തിരുവനന്തപുരം: നന്ദിയോട് പടക്ക വില്‍പനശാലക്ക് തീ പിടിച്ചുണ്ടായ അപകടത്തില്‍ ഉടമസ്ഥന് ഗുരുതരപരിക്ക്. ആലംപാറയില്‍ പ്രവർത്തിക്കുന്ന ശ്രീമുരുക പടക്ക വില്‍പ്പന ശാലയിലാണ് തീ പിടിച്ചത്.
ഉടമസ്ഥൻ ഷിബുവിനാണ് പൊള്ളലേറ്റത്. പരിക്കേറ്റ ഷിബുവിനെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
രാവിലെ 10.30 തോടെയാണ് അപകടമുണ്ടായത്. ഷിബുവിന്റെ വീടിന് അല്‍പ്പം അകലെയാണ് ഗോഡൌണ്‍ പ്രവർത്തിച്ചിരുന്നത്. സംഭവം നടക്കുന്ന സമയത്ത് ഷിബു മാത്രമായിരുന്നു സ്ഥലത്ത് ഉണ്ടായിരുന്നത്. തീപിടിത്തത്തിനുളള കാരണം വ്യക്തമല്ല. പെട്ടന്ന് വലിയ പൊട്ടിത്തെറി ശബ്ദമുണ്ടായി എന്നും ഉടൻ തീ പടർന്ന് പിടിച്ചുവെന്നുമാണ് സമീപവാസികള്‍ പറയുന്നത്. പോലീസും ഫയർഫോഴ്സും സ്ഥലത്തെത്തി. തകർന്ന കെട്ടിടങ്ങള്‍ക്ക് ഉളളില്‍ മറ്റാരെങ്കിലും കുടുങ്ങിപ്പോയിട്ടുണ്ടോ എന്നും പരിശോധിക്കുന്നുണ്ട്.
