പാപ്പാഞ്ഞിയെ കത്തിച്ച് പുതുവര്‍ഷത്തെ വരവേറ്റ് ഫോര്‍ട്ട് കൊച്ചി

ഗാലാഡി ഫോർട്ട് കൊച്ചിയെന്ന കൂട്ടായ്‌മയുടെ നേതൃത്വത്തിലാണ് പാപ്പാഞ്ഞിയെ തയ്യറാക്കി വെളി മൈതാനിയിൽ വച്ച് കത്തിച്ചത്. ഇത്തവണ എല്ലാവരുടെയും സഹകരണം ലഭിച്ചെന്നും തങ്ങൾ ഇറ്റാലിയൻ മാതൃകയിലുള്ള പാപ്പാഞ്ഞിയെയാണ് തയ്യാറാക്കിയതെന്നും ഗാലഡി ഫോർട്ട് കൊച്ചി അറിയിച്ചു. ഓരോ വർഷവും പപ്പാഞ്ഞിയുടെ ഉയരം വർധിപ്പിച്ച് 80 അടി ഉയരത്തിലേക്ക് പപ്പാഞ്ഞിയുടെ ഉയരമെത്തിയിരുന്നു. എന്നാൽ സുരക്ഷാ പ്രശ്‌നങ്ങൾ പരിഗണിച്ച് പാപ്പാഞ്ഞിയുടെ ഉയരം കുറയ്ക്കാൻ അധികൃതർ നിർദേശിക്കുകയായിരുന്നു.

കാർണിവൽ കമ്മിറ്റി പരേഡ് മൈതാനിയിൽ ഒരുക്കിയ പാപ്പാഞ്ഞിയുടെ ഉയരം 50 അടിയായിരുന്നു. എന്നാൽ വെളി മൈതാനിയിൽ ഗാലാഡി ഫോർട്ട് കൊച്ചി തയ്യാറാക്കിയത് 55 അടി ഉയരമുള്ള പാപ്പാഞ്ഞിയാണ്. ഫോർട്ട് കൊച്ചിയിലെ പുതുവത്സരാഘോഷ പരിപാടികളിൽ ക്രമസമാധാനമുറപ്പാക്കാൻ ശക്തമായ പൊലീസ് സുരക്ഷയാണൊരുക്കിയത്. 28 ഇൻസ്പെക്‌ടർമാരും 13 ഡി.വൈ.എസ്.പി റാങ്കിലുള്ള ഉദ്യോഗസ്ഥരും ഉൾപ്പെടെ 1200 പൊലീസ് സേനാംഗങ്ങളെ വിന്യസിച്ചു.

സുരക്ഷ മുൻനിർത്തി പരേഡ് ഗ്രൗണ്ട്, വെളി ഗ്രൗണ്ട് പരിസരങ്ങളില്‍ പാർക്കിങ് നിരോധിച്ചിരുന്നു. ബുധനാഴ്‌ച ഉച്ചക്ക് രണ്ടിന് ശേഷം ഈ ഭാഗങ്ങളിലേക്ക് വാഹനങ്ങൾ കടത്തിവിട്ടിരുന്നില്ല. റോഡുകളിൽ വാഹനം പാർക്ക് ചെയ്യുന്നത് ഒഴിവാക്കി നിർദിഷ്‌ട പാർക്കിങ് മേഖലകളിൽ മാത്രമാണ് വാഹനങ്ങളുടെ പാർക്കിങ് അനുവദിച്ചത്.

വൈപ്പിൻ ഭാഗത്തു നിന്നും റോറോ വഴി ഫോർട്ട് കൊച്ചിയിലേക്ക് വാഹനങ്ങൾ വൈകിട്ട് നാല് വരെയും ആളുകളെ ഏഴ് വരെയും മാത്രമാണ് കടത്തിവിട്ടത്. അതിനു ശേഷം ഫോർട്ട് കൊച്ചിയിൽ നിന്നും മടങ്ങുന്നവർക്ക് മാത്രമേ റോറോ ജങ്കാർ സൗകര്യം ഉപയോഗിക്കാൻ അനുമതി നൽകിയത്. വൈപ്പിനിൽ നിന്നും ഫോർട്ട് കൊച്ചിയിൽ നിന്നും നഗരത്തിൻ്റെ വിവിധ ഭാഗങ്ങളിലേക്ക് ബസ് സർവീസുകൾ ക്രമീകരിച്ചിരുന്നു. ബസുകൾ പുലർച്ചെ മൂന്നു വരെയാണ് സർവീസ് നടത്തിയത്. മെട്രോ റെയിൽ പുലർച്ചെ രണ്ട് വരെയും വാട്ടർ മെട്രോ പുലർച്ചെ നാലുവരെയും പ്രവർത്തിച്ചു. കൂടാതെ കൊച്ചി ഫീഡർ ബസുകളുടെ സേവനവും ലഭ്യമായിരുന്നു.