‘ദൃശ്യം 3’ തിയേറ്ററുകളിൽ വൻ വിജയം നേടി പ്രദർശനം തുടരുകയാണ്. ഇപ്പോഴിതാ മോഹൻലാൽ ആരാധകർ ഏറെ കാത്തിരുന്ന ചിത്രത്തിന്റെ ഒടിടി റിലീസ് വിവരങ്ങൾ പുറത്തുവന്നിരിക്കുകയാണ്. ജീത്തു ജോസഫ് സംവിധാനം ചെയ്ത ഈ ക്രൈം ത്രില്ലറിന്റെ ഡിജിറ്റൽ സ്ട്രീമിംഗ് അവകാശം സ്വന്തമാക്കിയിരിക്കുന്നത് ആമസോൺ പ്രൈം വീഡിയോയാണ്.
മോഹൻലാൽ അവതരിപ്പിക്കുന്ന ജോർജുകുട്ടിയുടെ കഥയുടെ മൂന്നാം അധ്യായമാണ് ചിത്രം പറയുന്നത്. ആദ്യ രണ്ട് ഭാഗങ്ങളെപ്പോലെ തന്നെ സസ്പെൻസ് നിറഞ്ഞ കഥയും അപ്രതീക്ഷിത ട്വിസ്റ്റുകളുമാണ് ചിത്രത്തെ പ്രേക്ഷകർക്കിടയിൽ ശ്രദ്ധേയമാക്കിയത്. റിലീസിന് പിന്നാലെ ബോക്സ് ഓഫീസിലും ചിത്രം മികച്ച പ്രകടനമാണ് കാഴ്ചവെച്ചത്. നിലവിൽ ഇതുവരെ 236.89 കോടിയാണ് ചിത്രത്തിന്റെ ആഗോള കളക്ഷൻ എന്നാണ് റിപ്പോർട്ടുകൾ പറയുന്നത്. ജൂൺ 18 മുതൽ ആമസോൺ പ്രൈമിലൂടെ ചിത്രം പ്രദർശനം ആരംഭിക്കും.
2026 മെയ് 21-ന് തിയേറ്ററുകളിലെത്തിയ ചിത്രം വളരെ കുറഞ്ഞ സമയത്തിനുള്ളിൽ തന്നെ ആഗോള ബോക്സ് ഓഫീസിൽ വൻ നേട്ടം സ്വന്തമാക്കി. നാലാം ആഴ്ചയിലും ചിത്രം മികച്ച പ്രേക്ഷക പിന്തുണയോടെ മുന്നേറുകയാണ്. ജീത്തു ജോസഫ് രചനയും സംവിധാനവും നിർവഹിച്ച ചിത്രത്തിൽ മീന, ആശ ശരത്, സിദ്ധിഖ്, അൻസിബ ഹസൻ, എസ്തർ അനിൽ എന്നിവരും പ്രധാന വേഷങ്ങളിൽ എത്തുന്നു.
കുടുംബത്തെ രക്ഷിക്കാൻ വീണ്ടും നിയമത്തെയും സാഹചര്യങ്ങളെയും നേരിടുന്ന ജോർജുകുട്ടിയുടെ പോരാട്ടമാണ് ചിത്രത്തിന്റെ മുഖ്യ ആകർഷണം. തിയേറ്ററിൽ ചിത്രം കാണാൻ സാധിക്കാത്തവർക്ക് ഉടൻ തന്നെ വീട്ടിലിരുന്ന് ഈ സസ്പെൻസ് ത്രില്ലർ ആസ്വദിക്കാനാകും. മലയാളത്തിന് പുറമെ തമിഴ്, തെലുങ്ക്, കന്നഡ ഭാഷകളിലും ചിത്രം ഒടിടിയിൽ ലഭ്യമാകുമെന്നാണ് പ്രതീക്ഷ.
