ഝാർഖണ്ഡിലെ രാജ്യസഭാ തിരഞ്ഞെടുപ്പിൽ ഇന്ത്യ (INDIA) സഖ്യത്തിന് കനത്ത തിരിച്ചടി. നിയമസഭയിൽ കൃത്യമായ ഭൂരിപക്ഷമുണ്ടായിട്ടും സഖ്യകക്ഷികൾക്കിടയിലെ വോട്ടുചോർച്ചയെ തുടർന്ന് കോൺഗ്രസ് സ്ഥാനാർത്ഥി പ്രണവ് ഝാ പരാജയപ്പെട്ടു. രണ്ട് ഒഴിവുകളിലേക്ക് നടന്ന തിരഞ്ഞെടുപ്പിൽ ഭരണകക്ഷിയായ ജാർഖണ്ഡ് മുക്തി മോർച്ചയുടെ (JMM) ബൈദ്യനാഥ് റാമും, എൻഡിഎ പിന്തുണച്ച സ്വതന്ത്ര സ്ഥാനാർത്ഥി പരിമൾ നത്വാനിയും വിജയം നേടി. ക്രോസ് വോട്ടിങ്ങിലൂടെയാണ് നത്വാനി വിജയിച്ചതെന്ന് കോൺഗ്രസ് ആരോപിച്ചു.
81 അംഗ ജാർഖണ്ഡ് നിയമസഭയിൽ ഒരു സ്ഥാനാർത്ഥിക്ക് വിജയിക്കാൻ 28 വോട്ടുകളാണ് വേണ്ടിയിരുന്നത്. സഭയിൽ 56 എംഎൽഎമാരുടെ ഭൂരിപക്ഷമുണ്ടായിരുന്ന ഇന്ത്യ സഖ്യം ഒരൊറ്റ മനസ്സോടെ വോട്ട് ചെയ്തിരുന്നെങ്കിൽ സഖ്യത്തിലെ രണ്ട് സ്ഥാനാർത്ഥികൾക്കും സുഗമമായി ജയിക്കാമായിരുന്നു. എന്നാൽ വോട്ടെടുപ്പ് കഴിഞ്ഞപ്പോൾ ജെഎംഎമ്മിന്റെ ബൈദ്യനാഥ് റാമിന് 30 വോട്ടുകൾ ലഭിച്ചപ്പോൾ കോൺഗ്രസ് സ്ഥാനാർത്ഥിയായ പ്രണവ് ഝായ്ക്ക് കേവലം 20 വോട്ടുകൾ മാത്രമാണ് നേടാനായത്.
വെറും 24 എംഎൽഎമാർ മാത്രമുണ്ടായിരുന്ന എൻഡിഎ ക്യാമ്പ്, ഇന്ത്യ സഖ്യത്തിലെ വോട്ടുകൾ ചോർത്തിയാണ് സ്വതന്ത്ര സ്ഥാനാർത്ഥിയായ പരിമൽ നത്വാനിക്ക് 28 വോട്ടുകൾ ഉറപ്പാക്കി വിജയം സമ്മാനിച്ചത്. തിരഞ്ഞെടുപ്പിൽ ആകെ മൂന്ന് വോട്ടുകൾ അസാധുവായി പ്രഖ്യാപിക്കുകയും ചെയ്തു. ഇന്ത്യ സഖ്യത്തിലെ പ്രാദേശിക കക്ഷികൾ എൻഡിഎയ്ക്ക് അനുകൂലമായി വോട്ട് മറിച്ചതാണ് കോൺഗ്രസിന് നാണക്കേടായ ഈ പരാജയം സമ്മാനിച്ചത്.
