ഓപ്പണർ അഭിഷേക് ശർമ്മ ആശുപത്രിയിൽ

ടി20 ലോകകപ്പിൽ പാകിസ്ഥാനെതിരായ നിർണ്ണായക മത്സരത്തിന് ദിവസങ്ങൾ മാത്രം ബാക്കി നിൽക്കെ ഇന്ത്യൻ ടീമിന് കനത്ത തിരിച്ചടി. ഇന്ത്യൻ ഓപ്പണറും ലോക ഒന്നാം നമ്പർ ടി20 ബാറ്ററുമായ അഭിഷേക് ശർമ്മയെ വയറിലുണ്ടായ അണുബാധയെത്തുടർന്ന് ഡൽഹിയിലെ സ്വകാര്യ ആശുപത്രിയിൽ പ്രവേശിപ്പിച്ചു.

തിങ്കളാഴ്ചയാണ് താരത്തെ ആശുപത്രിയിൽ പ്രവേശിപ്പിച്ചത്. ബുധനാഴ്ച നമീബിയക്കെതിരായ മത്സരം ഡൽഹിയിൽ നടക്കാനിരിക്കെ താരം കളിക്കുമോ എന്ന കാര്യത്തിൽ വലിയ അനിശ്ചിതത്വം നിലനിൽക്കുകയാണ്. ഞായറാഴ്ച കൊളംബോയിലാണ് ഇന്ത്യ-പാകിസ്ഥാൻ പോരാട്ടം നിശ്ചയിച്ചിരിക്കുന്നത്.തിങ്കളാഴ്ച നടന്ന പരിശീലന സെഷനിൽ അഭിഷേക് പങ്കെടുത്തിരുന്നില്ല. ഫെബ്രുവരി 7-ന് യുഎസ്എയ്‌ക്കെതിരായ ഇന്ത്യയുടെ ആദ്യ മത്സരത്തിന്റെ രണ്ടാം ഇന്നിംഗ്‌സിലും താരം ഫീൽഡിംഗിന് ഇറങ്ങിയിരുന്നില്ല. നമീബിയക്കെതിരായ മത്സരത്തിന് മുൻപ് താരം സുഖം പ്രാപിക്കുമെന്ന പ്രതീക്ഷയിലാണ് ഇന്ത്യൻ ടീം മാനേജ്‌മെന്റ്.

അഭിഷേകിന് വയറിൽ ചില പ്രശ്നങ്ങൾ ഉണ്ടെന്നും എന്നാൽ രണ്ട് ദിവസത്തിനുള്ളിൽ അദ്ദേഹം കളിക്കാൻ സജ്ജനാകുമെന്നാണ് കരുതുന്നതെന്നും അസിസ്റ്റന്റ് കോച്ച് റയാൻ ടെൻ ഡോഷെറ്റ് വാർത്താ സമ്മേളനത്തിൽ പറഞ്ഞു. എന്നാൽ പിടിഐ (PTI) റിപ്പോർട്ടുകൾ പ്രകാരം ഡൽഹിയിലെ അരുൺ ജെയ്റ്റ്‌ലി സ്റ്റേഡിയത്തിൽ നടക്കുന്ന നമീബിയക്കെതിരായ മത്സരം താരത്തിന് നഷ്ടമാകാനാണ് സാധ്യത.

“അഭിഷേകിനെ ഡൽഹിയിലെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്. രോഗലക്ഷണങ്ങൾ കൃത്യമായി മനസ്സിലാക്കാൻ ചില പരിശോധനകൾ കൂടി നടത്തേണ്ടതുണ്ട്. ഇന്ന് അദ്ദേഹം ഡിസ്ചാർജ് ചെയ്യപ്പെടുമോ എന്ന കാര്യത്തിൽ വ്യക്തതയില്ല. എങ്കിലും നമീബിയക്കെതിരായ മത്സരത്തിൽ അദ്ദേഹം കളിക്കാനുള്ള സാധ്യത കുറവാണ്,” ബിസിസിഐ വൃത്തങ്ങൾ പിടിഐയോട് പറഞ്ഞു. പാകിസ്ഥാനെതിരായ മത്സരത്തിന് മുൻപ് താരം പൂർണ്ണ ആരോഗ്യം വീണ്ടെടുക്കുമോ എന്നാണ് ആരാധകർ ഉറ്റുനോക്കുന്നത്.

എന്തുകൊണ്ട് അഭിഷേക് പാകിസ്ഥാനെതിരെ നിർണ്ണായകം?

2024-ൽ അന്താരാഷ്ട്ര ക്രിക്കറ്റിൽ അരങ്ങേറ്റം കുറിച്ച ശേഷം ടി20 ഫോർമാറ്റിൽ ഇന്ത്യയുടെ ഏറ്റവും മികച്ച ബാറ്ററാണ് 25-കാരനായ അഭിഷേക് ശർമ്മ. നിലവിൽ ഐസിസി ടി20 റാങ്കിംഗിൽ ഒന്നാം സ്ഥാനത്തുള്ള താരം 39 മത്സരങ്ങളിൽ നിന്ന് 1297 റൺസ് നേടിയിട്ടുണ്ട്. ഇതിൽ രണ്ട് സെഞ്ചുറികളും എട്ട് അർദ്ധ സെഞ്ചുറികളും ഉൾപ്പെടുന്നു.

193.46 എന്ന തകർപ്പൻ സ്ട്രൈക്ക് റേറ്റിലാണ് താരം ബാറ്റ് ചെയ്യുന്നത്. 2025-ലെ ഏഷ്യ കപ്പിൽ പാകിസ്ഥാനെതിരായ ഇന്ത്യയുടെ വിജയങ്ങളിൽ അഭിഷേക് നിർണ്ണായക പങ്ക് വഹിച്ചിരുന്നു. പാകിസ്ഥാനെതിരെ കളിച്ച മൂന്ന് മത്സരങ്ങളിൽ നിന്ന് 189.66 സ്ട്രൈക്ക് റേറ്റിൽ 110 റൺസാണ് താരം അടിച്ചുകൂട്ടിയത്.

2026-ലും തന്റെ മികച്ച ഫോം തുടരുന്ന അഭിഷേക് ഈ വർഷം കളിച്ച ആറ് മത്സരങ്ങളിൽ നിന്ന് 245.94 എന്ന അവിശ്വസനീയമായ സ്ട്രൈക്ക് റേറ്റിൽ 182 റൺസ് നേടിയിട്ടുണ്ട്.