ലോക ക്രിക്കറ്റിലെ മികച്ച ലെഗ് സ്പിന്നർമാരിൽ ഒരാളായ റാഷിദ് ഖാൻ തൻ്റെ കരിയറിനെക്കുറിച്ച് ഞെട്ടിക്കുന്ന വെളിപ്പെടുത്തലുമായി രംഗത്ത്. ഇന്ത്യയുൾപ്പെടെ രണ്ട് രാജ്യങ്ങൾ തനിക്ക് പൗരത്വവും തങ്ങൾക്കായി കളിക്കാനുള്ള അവസരവും വാഗ്ദാനം ചെയ്തിരുന്നുവെന്നും എന്നാൽ അത് നിരസിച്ചുവെന്നും റാഷിദ് ഖാൻ വ്യക്തമാക്കി. തന്റെ മാതൃരാജ്യമായ അഫ്ഗാനിസ്ഥാനോടുള്ള കൂറ് നിലനിർത്താനാണ് താൻ ഈ തീരുമാനമെടുത്തതെന്ന് അദ്ദേഹം പറഞ്ഞു.
റാഷിദ് ഖാൻ്റെ പുറത്തിറങ്ങാനിരിക്കുന്ന ‘റാഷിദ് ഖാൻ: ഫ്രം സ്ട്രീറ്റ്സ് ടു സ്റ്റാർഡം’ (Rashid Khan: From Streets to Stardom) എന്ന പുസ്തകത്തിലാണ് ഈ വെളിപ്പെടുത്തലുകൾ ഉള്ളത്. 2023-ലെ ഐപിഎൽ സീസണിനിടെയാണ് ഇത്തരമൊരു നിർദ്ദേശം അദ്ദേഹത്തിന് മുന്നിലെത്തിയത്. “എനിക്ക് ഓസ്ട്രേലിയയിൽ നിന്നും ഇന്ത്യയിൽ നിന്നും പൗരത്വവും കളിക്കാനുള്ള അവസരവും വാഗ്ദാനം ലഭിച്ചിരുന്നു. എന്നാൽ ഞാൻ അവരോട് പറഞ്ഞു, ‘എന്റെ രാജ്യത്തിന് വേണ്ടി കളിക്കാൻ കഴിയുന്നില്ലെങ്കിൽ ഞാൻ മറ്റൊരു രാജ്യത്തിന് വേണ്ടിയും കളിക്കില്ല’,” പുസ്തകത്തിൽ റാഷിദ് ഖാൻ വ്യക്തമാക്കുന്നു.
ഓസ്ട്രേലിയൻ വാഗ്ദാനത്തെക്കുറിച്ച് കൂടുതൽ വിശദീകരിക്കുന്നില്ലെങ്കിലും ഇന്ത്യൻ ക്രിക്കറ്റ് ബോർഡിൽ നിന്നുള്ള സമീപനത്തെക്കുറിച്ച് റാഷിദ് പുസ്തകത്തിൽ ദീർഘമായി വിവരിക്കുന്നുണ്ട്. ഗുജറാത്ത് ടൈറ്റൻസിന് വേണ്ടി കളിക്കുന്ന സമയത്ത് ബിസിസിഐയിലെ ഒരു ഉയർന്ന ഉദ്യോഗസ്ഥൻ തന്നെ കാണാൻ ആഗ്രഹിക്കുന്നുവെന്ന് ഒരു ടീം ഭാരവാഹി അറിയിക്കുകയായിരുന്നു.
“ഞാൻ അദ്ദേഹത്തെ ചെന്ന് കണ്ടു. നിങ്ങളുടെ രാജ്യത്തെ (അഫ്ഗാനിസ്ഥാൻ) സാഹചര്യം വളരെ മോശമാണ്, അതിനാൽ ഇന്ത്യയിലേക്ക് വരൂ എന്ന് അദ്ദേഹം പറഞ്ഞു. ഞങ്ങൾ നിങ്ങൾക്ക് ഇന്ത്യൻ രേഖകൾ നൽകാം, ഇവിടെ താമസിച്ച് ഇന്ത്യയ്ക്കായി ക്രിക്കറ്റ് കളിക്കൂ എന്നായിരുന്നു നിർദ്ദേശം. ആ വാക്കുകൾ കേട്ട് ഞാൻ അത്ഭുതപ്പെട്ടുപോയി. എങ്കിലും ചിരിച്ചുകൊണ്ട് ഞാൻ പറഞ്ഞു, നന്ദി, ഞാൻ എന്റെ രാജ്യമായ അഫ്ഗാനിസ്ഥാനുവേണ്ടിയാണ് കളിക്കുന്നത്,” റാഷിദ് ഓർമ്മിക്കുന്നു.
സോഷ്യൽ മീഡിയ ക്യാമ്പയിനും അഷ്റഫ് ഗനിയും
റാഷിദ് ഖാന് ഇന്ത്യൻ പൗരത്വം നൽകണമെന്ന ആവശ്യം നേരത്തെയും ഉയർന്നിട്ടുണ്ട്. 2018-ൽ സൺറൈസേഴ്സ് ഹൈദരാബാദിന് വേണ്ടി കളിക്കുമ്പോൾ കൊൽക്കത്ത നൈറ്റ് റൈഡേഴ്സിനെതിരെയുള്ള മികച്ച പ്രകടനത്തിന് പിന്നാലെ വലിയൊരു സോഷ്യൽ മീഡിയ ക്യാമ്പയിൻ ഇന്ത്യയിൽ നടന്നിരുന്നു.
അന്ന് വിദേശകാര്യ മന്ത്രിയായിരുന്ന സുഷമ സ്വരാജിനെ ടാഗ് ചെയ്തുകൊണ്ടായിരുന്നു ആരാധകരുടെ അഭ്യർത്ഥന. എന്നാൽ പൗരത്വ കാര്യങ്ങൾ ആഭ്യന്തര മന്ത്രാലയമാണ് കൈകാര്യം ചെയ്യുന്നതെന്ന് അന്ന് മന്ത്രി മറുപടി നൽകിയിരുന്നു.
അന്ന് അഫ്ഗാൻ പ്രസിഡന്റായിരുന്ന അഷ്റഫ് ഗനിയും ഇതിനോട് പ്രതികരിച്ചിരുന്നു. റാഷിദ് ഖാൻ അഫ്ഗാനിസ്ഥാന്റെ അഭിമാനമാണെന്നും അഫ്ഗാന്റെ ഏറ്റവും മികച്ച ആസ്തിയെ വിട്ടുനൽകില്ലെന്നും അദ്ദേഹം വ്യക്തമാക്കിയിരുന്നു. ആ പിന്തുണയ്ക്ക് അന്ന് റാഷിദ് നന്ദി പറയുകയും ചെയ്തിരുന്നു. താൻ എവിടെപ്പോയാലും തന്റെ ഹൃദയം അഫ്ഗാനിസ്ഥാനൊപ്പമാണെന്ന് അദ്ദേഹം ആവർത്തിക്കുന്നു.
