് എസ്ഡബ്ല്യുടിഡിയിലെ മുതിർന്ന ഉദ്യോഗസ്ഥൻ പറഞ്ഞു. കുട്ടികൾക്കായി പ്രത്യേക നിരക്കാണ് ഏർപ്പെടുത്തിയിരിക്കുന്നത്. അഞ്ച് വയസ്സിൽ താഴെയുള്ള കുട്ടികൾക്ക് യാത്ര സൗജന്യമാണ്. 11 വയസ്സിൽ താഴെയുള്ളവർക്കും (വിദ്യാഭ്യാസപരമായ യാത്രകൾ നടത്തുന്ന സ്കൂൾ സംഘങ്ങൾ ഉൾപ്പെടെ) ടിക്കറ്റ് നിരക്കിൽ പകുതി ഇളവ് ലഭിക്കും.
കൂടുതൽ വിനോദസഞ്ചാരികൾ എത്തുന്നതോടെ പ്രാദേശിക സംരംഭങ്ങൾ, കുടുംബശ്രീ യൂണിറ്റുകൾ, ചെറുകിട കച്ചവടക്കാർ, കൂടാതെ ഹോസ്പിറ്റാലിറ്റി – ടൂറിസം മേഖലയിലെ വിവിധ പങ്കാളികൾ എന്നിവർക്ക് പുതിയ അവസരങ്ങൾ തുറന്നുകിട്ടുമെന്ന് കടമക്കുടി പഞ്ചായത്ത് പ്രസിഡന്റ് എംഎസ് ആന്റണി പറഞ്ഞു.
കടമക്കുടിയുടെ പ്രകൃതിഭംഗിയും കൊച്ചിയുടെ തീരദേശ കാഴ്ചകളും മറ്റും കണ്ട് ആസ്വദിക്കാൻ സാധിക്കുന്നതാണ് പുതിയ ബോട്ട് സർവീസ്. വിനോദസഞ്ചാരികൾക്ക് കാഴ്ചകൾ കാണാൻ സാധിക്കുന്ന തരത്തിലാണ് ബോട്ട് രൂപകൽപ്പന ചെയ്തിരിക്കുന്നത്. തിരക്ക് കൂടുതലായി പ്രതീക്ഷിക്കുന്ന വാരാന്ത്യങ്ങളിലും അവധി ദിവസങ്ങളിലും പ്രദേശവാസികൾക്കും വിനോദസഞ്ചാരികൾക്കും ഒരുപോലെ പ്രയോജനപ്പെടുന്ന രീതിയിലാണ് ബോട്ട് സർവീസ് ക്രമീകരിച്ചിരിക്കുന്നത്.
