കോക്രോച് ജനതാ പാര്ട്ടി സ്ഥാപകര്ക്ക് രാഷ്ട്രീയ അഭിലാഷങ്ങളുണ്ടെന്ന് ആക്ടിവിസ്റ്റ് സോനം വാങ്ചുക്. അവര് വിശുദ്ധരല്ലെന്നും രാഷ്ട്രീയ മോഹങ്ങളുണ്ടാകുന്നതില് താന് തെറ്റ് കാണുന്നില്ലെന്നും സോനം വാങ്ചുക് പറഞ്ഞു. ജന്തര് മന്തര് സമരത്തിനിടെയാണ് താന് ഇക്കാര്യങ്ങള് മനസിലാക്കിയതെന്നും അദ്ദേഹം കൂട്ടിച്ചേര്ത്തു.
അവര്ക്കും രാഷ്ട്രീയവും രാഷ്ട്രീയ അഭിലാഷങ്ങളുമുണ്ട്. അതൊരു മോശം കാര്യമായി കരുതുന്നില്ല. ഞാന് വളരെ അടുത്ത് നിന്ന് അവരെ മനസിലാക്കിയിട്ടുണ്ട്. രാഷ്ട്രീയ മോഹങ്ങളുണ്ടെന്ന് അവരെന്നോട് പറഞ്ഞിട്ടില്ല. ഇത് ഞാന് മനസിലാക്കിയെടുത്തതാണ്. ഇത്തരം മോഹങ്ങളൊന്നുമില്ലാത്ത വിശുദ്ധരല്ല അവര്. സോനം വാങ്ചുക്കിന്റെ വാക്കുകള് ഇങ്ങനെ. പ്രഖര് ഗുപ്തയുമായുള്ള ഒരു പോഡ്കാസ്റ്റിലായിരുന്നു സോനം വാങ്ചുക്കിന്റെ പരാമര്ശങ്ങള്.
യുവാക്കള് രാഷ്ട്രീയ പാര്ട്ടികളില് ചേരുന്നതോ പുതിയ രാഷ്ട്രീയ പാര്ട്ടികളുണ്ടാക്കുന്നതോ ഒരു മോശം കാര്യമായി താന് വിചാരിക്കുന്നില്ലെന്ന് സോനം വാങ്ചുക് കൂട്ടിച്ചേര്ത്തു. ഈ നാടിന് യുവാക്കളെ, യുവനേതാക്കളെ ആവശ്യമുണ്ട്. എന്നാല് രാഷ്ട്രീയമില്ലെന്ന് പറഞ്ഞ് ഒരു മുന്നേറ്റം കൊണ്ടുവരുമ്പോള് അതിന്റെ പവിത്രത കാത്തുസൂക്ഷിക്കാനുള്ള ബാധ്യതയുണ്ടാകും. അതല്ലെങ്കില് രാഷ്ട്രീയ പാര്ട്ടികളുമായുള്ള ബന്ധം ഒരുതരത്തിലും പ്രശ്നമായി കാണുന്നില്ലെന്നും അദ്ദേഹം പറഞ്ഞു.
